Kanker gebruik 'om mense in te loop'

Die Kankervereniging van Namibië (CAN) en sy uitvoerende hoof Rolf Hansen het hul prokureur genader om klagtes te formuleer teen ’n vrou van Tsumeb wat die vereniging en hom op sosiale media beswadder het en glo reeds vir meer as vier jaar kanker gebruik om mense in die dorp en omgewing in te loop.

Die gewraakte plasing van Brenda Beukes het beweer sy is in Huis Acacia in Windhoek vir kankerbehandeling waar sy glo net so deur Hansen gelos is en nie kos het nie. Sy het gevra dat mense dringend vir haar geld vir kos stuur. Volgens Hansen is die saak aan CAN se prokureurs oorhandig en is hy reeds geruime tyd bewus van Beukes wat voorgee sy het kanker om geld te kry. Sy sou al van brein- tot rug- tot beenmurgkanker hê en wat verskeie behandelings en oorplantings volgens haar vereis.

“Sy gebruik kanker om mense in te loop. Mense se harte is so goed en hulle glo dit. Mense is al met derduisende ingeloop met vervalste apteek- en doktersbriewe en voorskrifte,” sê Hansen wat verduidelik dit was egter die eerste keer wat sy direk CAN en sy naam by haar bewerings betrek het.

Hy het beklemtoon daar is nêrens enige bewys dat sy as ’n kankerpasiënt in Namibië geregistreer of ooit in Huis Acacia opgeneem is nie.

’n Sakevrou op Tsumeb wat vir byna drie dekades deur haar ma en ouma by CAN betrokke is en Brenda sedert haar tienerjare ken, sê ook sy is genader om te help. Volgens haar was die vereniging bereid om haar te help met van vervoer tot verblyf toe hulle bewus word van haar ‘siekte’ en dat sy volgens haar geen hulp by CAN kry nie ten spyte van die feit dat sy ’n kankerpasiënt is.

“CAN wíl help en rég help. Daar is ’n registrasieproses en prosedure en verskeie vorms wat jy moet voltooi en inhandig. Dit sluit in ’n doktersbrief en balansstate om vir finansiële hulp te kwalifiseer. Ek sou alles vir haar regkry, die vorms vir haar stuur en dan hoor ek net nie weer van haar nie. Ons het soveel tyd en moeite spandeer en dit was alles ’n leuen,” het sy gesê.

Volgens haar het Brenda op ’n stadium ook geld gevra vir groente en vrugte om vir haar sap te maak.

“Sy het gesê sy is verskriklik siek en sy wil vir haar beetsap maak. Ek het gesê ek sal alles koop en versap, sy moet net vir my houers bring wat sy kan vries. Ek het nie weer van gehoor nie.” Die sakevrou sê ’n besigheid waarvoor Brenda op die dorp vir ’n wyle gewerk het, het vroeër vanjaar na haar gesoek omdat hul skootrekenaar saam met Brenda verdwyn het. Na bewering het sy ook aan kliënte gesê die besigheid se rekeningnommer het verander en dan haar eie rekeningnommer vir inbetalings verskaf. Nog ’n besigheid op die dorp het aangebied om haar te help met ’n rekening by ’n plaaslike apteek waar sy medikasie kon koop en hulle dit sou betaal.

“Sy het niks gekoop nie, sy soek die kontant.” Volgens die sakevrou is Brenda se suster aan kanker oorlede.

“Dalk het hulle gesien hoe maklik is dit om geld te kry as jy sê jy het kanker.”

Brenda het ook glo ’n eposadres van die gerekende Namibiese dr. Anelle Zietsman vervals met verslae wat laasgenoemde na bewering oor haar kankerdiagnose sou skryf. In nog ’n vervalsing van ’n ‘dokter’ is ’n rekening van N$1 800 uitgereik op 1 Februarie vir die “konsultasie en verwydering van gewasse van die regter-frontale lob van die brein”.

Nog ’n bron wat ook om die bos gelei is en Brenda finansieel ondersteun het, beweer Brenda se ma Magda is bewus van die bedrog en “weet presies wat aangaan”.

“Ek vermoed sy (Brenda) gebruik dwelmmiddels en sy lei haar ma om die bos. Sy was al ‘terminaal’ aan lewerkanker en toe het sy weer velkanker op haar rug. Haar ma se huis is glo kaal soos sy goed moet verkoop vir geld,” het hy gesê.

Volgens hom is Brenda iemand wat verlore is en hulp moet kry.

“Ek vermoed dis ‘hard core’ dwelms. ’n Mens moet vir hulle bid.”

In ’n stemboodskap het ’n dokter van die dorp gesê hy is bewus daarvan dat Brenda sy naam gebruik om geld en skenkings te vra “en selfs sover gaan om te sê dit is om my te betaal. Sy was by my en ek het haar reguit gevra of sy kanker het. Op 13 Maart het sy vir my baie duidelik vertel dat sy nie kanker het nie,” aldus die stempos.

Intussen het Brenda in ’n plasing op Facebook die publiek en God om vergifnis gevra.

“Hiermee vra, vra ek, Brenda Beukes, hartlik onverskoning aan die publiek van Namibia, onverskoning en vergifnis oor enige en alle opmerkings, aantuigings en naam gebruik van CAN en persone betrokke met CAN. Ek erken my skuld en sondes en hiermee vra ek vergifnis teen God en die publiek van Namibia om hulp te kan gee om my te help met my sigopatiese persoonlikheid,” lei die plasing. – [email protected]