Trump keer nóg ’n Obama-beleid om

Pres. Donald Trump van Amerika se aankondiging op Twitter dat transgender mense nie in enige hoedanigheid in die weermag mag dien nie is nog ’n ommekeer van ’n beleid van sy voorganger Barack Obama ná ’n jarelange stryd teen diskriminasie gegrond op seksuele oriëntasie of geslagsidentiteit in die weermag.

Trump se aankondiging Woensdag op Twitter is teenstrydig met sy beloftes tydens sy verkiesingsveldtog om vir die regte van lesbiërs, gays, biseksuele en transgender mense te baklei.

Menseregtegroepe, Demokrate en ook ’n paar Republikeine het teenoor Trump uitgevaar, terwyl konserwatiewes en sommige binne sy eie party die stap verwelkom het.

Sarah Sanders, Trump se woordvoerder, het daarna gesê daar is nog nie vasgestel of transgender individue wat reeds diens doen uitgegooi gaan word nie.

Trump het volgens sy twiet generale en militêre kenners oor sy besluit geraadpleeg, maar niemand by name genoem nie.

“Ons weermag moet fokus op beslissende en oorweldigende oorwinnings en kan nie belas word met die geweldige mediese koste en ontwrigting wat transgender in die weermag behels nie.”

Trump se aankondiging is Woesdag wyd gekritiseer. Betogers het binne ure die strate ingevaar en in Times Square in New York betoog.

Nancy Pelosi, top-Demokraat in die raad van verteenwoordigers, sê in ’n studie wat die Pentagon aangevra het, is bevind transgenderverwante mediese koste sou slegs ’n honderdste van 1% van die weermag se gesondheidsbegroting uitmaak.

“Pres. Trump het weer gewys sy besluite word deur rou vooroordeel gedryf,” sê Pelosi.

“Ons is in ’n krisis gedompel. Dis ’n donker dag vir almal,” het Brad Hoylman, New York se enigste openlike gay senator, gesê terwyl hy die skare toegespreek het.

Dit is nie die eerste keer wat Trump transgender mense teiken sedert hy in Januarie president geword het nie.

Hy het in Februarie beskerming vir transgender studente omgekeer wat Obama ingestel het om te verseker dat hulle die openbare toilette wat met hul geslagsindentiteit ooreenstem kan gebruik.

Ná Obama se aankondiging in 2016 dat die weermag oopgestel word vir transgender mense sou die weermag hierdie jaar begin het om hulle in te neem.

Daar was verlede jaar reeds sowat 2 500 transgender- aktiewe weermaglede en sowat 1 500 reserviste, volgens ’n studie wat deur RAND Corporation op aanvraag van die Obama-administrasie saamgestel is.

Die Amerikaanse weermag se verbod op gay mense wat diens doen is ook onder Obama se administrasie gestop toe die Kongres in 2011 wetgewing goedgekeur het wat die “moenie vra nie, moenie sê nie” wet omgekeer het, wat gays in die weermag gedwing het om hul seksualiteit geheim te hou.

Die Pentagon het onder Obama toegelaat dat vroue in enige rol tot die weermag kan toetree.

Trump se twiets het selfs die Pentagon onkant betrap.

Vlootkapt. Jeff Davis, Pentagon-woordvoerder, wou nie kommentaar lewer nie.

“Bel die Withuis,” het Davis gesê.

Die Withuis het nie op navrae gereageer nie.

Die Republikeinse sen. John McCain sê Trump se aankondiging is “onvanpas” omdat die Pentagon nog in die proses is om die betrokke kwessie te oorweeg.

Trump se aankondiging kom op die 69ste herdenking van die Demokratiese president Harry Truman se besluit om mense van alle rasse in die weermag toe te laat, jare voor die stryd teen rassisme wat in die 1950’s en 1960’s in die strate gevoer is. – Nampa/Reuters