Steun vir Palestina ‘blote lippetaal’

Die Centre for People’s Resistance (CPR) se beroep op die Namibiese regering om tasbare stappe te doen ter ondersteuning van die beëindiging van Israel se beweerde volksmoord van die Palestynse volk, val op dowe ore.Die stigter van CPR en plaaslike menseregteprokureur, Uno Katjipuka, se versoek dat Namibiese owerhede enige medepligtigheid aan die beweerde volksmoord ondersoek wat tot regstappe kan lei, word van bakboord na stuurboord gestuur.Die hoof van die Namibiese polisie, luitenant-generaal Joseph Shikongo, het op 31 Julie ontvangs van die versoek van 17 Julie erken, maar die saak na die ministerie van internasionale betrekkinge en handel verwys.Die aanklaer-generaal, Martha Imalwa, het glad nie amptelik op die versoek gereageer nie, alhoewel sy deur WhatsApp-boodskappe bevestig het dat vermeende oortreders opgespoor kan word, voordat sy op goedkeuring van die ministerie van internasionale betrekkinge aangedring het.Die minister van justisie en arbeidsverhoudinge, Fillemon Wise Immanuel, het die saak ook na die ministerie van internasionale betrekkinge verwys, “as die leidende ministerie oor Namibië se buitelandse beleidsposisies,” volgens e-poskorrespondensie van Immanuel se persoonlike assistent.Volgens Katjipuka is die versoek gebaseer op Namibië se bekragtiging van die Geneefse Konvensies, wat sedert 2003 deur die Wet op die Namibiese Geneefse Konvensies in plaaslike wetgewing opgeneem is.Daarvolgens kan enigiemand wat op enige plek deelneem aan of medepligtig is aan volksmoord deur Namibiese wetstoepassers vervolg word.Verder het Namibië in Januarie vanjaar by die Den Haag-groep aangesluit, waardeur die land, saam met Bolivia, Colombia, Senegal en Suid-Afrika, hulself verbind tot optrede om verantwoordelikheid vir die beweerde volksmoord in Palestina af te dwing, deur onafhanklike ondersoeke en vervolging op internasionale en nasionale vlak. Namibië het homself ook verbind tot die Verenigde Nasies se resolusie A/RES/Es-10/24 om lasbriewe wat deur die Internasionale Strafhof (ICC) in November 2024 uitgereik is, uit te voer.Die premier van Israel, Benjamin Netanyahu, en die voormalige Israelse minister van verdediging, Yoav Gallant, staar beide kragtens dié lasbriewe vervolg in die gesig.Katjikupa versoek spesifiek dat Namibië amptelik kriminele ondersoeke instel na oorlogsmisdade wat sedert 7 Oktober 2023 gepleeg is, lasbriewe van die ICC uitvoer en om ander individue wat betrokke is by die beweerde volksmoord in Palestina te vervolg.Haar versoek sluit ook in dat individue met Israelse en Namibiese dubbele burgerskap ondersoek word vir diens in die Israelse weermag (IDF) sedert 7 Oktober 2023, IDF-soldate wat Namibië besoek, vervolg word en dat besighede met bande met Israel ondersoek word vir die ondersteuning en finansiering van die voortgesette beweerde volksmoord.Die uitvoerende direkteur van internasionale betrekkinge en handel, Penda Naanda, het amptelik op 25 Augustus op die versoek gereageer deur Katjipuka per e-pos in te lig dat sy ministerie nie ondersoek- of vervolgingsgesag het nie en dat die regeringinstansies wat hiervoor verantwoordelik is, onafhanklik optree.Verder kan Namibië nie teen Israel se burgers optree sonder feite of wetlike gronde nie, volgens hom.Die minister van internasionale betrekkinge en handel, Selma Ashipala-Musavyi, het verlede Donderdag tydens ’n diplomatieke inligtingsessie aangevoer: “Namibië sal voortgaan om die heldhaftige mense van Palestina te ondersteun en solidariteit met hulle te betoon.”Op 13 Augustus het sy die Namibiese regering se teenkanting teen Israel se planne om Gasastad oor te neem in ’n verklaring verwerp.Katjipuka wys daarop dat Ashipala-Musavyi in daardie verklaring VN-lidlande aanspoor om hul internasionale verpligtinge na te kom en “nie toe te kyk terwyl ’n humanitêre ramp van monumentale afmetings ontvou nie”.Eerstens dring Katjipuka daarop aan dat hierdie ramp ’n volksmoord genoem moet word, en tweedens, “ons as Namibiërs moet kan wys op die tasbare stappe wat ons doen om ons eie internasionale verpligtinge na te kom”, volgens haar brief van 15 Augustus aan Ashipala-Musavyi. – augetto@nmh-hub.com.na

Steun vir Palestina ‘blote lippetaal’

Kommentaar

Republikein 2026-04-28

Meld asseblief aan om kommentaar te lewer

Steun vir Palestina ‘blote lippetaal’

Kommentaar

Republikein 2026-04-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.