Koës-moordenaars lewenslank tronk toe

Sewe jaar ná die grumoord op Giel Botma (79) en sy 80-jarige vrou, Sarie, het regter Dinnah Usiku Dinsdag die egpaar se twee moordenaars lewenslange tronkstraf in die hoërhof in Windhoek opgelê. Die egpaar is in Februarie 2018 op hul plaas naby Koës wreed aangeval en vermoor. Giel is geslaan en met sy eie .22-geweer in die mond geskiet. Sarie moes in haar laaste minute geweldige lyding en vrees ervaar toe sy verkrag, met ’n skerp voorwerp gesteek en met haar eie skoenveters verwurg is.Die moordenaars, Julius Frederick (Lemmy) Arndt en Andries Afrikaner, is Dinsdag elk tot lewenslange tronkstraf gevonnis op die dubbele moordklagte, 15 jaar elk op die aanklag van verkragting en 10 jaar vir huisbraak met die opset om te steel en te roof met verswarende omstandighede. Die twee mans het by die egpaar se huis ingebreek en van hul besittings gesteel, asook die motorhuis oopgebreek en ’n voertuig gesteel wat later in Arndt se besit gevind is. Usiku het gelas dat die vonnisse samelopend uitgedien word.“Die oorlede egpaar is op ’n wrede en grusame wyse vermoor. Die beskuldigde mans het geen berou oor hul misdade getoon nie, maar het eerder probeer om die skuld op mekaar te plaas.”Sy sê volgens die polisie se bewyse spreek die brutaliteit boekdele van hoe die misdade gepleeg is. ‘VLAAG VAN MOORDE’Die regter het beklemtoon die samelewing is in die onlangse verlede geskok deur die vlaag van moorde, verkragtings en huisbrake waaroor daar feitlik daagliks in die media berig word, waar bejaardes meestal die slagoffers is. “Die huidige misdade en die verskriklike omstandighede waaronder die misdade gepleeg is, wek wye verontwaardiging en veroordeling uit die samelewing en moet ’n groot mate van erkenning in die vonnisoplegging kry,” het Usiku gesê.“Daar word van howe vereis om ’n balans te vind tussen die beskuldigdes se persoonlike belange en die belange van die samelewing in die algemeen.” Vir die staat het Seredine Jacobs twee briewe as verswarende omstandighede ingedien wat deur die oorlede egpaar se seuns, Schoeman en Giel Botma, geskryf en in die hof voorgelees is. Schoeman het in sy brief gepleit om die diepte van hul verlies, sowel as die wreedheid van die misdade wat teen sy ouers gepleeg is, te erken. Hy meen dat hulle die pyn vir die res van hul lewens sal moet verduur as gevolg van die verlies van hul ouers.Giel het sy oorlede ouers as bejaarde, weerlose slagoffers beskryf. “Hulle is in hul huis aangeval, ’n plek wat vir hulle veilig moes gewees het. Die geweld waarmee die misdade gepleeg is, was doelbewus en ’n daad van monsters,” lui sy brief.Joseph Andreas het vir Arndt verdedig wat steeds sy onskuld volgehou het, terwyl Afrikaner vir genade in sy vonnis gepleit het. ’n Derde beskuldigde, Johannes Marcellinus Christiaan, is in Oktober 2024 onskuldig op alle klagte bevind en vrygespreek. – francoise@nmh.com.na

Koës-moordenaars lewenslank tronk toe

Kommentaar

Republikein 2025-09-17

Meld asseblief aan om kommentaar te lewer

Koës-moordenaars lewenslank tronk toe

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie