Aweh, masekind! Só lyk Afrikaans ’n eeu later

Afrikaans vier vandag die 100ste herdenking van sy amptelike erkenning as landstaal in Suid-Afrika en ons vier saam met ons buurland die eg Namibiese vorm wat hierdie taal in die monde van sprekers van verskeie ras- en kultuurgroepe aangeneem het. Hiér word die Afrikaans wat in die 1770’s met die Afrikaners aangekom het en later onder die Oorlam- en die Bastervolk posgevat het, fyn verweef met die invloed van die Kalahari en sy mense. Oor die eeue het ons begin om die shandie te tune, vir ander van ons chow te owe, die zak/kapandi/mariba aan te kap, ons het begin tjiepout en tjaila, ons het begin om na boras te luister, ons wietti (of wela soms) met ons masekinnes en ons sê altyd asseblief en danko – veral vir ons zalies en toppies. Leenwoorde uit Namibiese tale soos Oshiwambo het onder meer woorde soos nawa, meme en tate deel gemaak van hoe ons elke dag met mekaar kommunikeer. MAKIETIEDie afgelope naweek het Rehoboth ook Afrikaans op sy eie manier gevier met ’n Afrikaanse rapfees. Die kletsrymer Gordon Schiefer, bekend as GSG Namibia, het gesê rap (natuurlik in Afrikaans) is vir hom ’n manier om stories te vertel. Afrikaans is Schiefer se huistaal en hy sê hy het besluit om musiek in Afrikaans te maak, want hy wou uniek wees. Hy sê ander kletsrymers soos Jeffrey (DiChef) Jobb, Ike (Ixa) Adonis en Salvador Mouers het hom geïnspireer.Jobb sê ook dat rap vir hom ’n manier is om homself uit te druk en beskou homself as ’n storieverteller. “Dit verskil van kunstenaar tot kunstenaar. Sommige sing oor vroumense en karre, maar ek deel my lewensverhaal en ek vertel stories,” sê hy.Volgens Jobb was Adonis ook die rede waarom hy in Afrikaans begin musiek maak het. “Ek wil mense deur musiek bymekaarbring,” sê Jobb.Die kletsrymer Safihuna (Ses) Safi is oorspronklik van Lüderitz en sê hy spesialiseer in vrystyl-rap. “Ek het gekom om te wys wat ek kan bied,” sê hy.Hoewel hy sê hy “kom nog in die game in”, belowe Safi dat hy ’n talent is om dop te hou. “Ses is in die buurt!”Uitspeel se Henriette Lamprecht en Jo-Maré Duddy het tydens die Afrikaanse rapfees op Rehoboth saam met Jobb, Schiefer en Safi gekuier. Kyk Vrydag om 20:00 hoe hulle saam in Afrikaans jiggy en jive.Uitspeel is ’n weeklikse program op NTV. Die program word elke Vrydag om 20:00 op kanaal 285 op DStv of kanaal 25 op GOtv uitgesaai. Of kyk Vrydae op Uitspeel se Facebookblad.KOMPETISIESamelopend met die vieringe van Afrikaans se amptelike erkenning as landstaal in Suid-Afrika, wat onder die vaandel van Afrikaans 100 gehou word, stuur Republikein vandag ’n kompetisie van stapel.Lede van die publiek kan ’n video per WhatsApp na die Synergi kletsbot by +264 85 785 6231 stuur waarin hulle hul gunsteling- Afrikaanse woord, gesegde of unieke frase deel. Een deelnemer sal met ’n enjoy.my.na-lidmaatskap wat vir vyf jaar geldig is en ’n geskenkbewys van N$5 000 wegstap. – irene-mari@nmh-hub.com.na

Aweh, masekind! Só lyk Afrikaans ’n eeu later

Kommentaar

Republikein 2026-03-17

Meld asseblief aan om kommentaar te lewer

Aweh, masekind! Só lyk Afrikaans ’n eeu later

Kommentaar

Republikein 2026-03-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.