Worldskills besoek Namibië
Augetto Graig
Worldskills International, ’n internasionale organisasie wat vaardighede en loopbane bevorder wat nie aan universiteite gevolg kan word nie, se president, mnr. Simon Bartley, was verlede week in Windhoek om bewusmaking te skep vir die eerste nasionale vaardigheidskompetisie wat vanaf 14 tot 17 September by Ramatex beplan word.
Hy het saam met die Afrika-verteenwoordiger, me. Tayla Schou van Suid- Afrika, met verteenwoordigers van die Nasionale Jeugraad (NYC), gelei deur die uitvoerende voorsitter, me. Elsarien Katiti, vergader.
Volgens Bartley het tot 40% van universiteitsgegradueerdes in Brittanje verlede jaar geen werkaanbiedinge gekry nie. Hy sê ouers beïnvloed meer as enige iemand anders kinders se besluite oor wat om te studeer en watter loopbane om te volg, en dat meeste ouers onder die verkeerde indruk verkeer dat slegs universiteitskursusse die moeite werd is om te volg.
“Ek glo met ’n passie dat as jongmense liewer net kan besef dat geen ekonomie net met universiteitsgegradueerdes kan funksioneer nie, en dat hulle ’n goeie bestaan met hul vaardighede kan voer, dit vir almal beter sal wees. Boonop kan jongmense met vaardighede geld verdien terwyl hulle nog verder leer,” sê hy. “Ek kraak universiteite nie af nie, maar die wêreld sou ’n beter plek gewees het as jongmense die waarde van vaardighede beter verstaan het,” sê hy.
Hy het die belang van die vaardigheidskompetisies wat sy organisasies wêreldwyd ondersteun, benadruk en gesê dit bied die jeug die geleentheid om ware kundigheid in aksie te sien. Nog ’n belangrike voordeel van dié tipe kompetisies, wat Namibië vanjaar vir die eerste keer sal aanbied, is die kans wat dit vir onderwysers en kenners gee om met mekaar te gesels.
“Hulle praat daar met kenners van oral in die wêreld oor hul vlakke van kundigheid, en hul maniere van onderwys gee.
“Dit is uiters belangrik omdat dit dan weer plaaslik toegepas kan word. Hierdie kompetisie sal Namibië help ontwikkel en sal meer belegging lok. Dit werk in ander lande,” het Bartley gesê.
Ten opsigte van belegging, sê Bartley: “Ons lewe in ’n globale ekonomie waar geld en idees van een land na die ander met die druk van ’n knoppie verskuif word.
“Een van die groot hulpbronne van ’n land is sy mense; sy werksmag. As ’n groot maatskappy besluit om ’n fabriek iewers op te rig, is dit die aantal mense met vaardighede wat bepaal waar dit gedoen word,” sê hy.
Die Worldskills-vaardigheidskompetisies help om meer mense met vaardighede te kweek. Verlede jaar is die kompetisie in Sao Paulo in Brasilië gehou en Namibië het vir die eerste keer deelgeneem.
Rachel Amutenya, Erkana Imene, Joseph Nakatembe en Fanuel Mathias het Namibië daar tussen 1 300 deelnemers, verteenwoordig. Die deelname het ook vir Worldskills Namibia, wat in 2011 gestig is, amptelik ’n lid van die wêreldorganisasie gemaak.
Aanstaande jaar sal die kompetisie in Abu Dhabi in die Arabiese Emirate plaasvind. Die beste Namibiërs onder die ouderdom van 23 jaar, wat in September geïdentifiseer sal word, sal die land daar verteenwoordig. Dusver is 117 deelnemers deur middel van streekopnames vir September se kompetisie geïdentifiseer.
Volgens Katiti is vaardigheid ontwikkeling ’n prioriteit vir die Jeugraad, en hulle is vasbeslote om die kompetisie en die boodskap daaragter wyd bekend te maak in Namibië.
Die kompetisies beoordeel vaardigheide in motortegnologie, messelwerk, houtwerk, kook, elektriese installasie, skrynwerk, loodgieter en verwarming, verkoeling en lugreëling, muur- en vloerteëls asook sweiswerk.
Worldskills International, ’n internasionale organisasie wat vaardighede en loopbane bevorder wat nie aan universiteite gevolg kan word nie, se president, mnr. Simon Bartley, was verlede week in Windhoek om bewusmaking te skep vir die eerste nasionale vaardigheidskompetisie wat vanaf 14 tot 17 September by Ramatex beplan word.
Hy het saam met die Afrika-verteenwoordiger, me. Tayla Schou van Suid- Afrika, met verteenwoordigers van die Nasionale Jeugraad (NYC), gelei deur die uitvoerende voorsitter, me. Elsarien Katiti, vergader.
Volgens Bartley het tot 40% van universiteitsgegradueerdes in Brittanje verlede jaar geen werkaanbiedinge gekry nie. Hy sê ouers beïnvloed meer as enige iemand anders kinders se besluite oor wat om te studeer en watter loopbane om te volg, en dat meeste ouers onder die verkeerde indruk verkeer dat slegs universiteitskursusse die moeite werd is om te volg.
“Ek glo met ’n passie dat as jongmense liewer net kan besef dat geen ekonomie net met universiteitsgegradueerdes kan funksioneer nie, en dat hulle ’n goeie bestaan met hul vaardighede kan voer, dit vir almal beter sal wees. Boonop kan jongmense met vaardighede geld verdien terwyl hulle nog verder leer,” sê hy. “Ek kraak universiteite nie af nie, maar die wêreld sou ’n beter plek gewees het as jongmense die waarde van vaardighede beter verstaan het,” sê hy.
Hy het die belang van die vaardigheidskompetisies wat sy organisasies wêreldwyd ondersteun, benadruk en gesê dit bied die jeug die geleentheid om ware kundigheid in aksie te sien. Nog ’n belangrike voordeel van dié tipe kompetisies, wat Namibië vanjaar vir die eerste keer sal aanbied, is die kans wat dit vir onderwysers en kenners gee om met mekaar te gesels.
“Hulle praat daar met kenners van oral in die wêreld oor hul vlakke van kundigheid, en hul maniere van onderwys gee.
“Dit is uiters belangrik omdat dit dan weer plaaslik toegepas kan word. Hierdie kompetisie sal Namibië help ontwikkel en sal meer belegging lok. Dit werk in ander lande,” het Bartley gesê.
Ten opsigte van belegging, sê Bartley: “Ons lewe in ’n globale ekonomie waar geld en idees van een land na die ander met die druk van ’n knoppie verskuif word.
“Een van die groot hulpbronne van ’n land is sy mense; sy werksmag. As ’n groot maatskappy besluit om ’n fabriek iewers op te rig, is dit die aantal mense met vaardighede wat bepaal waar dit gedoen word,” sê hy.
Die Worldskills-vaardigheidskompetisies help om meer mense met vaardighede te kweek. Verlede jaar is die kompetisie in Sao Paulo in Brasilië gehou en Namibië het vir die eerste keer deelgeneem.
Rachel Amutenya, Erkana Imene, Joseph Nakatembe en Fanuel Mathias het Namibië daar tussen 1 300 deelnemers, verteenwoordig. Die deelname het ook vir Worldskills Namibia, wat in 2011 gestig is, amptelik ’n lid van die wêreldorganisasie gemaak.
Aanstaande jaar sal die kompetisie in Abu Dhabi in die Arabiese Emirate plaasvind. Die beste Namibiërs onder die ouderdom van 23 jaar, wat in September geïdentifiseer sal word, sal die land daar verteenwoordig. Dusver is 117 deelnemers deur middel van streekopnames vir September se kompetisie geïdentifiseer.
Volgens Katiti is vaardigheid ontwikkeling ’n prioriteit vir die Jeugraad, en hulle is vasbeslote om die kompetisie en die boodskap daaragter wyd bekend te maak in Namibië.
Die kompetisies beoordeel vaardigheide in motortegnologie, messelwerk, houtwerk, kook, elektriese installasie, skrynwerk, loodgieter en verwarming, verkoeling en lugreëling, muur- en vloerteëls asook sweiswerk.
Kommentaar
Republikein
Geen kommentaar is op hierdie artikel gelaat nie