Regter sê sy besluite was ‘nie onredelik’

Die regter wat die Fishrot-verhoor aanhoor, Moses Chinhengo, het gister ’n onttrekkingsaansoek van die hand gewys ná hy van partydigheid beskuldig is.

Dit volg nadat die meeste van die Fishrot-beskuldigdes geweier het om in Desember verlede jaar te pleit en Chinhengo ’n pleit van onskuldig namens hulle aangeteken het.

Een van die Fishrot-beskuldigde Nigel van Wyk het die aansoek gebring op grond van die bewerings dat Chinhengo partydig is en glo reeds oor die uitkoms van die verhoor besluit het.

Chinhengo het egter daarop gewys dat hy in die belang van die beskuldigdes opgetree het, asook die publiek en die belang van geregtigheid, toe hy ’n pleit van onskuldig namens die beskuldigdes aangeteken het. Hy meen sy besluite en optrede was “nie onredelik nie”.

“Ek het opgetree in die belang van die verhoor se vordering en ingevolge die Strafproseswet kan ’n regter ’n pleit van onskuldig namens ’n beskuldigde aanteken,” het hy in sy uitspraak, wat gister vir meer as twee ure in die hoërhof in Windhoek voorgelees is, gesê.

Ten spyte van die feit dat Van Wyk aangevoer het dat Chinhengo hulle regte tot ’n regverdige verhoor skend, meen Chinhengo dat sy optrede nie een van die beskuldigdes benadeel het nie.

Hy het verder daarop gewys dat vier jaar reeds verloop het sedert die beskuldigdes se inhegtenisname en almal regsverteenwoordiging gehad het kort voor die beskuldigdes geskeduleer was om te pleit.

’n Ander kwessie wat onder die loep tydens die onttrekkingsaansoek gekom het, was dat Chinhengo na bewering nie vir Sacky Shanghala die geleentheid gegun het om ’n aansoek te bring voor die pleidooie geneem is nie.

Chinhengo het in sy uitspraak beklemtoon dat hy tydens verrigtinge aan die beskuldigdes gesê het dat hy ná die verhoor begin het en die optekening van pleidooie, enige aansoeke sal aanhoor.

Van Wyk se regsverteenwoordiger, Mbanga Siyomuinji, het ná die uitspraak voorgelees is, aangedui hoewel hulle die hof se uitspraak aanvaar, hulle nie tevrede daarmee is nie en binne 14 dae ’n appèlaansoek sal bring.

PROKUREUR IN WARM WATER

Chinhengo het ook tydens die uitspraak Siyomuinji se wanpraktyke uitgewys.

Tydens die hofverskyning vir die mondelinge argumente vir hierdie aansoek, het Siyomuinji ’n plaasvervanger gestuur wat glo nie vertroud was met die inhoud van die skriftelike betoë of die aansoek in die algemeen nie.

“Hy [Siyomuinji] het versuim om aan sy kliënt die dienste te verskaf waarop hy geregtig is,” het Chinhengo in sy uitspraak gesê en ook daarop gewys dat dit nie die eerste keer is dat Siyomuinji dit doen nie.

Op grond hiervan het Chinhengo beveel dat Siyomuinji geen fooie mag hef vir die hantering van die onttrekkingsaansoek nie.

Siyomuinji het ná die uitspraak gesê hy het die aansoek op ’n pro bono-basis gedoen en was in elk geval nie van plan om geld van Van Wyk te eis nie.

– [email protected]