Nuwe bundel fokus op sprokies oor slim, dapper meisies

Sprokies waarin meisies “dapper of slim goed doen” of “deur die een of ander insig ’n draak, ondier of reus of slegte omstandighede oorwin”, kenmerk die sprokiesbundel Die jongste suster en ander slim meisies.

Die skrywer en joernalis Corlia Fourie het dié bundel saamgestel uit verhale wat voorheen gepubliseer is.

Dit is onlangs deur Fortis Africa Books as e-boek uitgereik. Baie van die verhale is ook reeds voorheen deur Human & Rousseau uitgereik.

Fourie, wat voorheen die kortverhaalbundel Vrou: Mens saamgestel het, stel baie in vroue se lewe belang.

Sy het dikwels in die tydskrif Rooi Rose bydraes gelewer vir die gereelde rubriek “Beeld van ’n vrou”.

“Want selfs in tye dat vroue veronderstel was om net in die huis te werk, was daar vroue wat besonderse goed gedoen het. En ek gebruik meestal vroue as hoofkarakters in my dramas, romans en kortverhale.”

Fourie beskou haarself as ’n feminis, maar sy het niks teen mans nie.

“Ek glo dat vroue regverdig en met respek behandel moet word en gelyke salarisse moet kry (dit wil sê hulle moet menslik behandel word). Maar ek is nie teen mans nie, veral nie teen mans wat gemaklik daarmee is om vroue soos gelykes te behandel nie.”

Die Vrouebevrydingsbeweging het destyds haar aandag getrek.

“Ek het hulle ondersteun wat gelyke salarisse betref – hoewel ek nooit dieselfde salaris as ’n man gekry het nie – maar ek het gedink hulle was ’n bietjie simpel met goed soos om hul bra’s te verbrand en om mans na ander planete te probeer verban.”

Die verhale is voorheen gepubliseer in bundels wat hoofsaaklik op Afrika fokus.

Fourie het nege van dié “vindingryke” meisies bymekaargebring.

“Ek het ook heelwat aan die taal gewerk. Die verhale is geskik om aan kinders (van ses tot tien jaar) voor te lees en ook vir selflees (vir kinders van so agt tot elf).”

• Dit kos £4,99 (sowat N$80). Besoek Fortis Africa Books se Facebook-blad vir meer inligting of amazon.com om die boek te bestel.

- Netwerk24