Elf ekstra dokters help duisende pasiënte gratis

In ’n nuwe vennootskap tussen die ministerie van gesondheid en maatskaplike dienste en die private sektor, gaan ’n groep dokters van vandag af gratis dienste saans by die Katutura-gesondheidsentrum in Windhoek verskaf. Die sentrum bedien volgens amptelike statistiek van die ministerie 162 000 mense. Die minister, dr. Esperance Luvindao, het gister aangekondig 11 private dokters gaan by die sentrum help om die druk op een van Namibië se besigste gesondheidsgeriewe te verlig waar tussen 700 tot 1 000 pasiënte per dag – sowat 20 000 besoeke per maand – gesien word. Die sentrum verskaf ook noodsaaklike dienste soos nageboortesorg en gesinsbeplanning en bedien duisende vroue en kinders in die omliggende gemeenskappe. Ten spyte van pogings in onlangse jare om die opeenhoping te probeer verlig deur diensure by omliggende klinieke te verleng, bly die aantal pasiënte wat by die sentrum vir hulp aanklop, uitermatig en voortgeset hoog. Die Khomasstreek, die tuiste van net minder as halfmiljoen mense, het slegs een gesondheidsdistrik met beperkte infrastruktuur.Die Katutura-gesondheidsentrum fokus op primêre gesondheidsorg en is 24 uur oop, wat dit ’n kritieke lewenslyn vir inwoners van die hoofstad se informele nedersettings en omliggende kiesafdelings maak. As deel van onmiddellike pogings tot verligting het die ministerie die 11 private dokters aan nagskof by die sentrum toegewys, volgens Luvindao. Sy het die dokters se toewyding as ’n daad van nasionale diens beskryf. Sy het hul bydrae geprys en gesê hul besluit om sonder finansiële vergoeding te dien, beliggaam die gees van “ubuntu” en weerspieël ’n diepgaande gevoel van burgerlike verantwoordelikheid.Voor vandag was daar net drie dokters wat die nagskof gedek het, maar dit word verhoog tot vyf om die lang wagtye te probeer verminder, veral gedurende die kritieke ure in die aand wanneer aanvraag toeneem. “Die vraag na gesondheidsdienste by Katutura is die hoogste vanaf 19:00 tot middernag,” het Luvindao verduidelik.“Dis duidelik die geval, want al die ander klinieke sluit om 19:00 en pasiënte word gedwing om na ’n enkele fasiliteit vir noodsorg te stroom.”Die ministerie het ook diensure by die Okuryangava-gesondheidsentrum en die Otjomuise-kliniek verleng. Vanaf vandag af sal dié geriewe sewe dae per week van 07:00 tot 19:00 oop wees. “Hierdie is hoëvolume-geriewe wat in digbevolkte gebiede geleë is. Hul nabyheid aan informele nedersettings maak dit noodsaaklike toegangspunte. “Die verlenging van hul ure sal baie help om die druk wat tans deur die Katutura-gesondheidsentrum ervaar word, te verlig,” het die minister gesê.Die ministerie het hom verder daartoe verbind om die gesondheidsentrum in Okuryangava vanaf 1 Augustus 2025 op te gradeer na ’n volle 24-uur-diens.Hoewel die geriewe beperkings met betrekking tot infrastruktuur ervaar, regverdig die sentrum se strategiese ligging die uitbreiding. Die werwing van bykomende personeel is glo reeds aan die gang om die oorgang te ondersteun. “Ons weet die ruimte is beperk, maar die behoefte is té groot om te ignoreer,” het Luvindao gesê.“Okuryangava het die potensiaal om ’n beduidende deel van ons bevolking 24 uur per dag te bedien.”Sy het ook planne bevestig om dienste by die Maxuilili-kliniek in die Tobias Hainyeko-kiesafdeling uit te brei. Met ’n bevolking van meer as 46 000 in sy opvanggebied en ’n moderne struktuur wat reeds in plek is, word die kliniek tans voorberei om vanaf 1 Oktober vanjaar 24 uur per dag oop te wees. “Hierdie ontwikkeling sal groot verligting vir die Katutura-gesondheidsentrum bring. Dit sal toegang tot dienste desentraliseer en verseker dat pasiënte in die gebied dag en nag sorg nader aan hulle kan ontvang,” het Luvindao verduidelik.Die ministerie ondersoek ook ondersteunende ingrypings soos aanlyn konsultasies en hersiene diensverpligtinge vir nuwe gesondheidspraktisyns.Met verwysing na personeeltekorte, ongelyke ontplooiing en interne oorplasings wat voortgaan om landelike gebiede soos Zambezi, Kavango-Wes, Hardap, Omaheke, en ||Kharas te teister waar geriewe dikwels onderbedien is, het Luvindao gesê die nuwe wet op gesondheidsberoepe sal hierdie wanbalanse deur beleidshervorming en geteikende aansporings takel. – republikein@republikein.com.na

Elf ekstra dokters help duisende pasiënte gratis

Kommentaar

Republikein 2025-12-01

Meld asseblief aan om kommentaar te lewer

Elf ekstra dokters help duisende pasiënte gratis

Kommentaar

Republikein 2025-12-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.