Fishrot-vissers met kwotas gepaai

’n Kwota van 1 500 metrieke ton stokvis sal onmiddellik toegeken word, waarvan 1 100 metrieke ton reeds gister vrygestel sou word.

So het die waarnemende uitvoerende direkteur van visserye en mariene hulpbronne, Ueritjiua Kauaria, gister gesê.

Hy sê die minister is daartoe verbind om uitstaande skuld te betaal en dat die betrokke werknemers binne weke werkskontrakte kan verwag.

Dit volg ná werklose vissermanne en -vroue, die slagoffers van die Fishrot-skandaal en die voortdurende regsproses, na die hoofstad gekom het om ’n optog na die hoofkantoor van die ministerie van visserye en mariene hulpbronne te hou om oor werk te betoog.

Die voormalige werknemers van ArcticNam Ltd. op Samherji se vaartuie – Saga Seafood, Geysir en Heinaste – is sedert 2018 werkloos asook 73 voormalige werknemers van Namsov.

Samherji is die Yslandse vismaatskappy wat by die korrupsieskandaal, wat twee voormalige ministers agter tralies laat beland het, betrek word.

Ondanks ’n ooreenkoms vanaf einde 2020 dat die regering viskwotas sal toeken in ruil vir werk, kry die betrokke vissermanne slegs ’n maandelikse toelaag van N$4 000.

Die Namibiese Unie vir See- en Verwante Werkers (Nasawu) het saam met die Vakbondkongres van Namibië (Tucna) die ontevrede oudwerknemers van die kus af gebring om antwoorde te probeer kry.

Hulle is ontevrede oor die manier waarop die minister werkgeleenthede deur Shore Recruit plaas.

“Wat ons hartseer maak, is dat al die ander werkers wat deur Shore Recruit geplaas is, voltyds in diens geneem is, tog het ons geen werkskontrak nie en daar is geen teken dat ons voltydse in diens geneem sal word nie,” het Wendy Shikukwete namens haar medewerkers uit die klagskrif gelees.

Luidens die klagskrif skuld die regering reeds N$13 miljoen vir die onderhoud van die werknemers en dit is glo hoekom Shore Recruit sê die werknemers kan nie aangestel word nie.

Verder wil die vissermanne weet hoe groot die kwotas is wat volgens die ooreenkoms verskuldig is, wat die toepaslike voorwaardes is, en wat die regering se ooreenkoms met Shore Recruit behels. Vakbondamptenare moet ingelig word, het hulle aangevoer.

Tucna se president, Paulus Hango, is egter nog ontevrede, veral omdat so baie besonderhede nog onduidelik is.

Volgens hom is dit Overberg Fishing van Walvisbaai wat die betrokke vissermanne die afgelope jare finansieel onderhou het, en die stokviskwota van 1 100 ton is waarskynlik gister aan dié maatskappy toegeken.

Hango sê Overberg het reeds ten volle bemande visfabriekskepe en dit lyk nie of hulle werksgeleenthede sal kan bied nie.

Volgens hom het Shore Recruit ook nie skepe of viskwotas waarmee hy die 138 nodige werksgeleenthede direk sou kon bied nie.

“Shore Recruit is meer administratief, so hulle kan moontlik die werknemers by een of twee ander maatskappye plaas. Daarvoor bly die 400 metrieke ton nog oor.

“Maar ons het nie behoorlike inligting nie. Ons weet nie hoeveel kwotas reeds belowe is nie, ons het geen werkskontrakte gesien nie, of hoe die regering met Shore Recruit ooreengekom het nie, alles word van ons weerhou. Wat is fout dat ons geen inligting kry nie?” vra hy. – [email protected]