O&L-waterstof binnekort ’n werklikheid

Ohlthaver & List (O&L) se filiaal Cleanergy Solutions Namibia verwag om vandeesmaand groen waterstof op Walvisbaai te begin vervaardig.“Produksie sal na verwagting voor die einde van Junie 2025 begin,” het Abigail Raubenheimer, die woordvoerder van Cleanergy, gesê.“Die finale bedrywighede vir die inbedryfstelling van die aanleg is tans aan die gang,” sê sy.Network Media Hub (NMH) wou weet of Cleanergy, die gesamentlike vennootskap tussen O&L en CMB.TECH van België, sy groen waterstof betyds sou kon lewer vir die komende plaaslike toetsfase van die LocoONE-dubbelbrandstoflokomotief.LocoONE word tans deur CMB.TECH in Suid-Afrika ontwikkel nadat die projek se oorspronklike vennoot, TransNamib, verlede jaar aan die HyRail-projek onttrek het.“TransNamib het hom aan die waterstof-dubbelbrandstofprojek onttrek om sy eie omkeerstrategie en die implementering van sy geïntegreerde strategiese sakeplan te prioritiseer,” het Desmond van Jaarsveld, die uitvoerende hoof van TransNamib, verlede maand gesê.Raubenheimer sê Cleanergy bly egter by die projek betrokke. “Ons span in Walvisbaai evalueer tans verskeie opsies om hervullingsbedrywighede te ondersteun, insluitend die gebruik van ’n mobiele hervullingsmasjien in die hawegebied, of die vervoer van die waterstofbergingsmodule vanaf die lokomotief na die Cleanergy-terrein vir hervulling.“Terwyl CMB.TECH die tegniese ontwikkeling van die lokomotief lei, bly die vennootskap met Cleanergy en O&L noodsaaklik om 'n betroubare plaaslike waterstofvoorsieningsketting te verseker,” brei sy uit.CMB.TECH se hoof- tegnologiese beampte, Roy Campe, het bevestig dat werk reeds by Traxtion in Suid-Afrika begin het.“Die waterstofenjin is vir fabriekstoetsing in Junie in België geskeduleer. Ná suksesvolle voltooiing sal die enjin na Traxtion gestuur word vir integrasie in die lokomotief.“Volgens die huidige tydlyn word verwag dat die lokomotief teen die eerste kwartaal van 2026 gereed sal wees om na Namibië te vervoer, waar proeflopies op spoorlyne sal begin,” sê Campe.Volgens Van Jaarsveld is voortgesette onderhandelinge gemik op die besonderhede van die toetsreëlings, die koste van groen waterstof en die spesifieke roete en vragkommoditeit.“Die roete tussen Walvisbaai en Kranzberg word as ’n waarskynlike keuse beskou,” sê Van Jaarsveld.Die splinternuwe enjin is brandstofdoeltreffend en bied uitstekende werkverrigting, selfs wanneer dit slegs op diesel loop, brei Campe uit. Brandstofkoste sal dus in vergelyking met ouer modelle daal, sê hy.“Wanneer dit op waterstof loop, sal dit kweekhuisgasvrystellings beduidend verminder,” sê hy.“Terwyl die eerste lokomotief uitdagings in terme van mededingende pryse kan ondervind, aangesien dit die volle ingenieurs- en ontwikkelingskoste dra en sonder die oorspronklik toegekende subsidies of toelaes ontplooi word, bly die langtermynpotensiaal beduidend,” sê Campe.Volgens CMB.TECH se hoofspooringenieur, Konrad Boshoff, word verwag dat die aanvanklike toetsperiode ses maande sal duur.Een hoofdoel van die projek is om uiteindelik nuwe lewe van tot 25 jaar aan TransNamib se verouderende vloot lokomotiewe met die nuwe enjins te kan gee.“Terwyl TransNamib steeds die verkryging van nuwe lokomotiewe as deel van sy breër strategie nastreef, het die huidige vloot U20C’s, wat lank as die werkperde van Namibië se spoorwegstelsel beskou word, steeds die potensiaal om te lewer, veral teen ’n meer mededingende tarief,” sê hy.TransNamib probeer intussen om sy verkrygingsproses vir nuwe lokomotiewe aan te pas, nadat die minister van werke en vervoer, Veikko Nekundi, vroeg in Mei ’n stokkie voor sy enkelverskafferplan gesteek het om 23 lokomotiewe vir N$1,7 miljard aan te koop.Volgens Van Jaarsveld werk TransNamib saam met leningsinstellings en die sentrale verkrygingsraad om “sy verkrygingstrategie te hersien,” sê hy.TransNamib bly verbind tot die modernisering van die vloot, volgens hom. – augetto@nmh-hub.com.na

O&L-waterstof binnekort ’n werklikheid

Kommentaar

Republikein 2025-09-16

Meld asseblief aan om kommentaar te lewer

O&L-waterstof binnekort ’n werklikheid

Kommentaar

Republikein 2025-09-16

Meld asseblief aan om kommentaar te lewer

MELD AAN

Advertensie