Namcor se geldsake ‘steeds beroerd’

“Ons is nog nie uit gevaar nie.”Só het die tussentydse besturende direkteur van die Nasionale Petroleumkorporasie van Namibië (Namcor), Ebson Uanguta, gister gewaarsku.Uanguta het op die regering se inligtingsentrum-uitsaaiprogram verskyn om groter insig in die stand van sake by dié staatsonderneming te gee.Ondanks die waarborg van N$1,2 miljard wat vroeër vanjaar deur die regering verskaf is, wat kommersiële banke oortuig het om meer geld beskikbaar te stel, staar die maatskappy steeds finansiële risiko in die gesig.Die agterstallige skuld kon egter vereffen word en die oorblywende skuld is geherstruktureer en beter terme vir toekomstige aankope kon onderhandel word.“Ons mag dalk verdere ondersteuning in die toekoms nodig hê. Die transformasie en hervorming sal steeds ondersteuning benodig oor die komende 12 tot 18 maande,” het Uanguta egter gesê.“Die skuld is groot [. . .] ons krediteure was amper gereed om aansoek te doen vir ons likwidasie.”Sedert Uanguta as die adjunk-goewerneur van die Bank of Namibië (BoN) in Januarie vanjaar gesekondeer is om die oliemaatskappy se omkeerplan te behartig, is daar volgens hom vordering gemaak. Hy erken wel dat Namcor se finansies ’n uitdaging bly.Hy meen die huidige finansiële situasie is veroorsaak deur die verval van Namcor se bestuur, ’n gebrek aan doeltreffendheid en die bedryf van dele van die maatskappy in isolasie.“Ons moes die silo’s breek.” Spesifiek was samewerking tussen die stroomaf verkoops- en bemarkingsafdeling, sowel as die logistieke en voorsieningsafdeling van uiterste belang.Hy sê plaaslike verkope moet só verwerk word dat daar genoeg kapasiteit beskikbaar is sodra die produk in Walvisbaai se hawe land.Olie wat op ’n skip moet wag om afgelaai te word, kos honderde Amerikaanse dollars per dag, wat Namcor se wins kan beïnvloed.DOELTREFFENDHEID“Ons werk nou daaraan om proaktief te wees. Doeltreffendheid is deurslaggewend,” benadruk hy. Hy brei uit dat die oliebedryf doeltreffendheid vereis, veral aangesien regulasies oor die prys van brandstof winste beperk.Internasionale oliemaatskappye spog met tegnologie wat hul voorraad 24 uur per dag meet en die vlakke van opgaartenks wêreldwyd onmiddellik kan kommunikeer.Namcor het nie hierdie vlak van ondersteuning nie en vertragings in die deel van inligting het ernstige gevolge, meen Uanguta.“Ons werk nou daaraan om stelsels en prosesse in plek te stel vir onmiddellike toegang tot inligting,” sê hy.Uanguta het ook leiding geneem met die hervorming van Namcor se begrotingsproses en het sowat N$22 miljoen aan onnodige uitgawes vir dié staatsonderneming bespaar.Reis- en verblyfkoste is twee van die uitgawes wat besnoei is. “Om koste te beperk moet ’n mens met beplanning begin. Ons moet probeer om binne ons vermoë te leef. Dissipline begin by die huis,” het hy gesê.Hy verduidelik verder dat die verspreiding van inligting binne die maatskappy ook sal help om onenigheid en spekulasie te verminder.Uanguta loof ook Namcor se werknemers wat al drie tot vier jaar sonder ’n verhoging werk.“Wanneer ons hierdie maatskappy vir die regering en die land bestuur, moet ons dit doen soos ons ons geldsake by die huis bestuur.“Ons finansies by die huis word oordeelkundig hanteer, maar as dit by die regering se sake kom, volg ons ’n laissez faire-benadering en ons doen die minste.“Ons moet wys ons doen dit nie vir onsself nie, maar dat ons die mense verteenwoordig. Ons moet die regte ding doen en verseker dat die mense oor vyf of tien jaar daarby sal baat vind.”Namcor se woordvoerder, Paulo Coelho, het ook gister bevestig dat die proses om ’n nuwe besturende direkteur aan te stel nog nie begin het nie en dat Uanguta na verwagting gedurende die huidige boekjaar sal aanbly.Hy sê vordering word gemaak met betrekking tot die vereffening van skuld en die omkeerplan, hoewel hy nie die jongste skuldsyfers kon deel nie.– augetto@nmh-hub.com.na

Namcor se geldsake ‘steeds beroerd’

Kommentaar

Republikein 2025-12-19

Meld asseblief aan om kommentaar te lewer

Namcor se geldsake ‘steeds beroerd’

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.