Waterrantsoene vir streke in noorde

Tuyeimo Haidula op Oshakati

Die nasionale waterverskaffer, NamWater, het ­aangekondig sommige noordelike dele van die land gaan wateronderbrekings ondervind weens konstruksiewerk wat tans aan die kanaal gedoen word.

Die watertoevoer na gebiede in die Oshikoto-, Ohangwena-, Omusati- en Oshanastreek word hierdeur ­beïnvloed.

Mnr. Abraham Ashipala, NamWater se bedryfsbestuurder vir dié gebied, het gesê die huidige opgraderingswerk aan die kanaal sal tot gevolg hê dat water na NamWater se suiweringsaanlegte en -verspreidingstelsels stadiger sal vloei.

Hy het gesê om die beskikbaarheid van water aan kritieke belanghebbendes te verseker, het hulle op 3 Junie met waterrantsoenering begin wat tot 18 Junie sal duur.

Die konstruksiewerk het ten doel om die reserwekapasiteit van komponente te bou en die beperkte ­beskikbare volume water wat ­geproduseer word, te onderhou.

“Ons herbou die kanaal om ons kapasiteit te vergroot sodat almal water kan ontvang,” het hy gesê.

Ashipala sê indien dringende behoeftes aan noodsaaklike dienste bestaan, word hospitale en ­klinieke aangemoedig om NamWater se kantore in die betrokke streke te skakel vir moontlike reëlings om voorraad deur watertenks te laat aflewer.

– [email protected]