‘Elke kommunale boer moet ’n kommersiële boer word’

Ons werk is gedoen wanneer elke boer ’n kommersiële boer is en elke kommersiële boer op internasionale vlak meeding.Dit is die boodskap van die nuwe minister van landbou, visserye, water en grondhervorming, dr. Mac Albert Hengari. Hy en sy nuwe adjunk, Ruth Masake, sê hierdie sektore vorm saam die ruggraat van die Namibiese ekonomie, wat nie net voedselsekerheid aandryf nie, maar ook werkskepping, armoedeverligting en landelike ontwikkeling. “Dit is algemeen bekend dat meer as 70% van ons bevolking direk of indirek hul bestaan uit die landbousektor maak en werk vir ongeskoolde en halfgeskoolde werkers skep,” het Hengari gesê.Hy het tien sleutelprioriteite beklemtoon om die volhoubare benutting van die land se hulpbronne op land en in die see te verseker en die welstand van Namibiërs te verbeter.VERSNEL LANDBOUPRODUKSIEHengari meen landbouproduksie moet versnel word en die uitbreiding van besproeiingstelsels is van kritieke belang. “Dit is noodsaaklik dat ons nuwe, bestaande groenskemas uitbrei en verseker dat almal onder volle produksie geplaas word om nasionale voedselproduksie vir voedselsekerheid te verbeter.Beide klein, medium en grootskaalse boere moet ondersteun word,” het hy gesê.“Ons moet omvattende beleide en strategieë implementeer wat daarop gemik is om landbouproduktiwiteit, voedselsekuriteit en tegniese kapasiteit vir beide kommersiële en bestaansboere te verbeter. “Dit tesame met die verskaffing van veeartsenykundige en plantgesondheidsdienste sal ’n stewige grondslag lê.”AGRO-NYWERHEDE Hengari het klem gelê op die ontwikkeling van agro-nywerhede wat die ekonomieë in al 14 streke ’n hupstoot sal gee deur ’n wye reeks werksgeleenthede van verwerking tot bemarking en logistiek te skep.“In die sektor vir visserye en mariene hulpbronne, wil ek die belangrikheid van inisiatiewe beklemtoon wat waardetoevoeging oor alle totale toelaatbare vangste vir gereguleerde spesies moet verbeter. “Ons kan nie meer aan ons vis bloot as rou kommoditeite vir uitvoer dink nie; ons moet onsself posisioneer om waarde toe te voeg deur verwerking, verpakking en innoverende produkaanbiedinge.”‘BLOU EKONOMIE’Hengari sê die “blou ekonomie” moet bevorder word deur die geïntegreerde ontwikkeling van mariene hulpbronne, wat terselfdertyd beskerm moet word. Hy het verwys na vissersbote in Namibiese waters wat nie aan Namibiërs behoort nie. Oor die toekenning van visvangkwotas, sê die minister moet dit plaaslike deelname in die vissektor bevorder en die implementering daarvan sal op ’n deursigtige wyse gedoen word.“Ons moet beleide formuleer en strategieë bedink om kapasiteit vir Namibiese operateurs te bou asook hul toegang tot vissersbote te vergemaklik.” WATERINFRASTRUKTUURRakende die ontwikkeling van die infrastruktuur vir watervoorsiening moet alle Namibiërs toegang tot drinkwater hê. Vir Hengari is die prioriteite die konstruksie van die tweede ontsoutingsaanleg in die Erongostreek, asook die ontwikkeling en optimale benutting van die groot waterbronne in die Ohangwena-akwifer en die Neckartaldam. “Daarbenewens moet ons verseker dat water beskikbaar is vir vee, nedersettings en nywerheidsontwikkeling, wat noodsaaklik is om gemeenskappe te onderhou en ekonomiese vooruitgang te dryf.”Hengari meen bestaande bilaterale ooreenkomste moet versterk word en Namibië moet aktief met buurlande betrokke raak om wedersydse voordelige samewerking in die sektore van landbou, water en visserye te verseker.“Die billike toewysing en gesamentlike gebruik van waterbronne moet verseker word. Dit sal ons gedeelde hulpbronne beskerm en bydra tot streekstabiliteit en -welvaart.”GRONDHERVORMINGOor die kwessie van grondhervorming, sê Hengari die grondhervormingsprogram moet bespoedig word om te verseker dat grond billik deur hervestiging toegewys word en produktief aangewend word. “My benadering is nie dat grond net verkry word en mense hervestig nie, maar op die gebruik van grond. Dit is belangrik om ondersteuning aan hervestigingsboere te bied om hul produksievermoë te verbeter.”Hy sê die implementering van die aanbevelings van die tweede grondkonferensie moet ook versnel word, asook die uitvaardiging van die wetsontwerp op grond sodat hervestigingsboere en huurders, veral dié in kommunale gebiede, toegang tot finansieringsgeleenthede kry. Hengari sê die verkryging van kommersiële landbouplase, veral dié wat naby dorpsgebiede geleë is, is noodsaaklik om plaaslike owerheidsgrense binne die bestek van die wet uit te brei.Hy het sy voorgangers, Calle Schlettwein en Derek Klazen vir hul leierskap en toewyding bedank. – francoise@nmh.com.na

‘Elke kommunale boer moet ’n kommersiële boer word’

Kommentaar

Republikein 2025-12-19

Meld asseblief aan om kommentaar te lewer

‘Elke kommunale boer moet ’n kommersiële boer word’

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.