Té veel stroom na Rundu-hospitaal

Die staatshospitaal op Rundu gaan gebuk onder voortgesette personeeltekorte wat geweldige druk op die huidige personeel plaas. Om die erns van die situasie te beklemtoon, het ’n senior departementshoof aan Network Media Hub (NMH) gesê ’n enkele dokter sien gereeld meer as 100 pasiënte per dag. Die geweldige las is deels weens die hospitaal se herklassifikasie jare gelede van ’n distrikshospitaal na ’n intermediêre verwysingshospitaal. Die hospitaal het ook geen beduidende en nuwe opknappings sedert 2008 gehad nie, met geen verdere verbeterings wat aangebring is om die stygende aantal pasiënte te akkommodeer nie. Die herklassifikasie van die hospitaal het die omvang van sy dienste verhoog asook die gebied wat dit bedien. Laasgenoemde sluit pasiënte van Kavango-Oos en -Wes, die Zambezistreek en ook selfs suidelike Angola in. Ten spyte van herhaalde versoeke aan inwoners om eerder hul nabygeleë klinieke te besoek, gaan talle pasiënte steeds voort om plaaslike geriewe vir primêre gesondheidsorg te omseil en gaan direk na die hospitaal, selfs vir kwale wat elders behandel kon word. Dié neiging is uitgelig tydens ’n personeelvergadering vandeesweek tussen bestuurslede van die hospitaal en mediaverteenwoordigers. In ’n opvolgonderhoud met NMH het die hospitaal se mediese superintendent, dr. Theresia Shivera, verduidelik watter pogings aan die gang is om die situasie te probeer beredder. “Ons hoop is dat die pas goedgekeurde werwingsplan vir personeel die tekorte sal takel, maar dit gaan nie oornag gebeur nie,” het sy gesê.Shivera het verduidelik die hospitaal se personeel bestaan tans uit twee spesialiste, agt mediese dokters en ses leerlingdokters. Dit bring die departement vir interne medisyne op 16 te staan, verpleegpersoneel uitgesluit. – republikein@republikein.com.na

Té veel stroom na Rundu-hospitaal

Kommentaar

Republikein 2025-09-16

Meld asseblief aan om kommentaar te lewer

Té veel stroom na Rundu-hospitaal

Kommentaar

Republikein 2025-09-16

Meld asseblief aan om kommentaar te lewer

MELD AAN

Advertensie