Hof hoor slotbetoë in Riedel-saak

Die prokureur van die twee mans wat teregstaan vir die moord op Armin Riedel (68), en sy vrou, Brunhilde (66), het Vrydag aangevoer die staat het nie bo redelike twyfel bewys dat die mans skuldig is nie.Die beskuldigdes, Bernadus Afrikaner en Salaphual Unaeb se prokureur Melissa Windisch, het dit tydens haar slotbetoë in die hoërhof in Windhoek gesê. Die staatsadvokaat, Ethel Ndlovu, het Donderdag in haar betoë voor regter Naomi Shivute aangevoer daar is voldoende bewyse om die mans skuldig te bevind aan al 11 aanklagte teen hulle. Dit sluit twee aanklagte van moord, roof met verswarende omstandighede, brandstigting en dwarsboming van die gereg in.Shivute het die saak tot 7 Mei uitgestel waartydens sy na verwagting uitspraak sal lewer.Die Riedel-egpaar is in Januarie 2018 in hul plaashuis in die Gobabis-omgewing vermoor waarna hul huis, met hul liggame binne-in, aan die brand gesteek is.Windisch het Vrydag aangevoer dat die staat se saak gebaseer is op getuienisse van getuies wat nie by die plaashuis teenwoordig was toe die misdade na bewering gepleeg is nie.Op die aanklag van moord het Windisch in haar getuienisontleding aangevoer dat “dit nie korrek is om aan te voer dat beskuldigde 1 (Afrikaner) die oorledenes geskiet het nie” en daar is geen getuienisse gelewer van die gebeure wat binne die plaashuis plaasgevind het nie. Sy meen die bewering dat Unaeb aan een van die staatsgetuie beken het dat hy by die misdade op die plaas betrokke was – maar nie die oorledenes vermoor het nie – slegs ’n algemene erkenning was en nie aan die bepalende elemente van ’n misdaad voldoen nie. Sy meen die staat kan nie daarop staatmaak nie.Windisch het verder aangevoer dat die staat nie kon bewys wanneer of hoe die items wat na bewering van die plaas gesteel is, uit die huis verwyder is nie. Sy het ook daarop gewys dat die beskuldigdes nie by enige van die plekke of persone geplaas kon word waar die gesteelde goedere later gevind is nie.Op die aanklag van brandstigting het Windisch gesê hoewel die verdediging nie betwis dat brandstof as ’n versneller gebruik is nie, het die staat versuim om te bewys dat die beskuldigdes die plaashuis aan die brand gesteek het. Daar is verder aangevoer dat Afrikaner daardag sy klere gewas het, wat glo na diesel geruik het, maar Windisch het gesê die staatsgetuie het teenstrydige verklarings afgelê oor die tyd van die dag wat dit gebeur het.“Gegewe die aantal onsekerhede, teenstrydighede in getuienisse en die feit dat daar geen ooggetuie was wat die beweerde brandstigting aanskou het nie, kan daar nie gesê word die staat het bo redelike twyfel bewys die beskuldigdes het die misdryf van brandstigting gepleeg nie. Hulle moet dus op hierdie aanklag vrygespreek word.”– republikein@republikein.com.na

Hof hoor slotbetoë in Riedel-saak

Kommentaar

Republikein 2026-05-04

Meld asseblief aan om kommentaar te lewer

Hof hoor slotbetoë in Riedel-saak

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.