Dienda vra veldtog oor intellektuele eiendom

Estelle de Bruyn - Die meeste Namibiërs weet nie wat intellektuele eiendom is nie en om die rede moet die nuwe voorgestelde owerheid vir sake- en intellektuele eiendom (Bipa) 'n inligtingsveldtog van stapel stuur sodat mense bewus gemaak kan word van hul regte.
So sê me. Elma Dienda van die DTA, wat Donderdag aan die debat oor die wetsontwerp op sake- en intellektuele eiendom deelgeneem het.
" Mense weet nie dat wanneer hulle tradisionele musiek maak of skilder dit intellektuele eiendom is nie en dat hulle dit moet registreer ten einde te verseker dit bly in hulle besit. Te veel van ons plaaslike kunstenaars is nie in staat om 'n behoorlike bestaan te voer nie omdat hul musiek onwettig by taxi-staanplekke verkoop word," het Dienda gesê.
Sy sê dit is ook die geval waar mense sakeplanne ontwikkel ten einde finansiering van banke en ander instansies te verkry. Hulle besef nie dat hul planne intellektuele eiendom is en geregistreer moet word om beskerm te word nie. " Dikwels gebeur dit dat hul aansoeke vir finansiering van die hand gewys word en op 'n dag sien hulle iemand anders het die einste onderneming begin wat hulle in hul sakeplan voorgestel het. Ons burgers moet opgevoed en ingelig word," het Dienda gesê.
Om hierdie rede stel sy voor dat die wetstontwerp vir die totstandkoming van die owerheid gewysig moet word om opvoedkundige veldtogte verpligtend te maak.
Dienda het egter haar kommer uitgespreek oor die feit dat al hoe meer staatsondernemings tot stand gebring word.
Sy het daarop gewys dat die funksies van drie staatsdirektorate bloot nou onder een sambreel geplaas word.
Die funksie om sakeondernemings te registreer en industriële eiendomsregte word weggeneem by die ministerie van nywerheidsontwikkeling, handel en SME-ontwikkling terwyl die registrasie van kopiereg weggeneem word by die ministerie van inligting en kommunikasietegnologie.
" In die motivering van die wetsontwerp is gesê Bipa sal saamgestel word uit bestaande personeel van die direktorate. Die vraag wat ontstaan, is hoe die kombinering van funksies in een agentskap en met dieselfde personeel van dieselfde direktorate die oorhoofse doeltreffendheid van sake en industriële eiendomsregistrasie verbeter? Om twee swak bestuurde maatskappye in een saam te smelt, sal nie outomaties daartoe lei dat die nuutgevormde een meer doeltreffend sal wees nie,” het Dienda gesê.
Sy het ook die hoop uitgespreek dat Bipa weg van handgeskrewe data na ‘n doeltreffend gerekenariseerde data-stelsel sal beweeg, omdat leêrs en inligting dikwels by die registrateur van maatskappye wegraak.
Sy het ook daarop gewys dat Bipa reeds bestaan en aan die werk is. “Gevolglik is die wetsontwerp net na die NV gebring met die doel om die bestaan daarvan te wettig. Wat is die redes vir die skepping van ‘n nuwe instansie in Bipa? Moes die funksies onder die een direktoraat onder die ministerie van nywerheidsbevordering, handel en SME-ontwikkeling nie net na die ander verskuif het nie?” wou Dienda weet.