Leerlinge beland in hospitaal weens ‘besmette voedsel’

Vermoedelike voedselvergiftiging by die Maria Mwengere Senior Sekondêre Skool by Kayengona in die Kavango-Oosstreek het 67 leerlinge in die hospitaal laat beland, insluitend ’n gehoorgestremde seun wat vlugtig in die intensiewesorgeenheid opgeneem is voordat hy gestabiliseer is.Die beweerde besmetting het ouers ontstel en dringende ondersoeke deur gesondheids- en onderwysowerhede tot gevolg gehad. Shambyu-kringinspekteur Blasius Haita het bevestig die uitbreking het Saterdag begin nadat leerlinge macaroni met wors vir middagete bedien is, gevolg deur brood en polonie. Kort daarna het leerlinge van maagkrampe, braking en erge hoofpyn gekla.“Hulle is onmiddellik met die skoolbus na die Rundu-staatshospitaal gehaas,” het Haita aan Network Media Hub (NMH) gesê. “Een leerling het met aankoms flou geword en is in hoë sorg opgeneem.”Teen Maandagmiddag is 67 leerlinge behandel. Hiervan is 33 leerlinge vir waarneming opgeneem, terwyl ander buitepasiëntsorg ontvang het en ontslaan is. Haita het bevestig die skool het in die verlede ’n soortgelyke voorval ervaar. “Twee tot drie jaar gelede was daar ’n voorval met drie leerlinge, maar dit is vinnig onder beheer gebring en was nie ernstig nie,” het hy gesê.Die onderwysdirekteur in die Kavango-Oosstreek, Christine Shilima, wat die hospitaal besoek het, het gesê sy het die gehoorgestremde seun in die hoësorgeenheid gevind waar hy ontbyt geëet het. “Deur basiese gebaretaal het hy aangedui dat hy baie beter voel, hoewel hy steeds maagkrampe gehad het,” het sy gesê.Die hoofverpleegster van die hospitaal, Martina Hausiku, het gister aan NMH bevestig dat die 33 leerlinge stabiel is, insluitend die gehoorgestremde seun wat in die waakeenheid was en na die gewone saal oorgeplaas is. “Die meeste van hulle is teruggestuur,” het sy gesê.OORSAAK ONDUIDELIKShilima het beklemtoon ondersoekbeamptes moet die presiese bron van die uitbreking vasstel. “Die verslag van die skool het aangedui dat die leerlinge nie bederfde kos tydens aflewering gekry het nie. Ons moet nou vasstel wat presies in die kos dit veroorsaak het,” het sy gesê.Die ministerie van gesondheid en maatskaplike dienste het inspekteurs, ondersteun deur veiligheidsowerhede, ontplooi om die beweerde besmetting op te spoor en doelbewuste nalatigheid uit te sluit.Ouers het hul frustrasie uitgespreek oor die gebrek aan kommunikasie. “Kan ons asseblief ’n behoorlike mediaverklaring kry?” het een ouer gevra. “Ons kinders mag nie selfone hê nie, die onderwysers antwoord nie, en ons weet nie wat gebeur nie. Ons is vreeslik bekommerd.”NANSOIntussen het die Namibiese Nasionale Studente-organisasie (Nanso), gister deur sy woordvoerder, Jessy Abraham, ’n beroep gedoen op dringende voedselveiligheidshervormings na aanleiding van dié voorval. Hy het gesê die voorval het ernstige leemtes in verskaffers se toesig, koshuismaaltydhigiëne en waterveiligheid by skole onthul. Met die eindeksamens wat nader kom, het Nanso gewaarsku dat geraakte leerlinge akademiese terugslae in die gesig staar en skole aangespoor om die ministerie van onderwys, vernuwing, jeug, sport, kuns en kultuur se sanitasiestandaarde af te dwing, gereelde inspeksies uit te voer en aanspreeklikheid te verseker. Die organisasie het belowe om die ondersoek noukeurig te monitor en te druk vir langtermyn-hervormings om Namibiese leerlinge te beskerm. – republikein@republikein.com.na

Leerlinge beland in hospitaal weens ‘besmette voedsel’

Kommentaar

Republikein 2025-09-05

Meld asseblief aan om kommentaar te lewer

Leerlinge beland in hospitaal weens ‘besmette voedsel’

Kommentaar

Republikein 2025-09-05

Meld asseblief aan om kommentaar te lewer

MELD AAN

Advertensie