‘80% van skole gereed’

Henriette Lamprecht – Sowat 80% van die 1 920 staatskole oraloor in die land is gereed om leerlinge volgens verpligte gesondheidsregulasies te ontvang wanneer hulle vanaf Junie in fases na die skoolbanke terugkeer.

Die regulasies sluit die aankoop van handreinigers en temperatuurskandeerders en die omvattende skoonmaak van skole en koshuise in.

Volgens die uitvoerende direkteur in die ministerie van onderwys, kuns en kultuur, me. Sanet Steenkamp, het 193 van die skole ’n probleem met die voorsiening van water. Die geraakte skole is in die Kavango-Wes-, Kavango-Oos, Omusati- en Omahekestreek geleë. Moontlike oplossings sluit die aankoop van ’n 10 000-litertenk, die sink van boorgate of aansluiting by ’n hoofwaterlyn in.

Steenkamp sê met die terugkeer van leerlinge sal onderwysers “inval waar hulle laas opgehou het”.

Volgens haar sal met ’n “hersiende leerplan” gewerk word wat beteken die werkslading is verminder, maar leerlinge kry steeds die basiese vaardighede wat nodig is om na die volgende graad te skuif.

Die fokus sal op die ses bevorderingsvakke val om sodoende te vergoed vir tyd wat verlore gegaan het.

Steenkamp sê die ministerie het besluit om onderrig op Saterdae weens sekere godsdienstige praktyke nie voorskriftelik te maak nie.

Sy het beklemtoon geen sport sal op skoolgronde beoefen word nie en kontakspeletjies op speelgronde is taboe.

Met verwysing na die voorsiening van maskers aan leerlinge het Steenkamp gesê die ministerie werk nou saam met die ministeries van arbeid en handel vir die vervaardiging van maskers vir elke leerling.

Sy het beklemtoon die infasering van die verskillende grade se terugkeer is gebaseer op “openbare gesondheidsoorwegings in die beste belang van die kind”.

In die eerste fase keer graad 11 en 12-leerlinge op 3 Junie terug skool toe omdat “ons hulle wil deursien tot die eksamens” wat fokus op die hersiende leerplan en die uitfasering van graad 12. In fase twee kom pre-primêr tot graad 3 aan die beurt op 22 Junie.

“Dit is die grondslagfase wat ons wil versterk en is meer gebaseer op vaardighede. Dit is die groep wat die minste baat by selfstudie en wat nie noodwendig syfer- en lettervaardighede het nie,” sê Steenkamp.

Klem sal volgens haar net op vier areas val en wel twee tale, wiskunde en omgewingstudies. In laasgenoemde sal veral sterk klem gelê word op gesondheid en kwessies soos sosiale afstand en higiëne.

Graad 7 en 9, “die einde van ’n fase”, kom op 6 Julie aan die beurt, gevolg deur die oorblywende grade op 20 Julie.

Die direkteur van onderwys in die Khomasstreek, mnr. Gerard Vries het op sy beurt gesê maatreëls is getref om te verseker watervoorsiening by skole in die streek word nie afgesny nie. Volgens hom is alle rekeninge tot in April vereffen en bly “kommunikasiekanale” met verwante partye oop.

Met verwysing na voedingsprogramme by skole in die streek het Vries gesê mieliemeelmengsels word by die skole deur ouers en voogde van geraakte leerlinge afgehaal. Voorraad is tot einde Julie beskikbaar, met gesprekke aan die gang om te verseker die verskaffing duur tot die einde van die jaar voort.

Volgens Vries het skole in die streek wat oor naaimasjiene as praktiese deel van sekere vakke beskik, reeds met die maak van maskers begin. Die plan is om te verseker elke leerling sal twee wasbare en herbruikbare maskers hê.

Vries sê die dra van maskers sal deel van skole se reëls en regulasies en “deel van skooluniforms” moet word. Volgens hom sal leerlinge met die terugkeer na skole steeds “’n mate van winter” ervaar en is dit noodsaaklik dat dié wat siek is, eerder tuisbly.

Hy het beklemtoon die ministerie “sal niks doen om die gesondheid van leerlinge te benadeel nie”.

– [email protected]