Sacky sal hom nie onderwerp aan ’n ‘onregverdige verhoor’

Rita Kakelo



S acky Shanghala, die voormalige ­minis­ter van justisie, het verlede week aan die hoërhof in Windhoek gesê hy sal eerder tallose aansoeke indien as om onderwerp te word aan wat hy as ’n onregverdige verhoor beskryf het.



Hy het volgehou hy sal nie die Teenkorrupsiekommissie van Namibië (ACC) se ondersoek, wat hy as “onregmatig” beskryf, aanvaar nie.



Hy het ferm gesê sy stryd in die hof gaan nie oor vertragings nie, maar om geregtigheid te verseker.



Shanghala, wat sedert 2019 agter tralies is op aanklagte wat verband hou met die Fishrot-skandaal, het beklemtoon sy optrede moet nie gesien word as ’n vertraging van die hofverrigtinge nie.



“Ek sal veg om die saak op te los, ongeag hoe lank dit neem,” het hy gesê en beskuldigings deur die staat van die hand gewys dat sy aansoeke bloot ’n vertragingstaktiek is.



“Ek gee nie om hoeveel aansoeke ek indien nie, ek sal nie gedwing word om met die verhoor voort te gaan nie,” het ­Shanghala gesê.



Hy het bygevoeg: ­“Moe­nie dinge in my keel afdruk nie; ek sal nie die onregmatighede en die manier waarop die ACC ondersoeke gedoen het, aanvaar nie.”



INTERNASIONALE STANDAARDE



Die jongste aansoek, wat deur Shanghala saam met medebeskuldigdes James Hatuikulipi en Pius ­Mwatelulo ingedien is, het betrekking op dokumen­te wat in die Fishrot-saak se ondersoekdagboek vervat is, wat die trio aanvoer onwet­tig deur die staat weerhou is.



Die adjunk- aanklaer-generaal, Ed ­Marondedze, het geantwoord dat die aansoek ongegrond is en van die hand gewys moet word.



“Vir iemand wat spog dat hy ’n voormalige prokureur-generaal is, behoort Shanghala te weet die dokumente wat hy soek is in die ondersoekdagboek vervat en hoef nie openbaar gemaak te word nie,” het Marondedze aan regter Marlize du Plessis gesê.



Daarbenewens het Shanghala ’n ­ouditverslag wat deur Deloitte ­opgestel en aan die aanklaer-generaal voorgelê is, betwis en beweer dat dit nie aan ­internasionale ­ouditstandaarde voldoen nie en die wetlikheid daarvan bevraagteken.



Marondedze het dit beskryf as “skokkend vir ’n voormalige prokureur-generaal om te beweer dat wat gedoen is ­onwettig is” en opgemerk die insameling van inligting is in ­ooreenstemming met internasionale ­konvensies uitgevoer.



Du Plessis het die saak tot 8 September vir uitspraak uitgestel.



Sy het ook die regshulpprokureur Petrus Elago se versoek vir ses maande om verhoor­dokumente in die Fishrot-saak te hersien, van die hand gewys.



Elago, wat ook Ricardo Gustavo ­verteenwoordig, het aangevoer die groot hoeveelheid ­materiaal verg meer tyd van hom om voor te berei. Die regter het hom egter beveel om die saak te ­prioritiseer.



’N PATROON VAN



AANSOEKE



Die jongste aansoek dra by tot ’n reeks vorige aansoeke wat deur Shanghala en sy ­medebeskuldigdes ingedien is.



In Julie het ­Shanghala versoek alle ­uitsprake van die voormalige verhoorregter Moses ­Chinhengo moet nietig verklaar word, met die ­argument dat sy aanstelling ongrond­wetlik was. Die adjunk-regterpresident Hannelie Prinsloo het dié aansoek van die hand gewys.



Chinhengo het ’n maand gelede homself aan die Fishrot-saak onttrek nadat hy om persoonlike redes bedank het, met regterpresident Petrus Damaseb wat amptelik sy bedanking aanvaar het.



Voor dit het die Fishrot-beskuldigdes ook borgtog­aansoeke en ander prosedurele mosies ingedien wat dateer uit hul arrestasies in 2019 – standaard verdedigingstaktieke wat volgens kritici bygedra het tot vertragings om die saak te verhoor.



– [email protected]