EBank tevrede met eerste jaar se syfers

Jo-Maré Duddy - Moenie jou blind staar teen die syfers in die boeke nie. Dít was die boodskap van Mike Mukete, uitvoerende hoof van EBank Limited, toe hy gister dié instelling se finansiële resultate vrygestel het. Dit toon die bank se totale omvattende verlies vir 2016 beloop sowat N$25,27 miljoen.
“Die syfers stem ooreen met ons begrotingsverwagtinge en weerspieël hoofsaaklik die geprojekteerde koste om bankinfrastruktuur te vestig,” het Mukete gesê.
EBank het, as deel van sy lewensvatbaarheidstudie vóór die totstandkoming van die bank, ’n sakeplan ontwikkel,wat oor tien jaar strek. Die bank se vertoning is op koers om aan dié plan te voldoen, sê EBank. Die bank se bedryfsverlies vir 2016 is effe minder as wat volgens die sakeplan verwag is.
“Wat belangrik is, is dat die bank oor voldoende kapitaalreserwes beskik om aanvanklike bedryfsverliese te dek en dat die bank nie onnodige risiko neem nie,” lui die verklaring oor EBank se resultate wat gesamentlik deur Monica Kalondo, voorsitter van die bank, en Mukete uitgereik is.
Die bank se verhouding vir ekwiteitskapitaal is 23%, beduidend meer as die vereiste minimum van 6%. Vlak 1-risikogebaseerde kapitaal is 43% vergeleke met die minimumvereiste van 7%. EBank se verhouding vir totale risikogebaseerde kapitaal is 43%, ver bo die vereiste minimum van 10%.
EBank se opgelope verlies van 1 November 2014, toe die bank amptelik van stapel gestuur is, tot einde Maart vanjaar is meer as N$42,9 miljoen.
Hoewel EBank vergelykende syfers vir sy 2015-boekjaar gepubliseer het, moet in ag geneem word dat dié bedrae net vyf maande se besigheid weerspieël. Die bank doen nog net vir 17 maande sake.

Bedryfsvertoning
Die bank het “sterk bedryfsgroei” in die jaar onder oorsig getoon, sê Mukete. Die depositoboek van kliënte op 31 Maart vanjaar was sowat N$246,6 miljoen, terwyl meer as N$51,9 miljoen se lenings aan kliënte toegestaan is. Vir die 2015-boekjaar was dié syfers bykans N$17,3 miljoen en nul onderskeidelik.
EBank het in sy 2016-boekjaar bykans N$6,3 miljoen uit rente verdien vergeleke met N$843 897 die vorige jaar. Rente-uitgawes was sowat N$2,97 miljoen, wat vir ’n netto rente-inkomste­ van bykans N$3,3 miljoen gesorg het. Vir 2015 was dié syfer N$699 456. Nie-renteverdienste vir 2016 was sowat N$14,8 miljoen teenoor N$140 061 die vorige jaar.
Volgens Mukete het EBank se maandelikse transaksievolumes met 212% in die jaar onder oorsig toegeneem. Hy skryf dié ­verhoging toe aan debietkaarte wat in September verlede jaar bekend gestel is, asook die verhandeling in buitelandse valuta sedert verlede Junie. Die waarde van tran­saksies het ­gevolglik met 461% gestyg, sê hy.
Geaktiveerde rekeninge van
kliënte teen die algelope jaareinde was net minder as 50 000, ’n styging van 113%.
Die groot toename in kliëntegetalle, transaksievolumes en ­transaksiewaardes is ’n bewys dat kliënte die EBank-handelsmerk aanvaar en dié instelling as ’n ernstige speler in plaaslike finansiële sektor beskou, sê Gerald Riedel, finansiële hoof en uitvoerende direkteur van die bank.
EBank se totale inkomste vir sy 2016-boekjaar was sowat N$17,6 miljoen vergeleke met N$839 517 die vorige een. Bedryfsuitgawes het met sowat 71% gestyg en het na­genoeg N$42,6 miljoen beloop.
Die bank se bates op 31 Maart vanjaar was sowat N$327,9 miljoen. Op 31 Maart 2015 was dit ongeveer N$49,3 miljoen.
Mukete sê EBank is steeds in die ­implementeringsfase van sy besigheid en dit sal voortgaan om in tegnologie, mense en sy “unieke” verspreidingsnetwerk te belê om “maklike, veilige en slim” produkte te voorsien.
“Ons sal voortgaan om in ooreenstemming met ons toekomstige groei-ambisies te ontwikkel en te innoveer,” sê hy.