Januarie moet eis van N$72 miljoen wysig
Twee kriminele sake van aanranding en onwettige inhegtenisneming deur die Namibiese polisie is Woensdag vir uitspraak aangehoor.
Kristien Kruger – Die president van die Namibiese Vervoer- en Taxi-unie (NTTU) se skadevergoedingseis van N$72 miljoen rakende sy beweerde aanranding, dreigemente en onwettige inhegtenisneming deur lede van die polisie, se saak is Woensdag tot 8 Desember uitgestel.
'n Hofbevel is deur regter Esi Schimming-Chase uitgereik wat mnr. Werner Januarie, wat homself in die saak verteenwoordig, beveel om sy eis te wysig.
Januarie is verlede jaar tydens Namibië se Vlak 3 Covid-19-regulasies in hegtenis geneem, omdat hy nie sy masker in die openbaar gedra het nie.
Hy beweer die destydse regulasies het gestipuleer mense sal gewaarsku word as hulle nie die maatreëls nakom nie en sal eers in hegtenis geneem word indien hulle daarna steeds weier.
Volgens Januarie het die polisie hom nie gewaarsku of die geleentheid gegee om sy masker op te sit voordat hulle hom in hegtenis geneem en na die Wanaheda-polisiekantoor geneem het nie.
Hy het ook strafregtelike klagte teen hom waarvoor hy nog in die hof moet verskyn.
Die respondente in die saak is mnr. Frans Kapofi, die voormalige minister van binnelandse sake, immigrasie, veiligheid en sekuriteit; die nasionale polisiehoof, lt.genl. Sebastian Ndeitunga; die aanklaer-generaal, me. Martha Himalwa; die prokureur-generaal, mnr. Festus Mbandeka; en president Hage Geingob.
Januarie eis N$10 miljoen vir die skending van sy menswaardigheid; N$10 miljoen vir die skending van sy menseregte en vryheid; 'n bykomende N$20 miljoen vir emosionele skade en sielkundige lyding wat hy moes verduur; N$5 miljoen vir kwaadwillige inhegtenisneming; N$5 miljoen vir wrede en vernederende behandeling; en laastens N$7 miljoen vir agterstallige inkomste en ontneming van werk.
EIS AFGEWYS
Nog 'n regsgeding teen die ministerie van veiligheid en sekuriteit met betrekking tot 'n beweerde aanranding deur lede van die polisie is Woensdag in die hoërhof in Windhoek afgehandel.
Mnr. Johannes Natangwe het aangevoer twee lede van die Namibiese polisie het hom op 4 Oktober 2019 aangerand. Volgens hom het hulle hom geslaan, geklap, geskop en toe in hegtenis geneem.
Hy het glo beserings aan sy kop, maag en ribbes opgedoen en moes mediese hulp ontvang.
Natangwe het N$100 000 geëis van die ministerie van binnelandse sake, veiligheid en sekuriteit, die Windhoek-stadsraad en die twee betrokke polisiebeamptes wat hom na bewering aangerand het.
Natangwe het beweer sy reg op waardigheid is geskend en dat hy onmenslik en vernederend behandel is. Hiervoor het hy N$50 000 geëis.
Hy het 'n bykomende N$50 000 geëis vir die vernedering, skok, pyn, lyding en sielkundige trauma wat hy ervaar het.
ONTKEN AANRANDING
Die respondente het erken twee lede van die Namibiese polisie het die klaer op 4 Oktober in hegtenis geneem, maar ontken dat hulle hom aangerand het.
Volgens hofstukke het die twee konstabels 'n klag van die Telecom Teleshop in Maerua Mall-inkoopsentrum ontvang dat Natangwe gepoog het om werknemers te beroof.
“Hulle het hul wetlike plig nagekom en het binne die perke van hul werksbeskrywing opgetree,” luidens die hofstukke.
Die respondente het verder gesê die klaer het geen beserings gehad toe hy by die Windhoekse polisieselle opgeneem is nie.
“Toe hy op 5 Oktober vir ondersoek-doeleindes uit die selle geneem en weer teruggebring is, het hy nie enige beserings gehad nie en toe hy op 7 Oktober hof toe vervoer is en weer teruggebring is, het hy ook geen besering gehad nie,” volgens die hofstukke.
Natangwe het getuies geroep om sy saak te ondersteun. Een van die getuies was sy neef.
Regter Orben Sibeya het bevind daar was verskeie teenstrydighede in die getuies se weergawes van die gebeure.
Die regter het die eis van die hand gewys en die saak is van die rol geskrap.– [email protected]
'n Hofbevel is deur regter Esi Schimming-Chase uitgereik wat mnr. Werner Januarie, wat homself in die saak verteenwoordig, beveel om sy eis te wysig.
Januarie is verlede jaar tydens Namibië se Vlak 3 Covid-19-regulasies in hegtenis geneem, omdat hy nie sy masker in die openbaar gedra het nie.
Hy beweer die destydse regulasies het gestipuleer mense sal gewaarsku word as hulle nie die maatreëls nakom nie en sal eers in hegtenis geneem word indien hulle daarna steeds weier.
Volgens Januarie het die polisie hom nie gewaarsku of die geleentheid gegee om sy masker op te sit voordat hulle hom in hegtenis geneem en na die Wanaheda-polisiekantoor geneem het nie.
Hy het ook strafregtelike klagte teen hom waarvoor hy nog in die hof moet verskyn.
Die respondente in die saak is mnr. Frans Kapofi, die voormalige minister van binnelandse sake, immigrasie, veiligheid en sekuriteit; die nasionale polisiehoof, lt.genl. Sebastian Ndeitunga; die aanklaer-generaal, me. Martha Himalwa; die prokureur-generaal, mnr. Festus Mbandeka; en president Hage Geingob.
Januarie eis N$10 miljoen vir die skending van sy menswaardigheid; N$10 miljoen vir die skending van sy menseregte en vryheid; 'n bykomende N$20 miljoen vir emosionele skade en sielkundige lyding wat hy moes verduur; N$5 miljoen vir kwaadwillige inhegtenisneming; N$5 miljoen vir wrede en vernederende behandeling; en laastens N$7 miljoen vir agterstallige inkomste en ontneming van werk.
EIS AFGEWYS
Nog 'n regsgeding teen die ministerie van veiligheid en sekuriteit met betrekking tot 'n beweerde aanranding deur lede van die polisie is Woensdag in die hoërhof in Windhoek afgehandel.
Mnr. Johannes Natangwe het aangevoer twee lede van die Namibiese polisie het hom op 4 Oktober 2019 aangerand. Volgens hom het hulle hom geslaan, geklap, geskop en toe in hegtenis geneem.
Hy het glo beserings aan sy kop, maag en ribbes opgedoen en moes mediese hulp ontvang.
Natangwe het N$100 000 geëis van die ministerie van binnelandse sake, veiligheid en sekuriteit, die Windhoek-stadsraad en die twee betrokke polisiebeamptes wat hom na bewering aangerand het.
Natangwe het beweer sy reg op waardigheid is geskend en dat hy onmenslik en vernederend behandel is. Hiervoor het hy N$50 000 geëis.
Hy het 'n bykomende N$50 000 geëis vir die vernedering, skok, pyn, lyding en sielkundige trauma wat hy ervaar het.
ONTKEN AANRANDING
Die respondente het erken twee lede van die Namibiese polisie het die klaer op 4 Oktober in hegtenis geneem, maar ontken dat hulle hom aangerand het.
Volgens hofstukke het die twee konstabels 'n klag van die Telecom Teleshop in Maerua Mall-inkoopsentrum ontvang dat Natangwe gepoog het om werknemers te beroof.
“Hulle het hul wetlike plig nagekom en het binne die perke van hul werksbeskrywing opgetree,” luidens die hofstukke.
Die respondente het verder gesê die klaer het geen beserings gehad toe hy by die Windhoekse polisieselle opgeneem is nie.
“Toe hy op 5 Oktober vir ondersoek-doeleindes uit die selle geneem en weer teruggebring is, het hy nie enige beserings gehad nie en toe hy op 7 Oktober hof toe vervoer is en weer teruggebring is, het hy ook geen besering gehad nie,” volgens die hofstukke.
Natangwe het getuies geroep om sy saak te ondersteun. Een van die getuies was sy neef.
Regter Orben Sibeya het bevind daar was verskeie teenstrydighede in die getuies se weergawes van die gebeure.
Die regter het die eis van die hand gewys en die saak is van die rol geskrap.– [email protected]
Kommentaar
Republikein
Geen kommentaar is op hierdie artikel gelaat nie