'Geregtigheid vir álmal'

Henriette Lamprecht - “My rit is nie ’n negatiewe ding nie. Dit is positief. Dit is ondersteunend vir alle mense oraloor wat onreg ly aan die hand van onregverdige mense. Dit wys geensins enige vingers na die Namibiese regering nie. Inteendeel, dit is die teenoorgestelde. My interaksie met Namibiese regeringsbeamptes en ander was ondersteunend vir die behoefte vir geregtigheid binne die Suider-Afrikaanse Ontwikkelingstreek (SADC) en volgens die SADC-verdrag.”

Ben Freeth, ’n Zimbabwiese boer en menseregte-aktivis, het gereageer op ’n verklaring deur die Namibiese Landbou-unie (NLU) waarom dit nie deel is van sy veldtog en reis vir geregtigheid vir die heropening van die SADC-tribunaal nie. Freeth wat die tog vanaf Zimbabwe na Windhoek te perd aangedurf het, sal vandag ’n memorandum in dié verband by die Turnhalle-gebou in die hoofstad oorhandig.

Die SADC-verdrag gaan oor menseregte, demokrasie en die oppergesag van die reg, sê Freeth en geregtigheid is die kern van “dit waarvoor ons almal moet staan en glo”.

“Julle ondersteuning sowel as die ondersteuning van alle Namibiërs van alle etniese groepe is ongelooflik. Ek weet julle staan saam met my vir geregtigheid vir ál die mense van SADC.” Freeth se simboliese reis vir die heropening van die tribunaal volg nadat laasgenoemde se menseregtehof tydens ’n historiese uitspraak in November 2008 bevind het dat hy en sy familie ten spyte van ’n bevel van die voormalige president Robert Mugabe op hul plaas mag aanbly. Die uitspraak is egter verontagsaam en die tribunaal het uiteindelik tot niet gegaan.

Hoewel die NLU simpatie met die posisie van Zimbabwiese boere en Freeth se simboliese rit het, sê die unie daar is nie meer ’n SADC-tribunaal in Windhoek nie.

“Namibië is in ’n unieke posisie in Afrika waar reg en geregtigheid respekteer word en medeburgers mekaar respekteer. Ons leef in vrede en moenie toelaat dat wat in die res van Afrika gebeur Namibië se vrede en stabiliteit raak nie,” aldus die verklaring.

Freeth verwys na die SADC-verdrag wat ’n protokol vir die vestiging van die tribunaal het.

“Dié protokol stel elkeen van die 400 miljoen inwoners in staat om die tribunaal te nader wanneer hul eie regstelsel hulle gefaal het. Wanneer geregtigheid ons broers en susters in verskillende plekke faal, moet ons saam met hulle staan om dit weer te vestig.”

“Ons het almal individuele eiendomsreg en geregtigheid nodig vir die byna 400 miljoen mense in Suider-Afrika. Wanneer onreg heers, is daar net vernietiging en ondergang wat volg. Almal het geregtigheid nodig waar ons almal gelyke burgers is, gelyk behandel word voor die reg, of ons nou ryk of arm, of swart of wit, of oud of jonk is,” het Freeth vroeër gesê. – [email protected]