Namibië (weer) die vryste pers in Afrika
Namibië beklee weer eens die eerste plek op Afrika se persvryheidsranglys en is die twee-en-twintigste uit 180 lande op die Wêreldpersvryheidsindeks - beter as eerstewêreldlande soos die Verenigde Koninkryk (VK), Frankryk en België. Suid-Afrika val net onder Namibië, gevolg deur Seychelle, wat in 2022 as die land met die vryste pers in Afrika aangewys is.
Dié nuus is Woensdagoggend, op Wêreldpersvryheidsdag, deur die ministerie van inligting en kommunikasietegnologie (ICT) bekend gemaak. Die Namibiese presidentskantoor het later in ’n mediavrystelling gesê die media is integraal tot demokrasie en speel ’n belangrike rol om die publiek ingelig te hou en regeringsinstansies aanspreeklik te hou. Verder is die pers ’n belangrike pilaar van doeltreffende regeringsbestuur, volgens die presidentskantoor.
“President [Hage] Geingob sal persvryheid waarborg solank hy die president van hierdie land is. Dit bewys dat Namibië se sterk persvryheid 'n funksie is van president Geingob en die regering wat hy lei se verbintenis daartoe om die waardes van die Namibiese Grondwet te handhaaf,” lui die mediaverklaring.
Die Wêreldpersvryheidsindeks evalueer die omstandighede waarin joernaliste in die 180 betrokke lande werk en word jaarliks op Wêreldpersvryheidsdag op 3 Mei gepubliseer. Vanjaar is bevind dat die situasie “baie ernstig” is in 31 lande, “moeilik” in 42 lande, “problematies” in 55 lande, en “goed” of “voldoende” in 52 lande. “Met ander woorde, die omstandighede vir joernaliste is ‘sleg’ in sewe uit tien lande en ‘voldoende’ in net drie uit tien,” lui die verklaring wat saam met die indeks uitgereik is.
Die Namibiese veteraanjoernalis Gwen Lister het haar vreugde oor Namibië se topposisie in Afrika uitgespreek, maar waarsku: “Persvryheid is ’n voortdurende stryd waarin oorwinning nooit ten volle behaal word nie en daar is talle uitdagings - hier en veral verder weg.”
Intussen het die vakbond vir Namibiese professionele media (Nampu) gesê mediapraktisyns in Namibië staar steeds beduidende uitdagings in hul daaglikse werk in die gesig.
“Die mediabedryf in Namibië word gekenmerk deur ongunstige werksomstandighede, insluitend lae vergoeding, gebrek aan werksekuriteit, en beperkte toegang tot opleiding en professionele ontwikkelingsgeleenthede,” sê Nampu se sekretaris-generaal, Sakeus Iikela. Volgens hom sloer die arbeidskommissaris met die registrasie van die vakbond wat in 2020 op die been gebring is. Hy vra ook vir die spoedige toepassing van Namibië se nuwe wetgewing op toegang tot inligting en sê Nampu staan saam met joernaliste op die vasteland en wêreldwyd wat aanhou werk onder bedreigende omstandighede en “hul lewens in gevaar stel om oor die waarheid verslag te doen”.
[email protected]
Dié nuus is Woensdagoggend, op Wêreldpersvryheidsdag, deur die ministerie van inligting en kommunikasietegnologie (ICT) bekend gemaak. Die Namibiese presidentskantoor het later in ’n mediavrystelling gesê die media is integraal tot demokrasie en speel ’n belangrike rol om die publiek ingelig te hou en regeringsinstansies aanspreeklik te hou. Verder is die pers ’n belangrike pilaar van doeltreffende regeringsbestuur, volgens die presidentskantoor.
“President [Hage] Geingob sal persvryheid waarborg solank hy die president van hierdie land is. Dit bewys dat Namibië se sterk persvryheid 'n funksie is van president Geingob en die regering wat hy lei se verbintenis daartoe om die waardes van die Namibiese Grondwet te handhaaf,” lui die mediaverklaring.
Die Wêreldpersvryheidsindeks evalueer die omstandighede waarin joernaliste in die 180 betrokke lande werk en word jaarliks op Wêreldpersvryheidsdag op 3 Mei gepubliseer. Vanjaar is bevind dat die situasie “baie ernstig” is in 31 lande, “moeilik” in 42 lande, “problematies” in 55 lande, en “goed” of “voldoende” in 52 lande. “Met ander woorde, die omstandighede vir joernaliste is ‘sleg’ in sewe uit tien lande en ‘voldoende’ in net drie uit tien,” lui die verklaring wat saam met die indeks uitgereik is.
Die Namibiese veteraanjoernalis Gwen Lister het haar vreugde oor Namibië se topposisie in Afrika uitgespreek, maar waarsku: “Persvryheid is ’n voortdurende stryd waarin oorwinning nooit ten volle behaal word nie en daar is talle uitdagings - hier en veral verder weg.”
Intussen het die vakbond vir Namibiese professionele media (Nampu) gesê mediapraktisyns in Namibië staar steeds beduidende uitdagings in hul daaglikse werk in die gesig.
“Die mediabedryf in Namibië word gekenmerk deur ongunstige werksomstandighede, insluitend lae vergoeding, gebrek aan werksekuriteit, en beperkte toegang tot opleiding en professionele ontwikkelingsgeleenthede,” sê Nampu se sekretaris-generaal, Sakeus Iikela. Volgens hom sloer die arbeidskommissaris met die registrasie van die vakbond wat in 2020 op die been gebring is. Hy vra ook vir die spoedige toepassing van Namibië se nuwe wetgewing op toegang tot inligting en sê Nampu staan saam met joernaliste op die vasteland en wêreldwyd wat aanhou werk onder bedreigende omstandighede en “hul lewens in gevaar stel om oor die waarheid verslag te doen”.
[email protected]
Kommentaar
Republikein
Geen kommentaar is op hierdie artikel gelaat nie