‘Ek het nie meer trane oor’

Wat ’n vreugdevolle viering van Ingrid Maasdorp se sesde verjaardag moes wees, het ontaard in ’n hartverskeurende herinnering aan die tragedie wat haar gesin uitmekaar geskeur het.’n Dag voor Ingrid haar sesde verjaardag sou vier, was haar ma en nog ’n familielid deel van ’n soektog na nog ’n vermiste kind, die sesjarige Roslin Ndinelao Fabian, wat ook soos Ingrid vermis was en wat, soos Ingrid, glo verkrag en vermoor is.Albei meisies het op ’n Donderdag vermis geraak en is op ’n Vrydag gevind met tragiese ooreenkomste wat wonde vir die Maasdorp-gesin weer oopgeruk het.Die gesin het Saterdag, pleks van verjaardagkerse aan te steek, kerse gebrand by die brug waar haar liggaam gevind is en waar hulle enkele weke vroeër ’n uur lank moes wag vir die polisie om op te daag.“Jy was op dieselfde plek waar jy jou dogter se liggaam moes identifiseer en dan moet jy weer hier soek vir die volgende kind,” sê Ingrid se ma, Lizelle, hartseer. Tydens ’n besoek deur president Netumbo Nandi-Ndaitwah Sondag aan die familie, het Ingrid se ouma Dolly in ’n emosionele en rou relaas die reaksie van die owerhede op haar kleindogter se dood bevraagteken. “My klein Ingrid was soos my eie dogter,” het ouma Dolly gesê. “Sy is die kind van my dogter, maar ek het haar soos my eie grootgemaak, jy kan my maar ‘mamma’ noem.”Ouma Dolly het vertel hoe haar Ingrid eendag skool toe gegaan het en eenvoudig net nie weer teruggekom het nie. Haar pyn is vererger deur die gebrek aan onmiddellike ondersteuning van regeringsamptenare.“Wat my ongelukkig maak, is dat daar tot vandag toe geen minister of hooggeplaaste amptenaar na ons toe gekom het nie. Ek het nie eens ’n brief van die kantoor van Sanet Steenkamp ontvang nie,” het sy hartseer gesê.Ouma Dolly het verwys na ’n beplande protesoptog oor die gemeenskap se kommer oor hul veiligheid wat gestop is omdat dit glo ’n bedreiging vir ’n ekspo op die dorp sou inhou, ’n besluit wat haar diep seergemaak het. “My vraag was ‘wat is so belangrik? Die dood van ’n vyfjarige kind wat wreed verkrag en vermoor is of vir die ekspo om voort te gaan?’”Volgens haar het dit nog ’n tragedie gekos vir die owerhede om uiteindelik die bedroefde families te ontmoet.“Sou die tweede en derde voorvalle nie gebeur het nie, sou ’n ontmoeting soos hierdie nooit plaasgevind het nie,” het ouma Dolly gesê. “As ek verkeerd is, moet die president my vergewe.”In ’n oomblik wat die harte van almal aanwesig geraak het, het sy direk in die minister van onderwys, vernuwing, jeug, sport, kuns en kultuur, Sanet Steenkamp, se oë gekyk en gesê: “Ek het nie meer trane oor om te huil nie.”Dié woorde het Steenkamp gebroke gelaat en ’n swaar stilte oor die byeenkoms laat hang, ’n gemeenskap wat die naweek weer daaraan herinner is dat hul pleidooie om hulp en geregtigheid steeds onbeantwoord bly. – republikein@republikein.com.na

‘Ek het nie meer trane oor’

Kommentaar

Republikein 2025-04-30

Meld asseblief aan om kommentaar te lewer

‘Ek het nie meer trane oor’

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie