Hage poets Namibië se beeld oorsee

President Hage Geingob het Saterdagaand op plaaslike bodem geland, ná ʼn warrelwindtoer waartydens hy die wêreld toegespreek het.

Die staatshoof het eers in Frankryk sy ondersteuning aan die Namibiese Wêreldbeker-rugbyspan gebied, en daarna ’n reeks spreekgeleenthede bygewoon.

Hy het die Verenigde Nasies (VN) se algemene vergadering in New York bygewoon, waar hy voorspraak gemaak het vir Namibië se standpunte teenoor die bevordering van Afrika en inklusiewe ontwikkeling in die wêreld.

Geingob het onder meer met die Duitse kanselier, Olaf Scholz, vergader en aan die volhoubare ontwikkelingsberaad 2023 deelgeneem asook aan die beraad vir volhoubare ontwikkelingsdoelwitte 2023. Hy het aan die internasionale hoëvlak-paneel oor waterbeleggings in Afrika, die Mind the Gap, deelgeneem en aan die Oxfam en Unaids se hoëvlak-byeenkoms om ongelykheid te beëindig.

Tydens sy toespraak by die VN se algemene vergadering op 20 September het Geingob gewaarsku dat die Covid-19-pandemie Agenda 2030 se teikens in gedrang gebring het.

“Met die uitbreking van Covid-19 het die aantal mense wat in uiterste armoede lewe vir die eerste keer in ’n generasie vermeerder. Ons moet die harde werklikheid in die gesig staar dat ons nie ons doelwitte en teikens sal bereik nie,” het hy gesê.

“Die wêreld verander gedurig en vordering is ongelyk,” sê hy, en moedig meer belegging in gesondheid, hernubare energie, opleiding, skoon water en sanitasie aan.

“Die skrikwekkende gaping tussen die rykes en die gemarginaliseerdes is nie net ’n morele bekommernis nie, maar ook ʼn bedreiging vir globale stabiliteit en harmonie. Ons is dus pligsgebonde om omstandighede te skep waar welvaart gedeel word en inklusief is,” het hy gesê.

Geingob het gevra vir die einde van “entstof-apartheid” en billike toegang tot gesondheidsvoorrade, ook vir inwoners van ontwikkelende lande. Groter ondersteuning is nodig om entstowwe in die globale suide te kan vervaardig, sê hy.

“Die vinnige vooruitgang in tegnologie, kwantumrekenaars en kunsmatige intelligensie (KI) verander die globale landskap, en bied ongekende uitdagings en ook geleenthede vir groei en ontwikkeling. Daarom moet ontwikkelende lande in hierdie digitale revolusie nie agtergelaat word nie,” het Geingob volgehou.

Namibië is self besig om sy ekonomiese struktuur te verander; dit deur finansiële instrumente op ’n innoverende manier te gebruik om volhoubare klimaatsfinansiering te mobiliseer en om klimaatsverandering te bekamp, sê hy.

Geingob het groot groenwaterstofprojekte ter waarde van US$20 miljard uitgelig, saam met die vestiging van ’n sintetiese brandstofnywerheid vir groen industrialisasie.

Die projekte wat die president uitgewys het, is die Oshivela-projek waarmee HyIron “groen” waterstof wil gebruik om reeds 15 000 ton “groen” yster in 2024 te vervaardig; om “groen” molekules te vervoer word groenverskepingsroetes met die Maersk Mc-Kinney Møller-sentrum ontwikkel, terwyl Compagnie Maritime Belge (CMB-Tech) saam met die Ohlthaver en List-groep ’n ammoniakbergingsaanleg ter waarde van 2,2 miljard euro in Walvisbaai bou. Verlede week het hierdie vennootskap die eerste “groen” waterstof Cleanergy-vulstasie in Namibië aangekondig.

Verder staan Namibië steeds saam met Kuba, en verwerp die sanksies teen dié land, wat ook teen Zimbabwe en Venezuela gelig moet word, sê Geingob.

Hy soek ook onafhanklikheid vir Wes-Sahara en geregtigheid vir Palestina.

Geingob sê die wêreld se uitdagings kan oorbrug word.

“Deur hande te vat, is dit binne ons vermoë om nou op te tree, en die wêreld te bou wat ons wil hê. In daardie wêreld moet niemand uitgelaat voel nie,” sê Hage Geingob.

– [email protected]