10 jaar, 21 operasies

Dialise drie keer per week

12 July 2018 | Gesondheid
Henriette Lamprecht



Hy is 'n baie gelukkige seuntjie, het altyd iets te sê en is baie lief vir teken.

In sy kort lewe van byna 10 jaar het Shaali Josaphat Iipinge reeds 21 ­operasies ondergaan.

Boonop kry hy drie keer per week dialise vir drie ure op 'n slag, en 'n nieroorplanting is sy enigste hoop op 'n normale lewe.

As enkelma van Shaali en sy tweelingsussie Nelago is dit vir me. Pauline Chigumbu pynlik om haar seun se lyding te aanskou.

“My seun verstaan nie hoekom hy nie soos ander kinders 'n normale lewe kan lei nie. Wanneer hy mense sien wat siek is, vra hy altyd of dit met hom ook gaan gebeur en hoekom God dit toelaat as hy dan vir Hom so lief is,” vertel Chigumbu.

Dié ma en haar seun se bloedgroep verskil, wat beteken sy kan nie 'n nier aan hom skenk nie.

In Namibië is daar nie 'n waglys vir nierskenkers nie. So iets bestaan in Suid-Afrika, maar voorkeur word aan Suid-Afrikaanse burgers gegee.

Omdat Shaali so jonk is, sal die oorplanting boonop in die buurland gedoen moet word.

Volgens Chigumbu is haar tweeling op 14 Julie 2008 vroeg gebore. Op hul tweede dag het 'n dokter bloed in Shaali se urine opgemerk.

“Ek onthou ek het gedink dit is 'n nagmerrie en sal eindig. Min het ek geweet dit was maar net die begin van my reis,” vertel sy.

Shaali was net drie dae oud en het 'n skrale 1,7 kg geweeg toe die eerste operasie op hom uitgevoer is. Vandag staan die getal operasies wat die 10-jarige moes ondergaan op 21.

“Met die geboorte van die tweeling was ek besig met eksamens om as geoktrooieerde rekenmeester te kwalifiseer. Van die eksamens het ek geskryf, terwyl my seun in die hospitaal was. My ouers sou sê as ek dit slaag, sal dit die reis draagliker maak. Maar geen geld kan hierdie reis draaglik maak nie.”

Sy onthou 'n keer wat Shaali nierversaking gehad het en in haar arms ineengestort het.

“Sy lyf het net uit my hande gegly, ek het gedink dit is sy einde, maar God was daar.”

Haar seun is haar held en spoor haar aan om nie moed op te gee nie.

“Sy lyfie het al soveel operasies gehad, tog wil hy sy lewe ten volle lei,” sê sy.

Chigumbu dra swaar aan al die mediese uitgawes.

“Soms veroorsaak die mediese uitgawes en die beperkinge op sy dieet dat my salaris nie alles vir die maand dek nie. Dan moet ek reëlings tref om vir sy medikasie te betaal,” sê sy.

Weens die dialise en sy siektetoestand is Shaali by die Privaatskool Welwitschia ingeskryf, wat vir kinders met spesiale behoeftes voorsiening maak.

“Ek probeer verseker dat hy sover moontlik 'n normale lewe lei.”

Die dialise hou haar seun aan die lewe, maar om uiteindelik 'n normale lewe te kan lei, het Shaali dringend 'n nieroorplanting nodig.

“Ek sal enigiets doen sodat my seun nie die grootste deel van sy lewe in hospitale moet deurbring nie, en om sy daaglikse pyn weg te vat,” sê sy.

Shaali drink 14 pille per dag en is onlangs weens sy nierversaking met hoë bloeddruk gediagnoseer.

Chigumba het haar dank teenoor personeel van Medi-Clinic uitgespreek, wat hulle al as Shaali se tweede tuiste beskryf.

Ook teenoor die Lady Pohamba- en Rooms-Katolieke Hospitaal, Path­care, Namibia Health Plan (NHP) en die Privaatskool Welwitschia.

“Die belangrikste is my werkgewer wat my help met 'n werk wat die rekeninge kan betaal. Mag God elkeen seën wat my tot dusver op my seun se reis gehelp het, hetsy met kos by die hospitaal, of wat my kinders versorg het wanneer ek by die hospitaal was, my apteekfooie help betaal het en ook die dokters wat die ekstra myl vir Shaali gestap het en nooit moed opgegee het nie. 'n Dokter behandel jou, maar God genees jou.”

Chigumbu erken die finansiële las van Shaali se siekte is baie swaar en om te help met bydraes het sy 'n trustrekening vir sy mediese uitgawes geopen.

“Jy kan nie net by 'n winkel instap en 'n nier koop nie. Sommige mense is werklik ondersteunend, ander voel as jy dit al vir soveel jaar deurgaan, moet jy mos nou al daaraan gewoond wees,” het sy gesê.

Vir navrae of bydraes kan ­Chigumbu by [email protected] gekontak word.

Die trustrekening se besonderhede is: Shaali Iipinge Kidney Transplant; Bank Windhoek, Trustrekening; Capricorn-tak (486-372), reknr. 8010638884.

Soortgelyk

 

Wilde perde: Jongste vul reeds aangeval

57 minute gelede | Ministeries

Tanja Bause - Enige hoop op oorlewing van die Namib se wilde perde krimp al meer, terwyl die ministerie van die omgewing en toerisme na...

Leerlingdokters 'van swakker gehalte'

57 minute gelede | Onderwys

Henriette Lamprecht - Namibië bestee al ses jaar lank geld aan die opleiding van mediese studente in die buiteland.Volgens mnr. Cornelius Weyulu, registrateur van die...

Regulasies vir loterye en dobbel kom

57 minute gelede | Toerisme

font face="Verdana" >Francoise Steynberg - Alle rolspelers in die lotery- en dobbelbedryf moet landswye openbare werkwinkels bywoon sodat regulasies volgens nuwe wetgewing opgestel kan...

Gesondheidsmanne vas oor hospitaaltender

57 minute gelede | Ministeries

Twee administratiewe beamptes van die ministerie van gesondheid en maatskaplike dienste se kantoor op Otjiwarongo is op borgtog van N$5 000 elk vrygelaat ná hulle...

Weer, Woensdag 20 Februarie 2019

57 minute gelede | Weer

BINNELAND: Sonnig en baie warm in die verre noordooste. Elders sal dit gedeeltelik bewolk en baie tot bloedig warm wees met enkele reënbuie in die...

Twee kinders met stok doodgeslaan

57 minute gelede | Misdaad

’n Angolese burger is in hegtenis geneem ná hy twee minderjarige kinders na bewering doodgeslaan het en hul ouma ernstig gewond het. Die voorval het...

Weerwaak teen hitte uitgereik

57 minute gelede | In beeld

Die Namibiese weerkantoor sê die kanse op reën is besig om te verbeter in die noordwestelike dele van die land, asook in die Khomasstreek, waar...

Duister SA bekommer NamPower nie

57 minute gelede | Energie

Augetto Graig - Namibië se nasionale kragverskaffer, NamPower, sê Suid-Afrika se kragverskaffer, Eskom, is nie die enigste bron waarmee plaaslike krag aangevul word nie. “Namibië...

Pack Safari open toergids-akademie

57 minute gelede | Toerisme

Pack Safari het amptelik die deure van sy toergids-akademie in Windhoek oopgemaak. Die akademie bied gratis beroepsopleiding aan plaaslike, Duitssprekende toergidse met FGASA Veldgids vlak...