‘Gordhangate’: Rand in vryval
‘Mark uiters senuagtig’
Hanlie Stadler - Groot petrolprysstygings oor die volgende paar maande, hoër inflasie – en hoër rentekoerse.
Dít is verbruikers in Suid-Afrika se voorland weens die oënskynlik siniese politieke magspel wat die rand sedert Dinsdagaand weer in vryval het, sê die ekonoom dr. Cees Bruggemans.
Bruggemans sê dis ironies dat dit juis die stedelike middelklas – grootliks mense wat vir die ANC se opposisie gestem het – wat “gestraf” gaan word deur die ekonomiese uitval van “Gordhangate”.
Die rand het gisteroggend sy vryval voortgesit nadat die hernude aanslag op Pravin Gordhan, minister van finansies, Dinsdagnamiddag rugbaar geword het.
“Gordhangate” het reeds 68c van die rand se waarde teenoor die Amerikaanse dollar weggevreet, in vergelyking met die meer as 80c wat Nenegate in Desember die rand gekos het toe pres. Jacob Zuma twee ministers van finansies in vier dae afgedank het.
Teen 09:30 gister (Suid-Afrikaanse tyd) het die geldeenheid reeds R14,17 teenoor die dollar getref en gelyk asof dit verder gaan verswak nadat dit Dinsdagaand in New York vir die eerste keer in meer as ’n maand (sedert 27 Julie) net-net bo R14 per dollar gesluit.
Teenoor die pond het die rand skuins voor 09:30 tot selfs R18,65 verswak nadat dit Dinsdagaand in New York vir die eerste keer sedert 3 Augustus bo R18 gesluit het.
’n Euro het tot R16 versterk (afgerond, oftewel R15,9952) nadat die rand Dinsdag vir die eerste keer sedert 2 Augustus in New York swakker as R15 gesluit het.
Volgens Wichard Cilliers, verhandelingshoof van TreasuryOne, is die mark uiters senuagtig oor gerugte dat pres. Jacob Zuma binnekort die kabinet gaan skommel, berig Bloomberg.
“Gordhan is ’n doring in sy vlees, ek dink hy gaan op enige manier moontlik van hom ontslae probeer raak.”
Zuma en Gordhan het al vasgesit oor die bestuur van die Suid-Afrikaanse Lugdiens, waar ’n Zuma-ondersteuner, Dudu Myeni, die voorsitter is, en oor Gordhan se beweerde eis dat Tom Moyane, die Suid-Afrikaanse Inkomstediens se hoof, afgedank moet word.
Brusselse spruitjies en afval
Andre Botha, valutahandelaar by TreasuryOne, sê die verwikkelinge bring ’n einde aan die veilige band waarin die rand nou reeds geruime tyd verhandel.
“Dit lyk asof ons in Suid-Afrika net ’n klein porsie poeding kan eet voordat ’n hele bord Brusselse spruitjies en afval weer aan ons opgedwing word.”
Botha sê die volledige prentjie moet nog na vore kom. Indien Gordhan in hegtenis geneem word, sal die rand beslis skerp verswak.
“Die ander kant van die munt is egter ook waar. As hierdie bloot ’n oordeelsfout was, kan ons verwag dat die rand van sy verliese herwin.”
Die tydsberekening van die aanslag – net ná die verkiesing – is egter verdag. Die verswakking van die rand weens plaaslike politiek kan nie op ’n slegter tyd kom nie, aangesien die wêreld reeds op hete kole sit.
Dr. Janet Yellen, voorsitter van die VSA se Federale Reserweraad (Fed), lewer môreaand ’n toespraak by ’n konferensie oor monetêre beleid in Jackson Hole, Wyoming, wat ’n aanduiding kan gee van hoe gou die Fed rentekoerse gaan verhoog.
Enige teken dat valke die Fed-duiwehok binnegekom het, sal die rand onvermydelik laat verswak soos wat groot beleggers geld aan ontluikende markte onttrek.
ANC-leierstryd
Bruggemans sê die aanslag op Gordhan is niks anders nie as die mobilisering van ANC-lede in aanloop tot die leierskapstryd in 2017. Gordhan word beskou as die waghond oor staatsinstellings teen nepotisme.
“As dié sweem van politieke kaskenades wen, broodnodige hervorming van staatsondernemings in gevaar stel en fiskale dissipline nie volgehou word nie, sal vertroue aanhou ly, groei sal weer in duie stort en die kredietgraderingsagentskappe sal vroeër eerder as later dié werklikhede in ons kredietrisiko weerspieël.” As Suid-Afrika tot rommelstatus afgegradeer word, sal die rand selfs verder verswak, inflasie sal styg en die Reserwebank sal dit sterk oorweeg om rentekoerse te verhoog, sê Bruggemans. Algehele groei sal ook ly.
Rentekoersbesluit
Bruggemans sê Suid-Afrikaners is veels te optimisties dat die einde van die rentekoers-stygsiklus reeds bereik is.
Lesetja Kganyago, president van die Reserwebank, het voorverlede week in Pretoria gesê die onlangse sterkte in die rand bied wel ’n kussing vir die land se beleidmakers, maar moenie lei tot oorgerustheid in die stryd teen inflasie nie.
“Die risiko’s vir die inflasie-vooruitsigte het te doen met moontlike toekomstige swakheid in die geldeenheid. Die feit dat die rand versterk het, het nie daardie risiko weggeneem nie; dit gee ons net ’n kussing vir ’n tydperk, maar ons weet nie vir hoe lank nie.”
’n Groot deel van dié kussing is nou weggeneem. Die Reserwebank besluit weer op 22 September oor die rentekoers.
Francois Groepe, een van die adjunkpresidente van die Reserwebank, het ook onlangs gesê: “Strenger monetêre beleid (dus hoër rentekoerse) kan ’n negatiewe impak op die reeds pap ekonomie hê, maar as die Reserwebank nie optree nie, kan inflasieverwagtinge ontspoor en uiteindelik inflasieteikens ondermyn. Dis ’n moeilike balanseertoertjie.”
Die Reserwebank het die rentekoers sedert Januarie 2014 geleidelik met altesame 2 persentasiepunte verhoog.
- Netwerk24
Dít is verbruikers in Suid-Afrika se voorland weens die oënskynlik siniese politieke magspel wat die rand sedert Dinsdagaand weer in vryval het, sê die ekonoom dr. Cees Bruggemans.
Bruggemans sê dis ironies dat dit juis die stedelike middelklas – grootliks mense wat vir die ANC se opposisie gestem het – wat “gestraf” gaan word deur die ekonomiese uitval van “Gordhangate”.
Die rand het gisteroggend sy vryval voortgesit nadat die hernude aanslag op Pravin Gordhan, minister van finansies, Dinsdagnamiddag rugbaar geword het.
“Gordhangate” het reeds 68c van die rand se waarde teenoor die Amerikaanse dollar weggevreet, in vergelyking met die meer as 80c wat Nenegate in Desember die rand gekos het toe pres. Jacob Zuma twee ministers van finansies in vier dae afgedank het.
Teen 09:30 gister (Suid-Afrikaanse tyd) het die geldeenheid reeds R14,17 teenoor die dollar getref en gelyk asof dit verder gaan verswak nadat dit Dinsdagaand in New York vir die eerste keer in meer as ’n maand (sedert 27 Julie) net-net bo R14 per dollar gesluit.
Teenoor die pond het die rand skuins voor 09:30 tot selfs R18,65 verswak nadat dit Dinsdagaand in New York vir die eerste keer sedert 3 Augustus bo R18 gesluit het.
’n Euro het tot R16 versterk (afgerond, oftewel R15,9952) nadat die rand Dinsdag vir die eerste keer sedert 2 Augustus in New York swakker as R15 gesluit het.
Volgens Wichard Cilliers, verhandelingshoof van TreasuryOne, is die mark uiters senuagtig oor gerugte dat pres. Jacob Zuma binnekort die kabinet gaan skommel, berig Bloomberg.
“Gordhan is ’n doring in sy vlees, ek dink hy gaan op enige manier moontlik van hom ontslae probeer raak.”
Zuma en Gordhan het al vasgesit oor die bestuur van die Suid-Afrikaanse Lugdiens, waar ’n Zuma-ondersteuner, Dudu Myeni, die voorsitter is, en oor Gordhan se beweerde eis dat Tom Moyane, die Suid-Afrikaanse Inkomstediens se hoof, afgedank moet word.
Brusselse spruitjies en afval
Andre Botha, valutahandelaar by TreasuryOne, sê die verwikkelinge bring ’n einde aan die veilige band waarin die rand nou reeds geruime tyd verhandel.
“Dit lyk asof ons in Suid-Afrika net ’n klein porsie poeding kan eet voordat ’n hele bord Brusselse spruitjies en afval weer aan ons opgedwing word.”
Botha sê die volledige prentjie moet nog na vore kom. Indien Gordhan in hegtenis geneem word, sal die rand beslis skerp verswak.
“Die ander kant van die munt is egter ook waar. As hierdie bloot ’n oordeelsfout was, kan ons verwag dat die rand van sy verliese herwin.”
Die tydsberekening van die aanslag – net ná die verkiesing – is egter verdag. Die verswakking van die rand weens plaaslike politiek kan nie op ’n slegter tyd kom nie, aangesien die wêreld reeds op hete kole sit.
Dr. Janet Yellen, voorsitter van die VSA se Federale Reserweraad (Fed), lewer môreaand ’n toespraak by ’n konferensie oor monetêre beleid in Jackson Hole, Wyoming, wat ’n aanduiding kan gee van hoe gou die Fed rentekoerse gaan verhoog.
Enige teken dat valke die Fed-duiwehok binnegekom het, sal die rand onvermydelik laat verswak soos wat groot beleggers geld aan ontluikende markte onttrek.
ANC-leierstryd
Bruggemans sê die aanslag op Gordhan is niks anders nie as die mobilisering van ANC-lede in aanloop tot die leierskapstryd in 2017. Gordhan word beskou as die waghond oor staatsinstellings teen nepotisme.
“As dié sweem van politieke kaskenades wen, broodnodige hervorming van staatsondernemings in gevaar stel en fiskale dissipline nie volgehou word nie, sal vertroue aanhou ly, groei sal weer in duie stort en die kredietgraderingsagentskappe sal vroeër eerder as later dié werklikhede in ons kredietrisiko weerspieël.” As Suid-Afrika tot rommelstatus afgegradeer word, sal die rand selfs verder verswak, inflasie sal styg en die Reserwebank sal dit sterk oorweeg om rentekoerse te verhoog, sê Bruggemans. Algehele groei sal ook ly.
Rentekoersbesluit
Bruggemans sê Suid-Afrikaners is veels te optimisties dat die einde van die rentekoers-stygsiklus reeds bereik is.
Lesetja Kganyago, president van die Reserwebank, het voorverlede week in Pretoria gesê die onlangse sterkte in die rand bied wel ’n kussing vir die land se beleidmakers, maar moenie lei tot oorgerustheid in die stryd teen inflasie nie.
“Die risiko’s vir die inflasie-vooruitsigte het te doen met moontlike toekomstige swakheid in die geldeenheid. Die feit dat die rand versterk het, het nie daardie risiko weggeneem nie; dit gee ons net ’n kussing vir ’n tydperk, maar ons weet nie vir hoe lank nie.”
’n Groot deel van dié kussing is nou weggeneem. Die Reserwebank besluit weer op 22 September oor die rentekoers.
Francois Groepe, een van die adjunkpresidente van die Reserwebank, het ook onlangs gesê: “Strenger monetêre beleid (dus hoër rentekoerse) kan ’n negatiewe impak op die reeds pap ekonomie hê, maar as die Reserwebank nie optree nie, kan inflasieverwagtinge ontspoor en uiteindelik inflasieteikens ondermyn. Dis ’n moeilike balanseertoertjie.”
Die Reserwebank het die rentekoers sedert Januarie 2014 geleidelik met altesame 2 persentasiepunte verhoog.
- Netwerk24
Kommentaar
Republikein
Geen kommentaar is op hierdie artikel gelaat nie