Toiletsage (uiteindelik) ter ruste gelê

Die Teenkorrupsiekommissie van Namibië (ACC) het uiteindelik ’n saak gefinaliseer wat vanaf 2008 dateer en waarin ’n sakeman betrek is by ’n puttoiletskandaal in die noorde van die land wat miljoene beloop het. Die saak is in Februarie afgehandel met die plaaslike sakeman Samson Halwoondi Shandjuuka wat tot 12 jaar tronkstraf of ’n boete van N$106 000 gevonnis is vir sy betrokkenheid by die N$20 miljoen-skandaal vir puttoilette in die Omusatistreek. Dié inligting is Dinsdag deur die ACC bekend gemaak as terugvoer oor sy suksesverhale vir die jaar. Meer as ’n dekade gelede het die Namibiese regering N$20 miljoen aan die Omusati-streekraad toegeken vir ’n sanitasieprojek wat toilette aan die streek moes verskaf.Network Media Hub (NMH) het toe berig dat byna 75% van huishoudings nie toegang tot toilette gehad het nie. Dit het die Nasionale Beplanningskommissie genoop om die streek vir die program te nomineer.In 2010 is ontdek die konstruksie van ’n enkele toileteenheid het N$770 000 gekos, wat vrae laat ontstaan het oor wanbestuur van fondse deur beamptes wat in beheer van die projek was. Ander streke wat voordeel uit dieselfde projek getrek het, soos Oshana, Ohangwena, Kavango en Zambezi, het toilette gebou wat tussen N$10 000 en N$12 000 elk gekos het.Die N$770 000 was na bewering die koste van ’n 12 sitplek-puttoilet by Ondukuta in die Tsandi-kiesafdeling. Die prys was bykans gelykstaande aan die konstruksie van ’n halfdosyn laekostehuise in dieselfde gebied. Boonop het die Omusatistreek glo sy begroting van N$20 miljoen gebruik om net 60 toilette te bou. Die Instituut vir Openbare Beleidsnavorsing (IPPR) het gevolglik in Mei 2011 ’n verslag vrygestel wat verdere bewerings uitgewys het wat senior regeringsbeamptes verbind het met maatskappye wat by die projek betrokke was. Abisai Shaningwa, die Omusatistreek se direkteur van streekbeplanning en voormalige senior werknemer by Staathuis, is geïdentifiseer as ’n sleutelfiguur agter een van die maatskappye wat na bewering voordeel uit die projek getrek het. Soortgelyk is Mateus Kaholongo, ’n persoonlike assistent van die voormalige staatshoof Sam Nujoma, ook met dieselfde maatskappy verbind.In dieselfde tyd is ’n skandaal in die Zambezi ontbloot waar die waarnemende hoofstreekbeampte, Robert Mapenzi, en die waarnemende direkteur van beplanning, Francis Sibeya, daarvan beskuldig is dat hulle die streek se tenderproses gemanipuleer het om ’n kontrak van N$20 miljoen vir die bou van 1 450 toilette toe te ken aan ’n maatskappy waarin Mapenzi en sy vrou aandeelhouers was, aldus die IPPR-verslag.Die ACC se woordvoerder, Josefina Nghituwamata, het by navraag aan NMH gesê dit is hierdie en ander sake wat vanjaar afgehandel is wat die kommissie aangemoedig het om jaarlikse verslae vry te stel om openbare bewusmaking te skep deur die voortgesette deel van inligting. “Die lys van afgehandelde sake is uitgestuur om die publiek te wys wat deur die jaar gebeur in terme van korrupsiesake.“Dit is nie in die verlede gedoen nie en selfs al is baie sake afgehandel, was mense nie daarvan bewus nie. Ons het ’n beduidende leemte in die deel van inligting by die kommissie gesien en wou dit verander,” het sy gesê. Nghituwamata het erken die publiek het vertroue begin verloor in die kommissie se vermoë om korrupsie doeltreffend te takel.Sy het die hoop uitgespreek dat die inisiatief kan help om vertroue te herbou. Volgens haar is die vertraging in die finalisering nie aan die kant van die kommissie nie, maar weens die hofproses.“Ongelukkig het ons nie beheer oor die afhandeling van sake nie, want die ACC vervolg nie. Die deel van die lys van afgehandelde sake is 'n bewys van die harde werk wat die kommissie doen,” het sy gesê.– republikein@republikein.com.na

Toiletsage (uiteindelik) ter ruste gelê

Kommentaar

Republikein 2026-02-03

Meld asseblief aan om kommentaar te lewer

Toiletsage (uiteindelik) ter ruste gelê

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.