Zuma sit agter ATM

14 January 2019 | Afrika
Oudpres. Jacob Zuma en die land se grootste swart Messiaanse kerke wat saam miljoene lidmate het, sit agter die stigting van die nuwe politieke party, die African Transformation Movement (ATM).

Die ATM is reeds in Junie verlede jaar, sonder groot fanfare, gestig ná ’n vergadering vroeg in Mei van verskeie Zuma-ontevredenes by ’n hotel in Umhlanga Rocks. Zuma was self by hierdie vergadering.

Verskeie kerkleiers wat Zuma goedgesind is en sy derde vrou, Tobeka Madiba-Zuma, het destyds die stigting van ’n nuwe party bepleit toe dit duidelik word dat pres. Cyril Rama­phosa gaan optree teen Zuma en sy medestaatskapers, het ’n onberispelike bron in Luthuli-huis die afgelope week aan Netwerk24 gesê.

Mandisa Mashiya, nasionale voorsitter en amptelike woordvoerder van die ATM, het Vrydag erken dat die party gestig is met steun van die Raad van Messiaanse Kerke, ’n liggaam waarvan vier van die land se grootste kerke lede is.

“Ja, die Raad van Messiaanse Kerke het die ATM gestig, net soos die kerke 107 jaar gelede die ANC gestig het,” het Mashiya gesê. Sy sê egter geen van die individuele kerke was direk betrokke nie.

Dié raad het in 2016 tot stand gekom as teenvoeter vir die Suid-Afrikaanse Raad van Kerke (SARK), wat destyds kwaai teen Zuma en die korrupsie onder sy bewind te velde getrek het. Die grootste Messiaanse kerke was bitter ontsteld omdat die SARK deelgeneem het aan die burgerlike veldtog wat Zuma se bedanking geëis het.

Die Messiaanse kerke is verreweg die grootste kerkgroep in die land. Volgens Statistieke Suid-Afrika se 2016-syfers is een uit vier gelowige Suid-Afrikaners ’n lidmaat van een van dié kerke.

Die kerke sluit onder meer in die Twaalf Apostels in Christus; die Bantu Church of Christ, wie se leier, biskop John Bolana, met Zuma bevriend is; die Ebuhleni-faksie van die Shembe-kerk, wat as die grootste kerk in KwaZulu-Natal beskou word en ten minste nog twee Messiaanse kerke.

Sommige van die Messiaanse kerkleiers het ook al vir Zuma in Durban en Pietermaritzburg gaan ondersteun tydens sy hofverskynings op aanklagte van korrupsie en omkopery.

In Luthuli-huis word bespiegel dat die ATM beplan om Zuma se regskoste te help dra, het Rapport se bron gesê.

Die nuwe party het die afgelope week sterk op die voorgrond getree toe die omstrede Mzwanele (Jimmy) Manyi by die party aangesluit het. Manyi, wat onlangs misluk het in sy poging om die Guptas se mediabelange, waaronder die koerant The New Age, te red, is ’n uitgesproke Zuma-ondersteuner.

“Die aankondiging van Manyi, een van Zuma se mees charismatiese volgelinge, is fyn beplan om die nasionale bekendstelling van die ATM te wees. Die vooraf beplanning is egter deeglik gedoen,” het Rapport se bron in Luthuli-huis gesê.

Volgens Mashiya geniet die ATM veral sterk steun in die Oos-Kaap en KwaZulu-Natal. “Ons het in al die provinsies bekendstelling-saamtrekke gehou, maar ons het vier saamtrekke in die Oos-Kaap gehou omdat ons sulke sterk steun in dié provinsie het,” sê sy.

Manyi is volgens haar in hierdie stadium lid van die party se uitvoerende komitee.

“Ons het nog geen partykongres gehou nie, want daar is nie nou tyd daarvoor nie. Ons sal eers ná die verkiesing kongres hou en formeel leiers aanwys en beleidsbeginsels formuleer.

“Ons gaan egter in al die provinsies en nasionaal aan die verkiesing deelneem. Ons is gereed om ons kandidatelyste by die Onafhanklike Verkiesingskommissie in te dien sodra die verkiesing geproklameer word,” sê sy.

’n Voormalige ANC-leier en ’n leiersfiguur in een van die kerke sê die nuwe party gaan waarskynlik ’n konserwatiewe beskouing hê. Hy sê die Messiaanse kerke is uiters ongemaklik oor kwessies soos gayregte en aborsie en sal waarskynlik die party gebruik om hul stem hieroor te laat hoor.

“Hulle word daarin gesteun deur die tradisionele leiers en geniet sterk steun van die Kongres van Tradisionele Leiers (Contralesa).”

Hy sê hy is genader om die nuwe party te steun, maar het dit van die hand gewys – onder meer oor sy ongemak oor die party se Zuma-bande.

Manyi het hom ná sy aankondiging Woensdag sterk ten gunste van die herinstelling van die doodstraf uitgespreek. Ook dit strook met die standpunte van die Messiaanse kerkleiers.

Mashiya het teenoor Rapport bevestig dat die ATM reeds twee formele vergaderings met Contralesa gehad het.

“Ons verwag om aansienlike steun van hulle te kry, veral in KwaZulu-Natal, waar tradisionele leierskap ’n groot rol speel,” sê sy.

Die politieke ontleder Ralph Mathekga sê daar is beslis ruimte vir ’n kerklik geïnspireerde politieke beweging op die Suid-Afrikaanse politieke landskap.

“Suid-Afrika is ’n diep Christelike land, ’n feit wat nie weerspieël word in ons politiek nie. Die African Chris­tian Democratic Party (ACDP) vervul nie werklik dié rol nie. Mathekga sê die ATM sal beslis genoeg steun kry om ’n paar parlementêre setels te wen en het die vermoë om steun by sowel die EFF as die ANC af te rokkel. - Netwerk24

Soortgelyk

 

'Boere se veglus verdwyn'

2 ure gelede | Landbou

Ronelle Rademeyer en Elvira Hattingh - Twee bekende boere van die Suide sê die droogte het boere op hul knieë.“Ek was gister by ’n veiling...

Egpaar herontdek skaars plantjie

2 ure gelede | Omgewing

Denver Kisting – ’n Dekaan by die Namibië Universiteit van Wetenskap en Tegnologie (Nust), dr. Rolf Becker, en sy vrou, me. Alma Moller, het verlede...

Kalender 18 Januarie

2 ure gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots Unam se beeldende kunste-uitstalling vir 2018 aan. Dié uitstalling is tans...

'DRK maak staat op ons'

2 ure gelede | Politiek

Inwoners van die Demokratiese Republiek van die Kongo (DRK) maak staat op lande deel van die Suider-Afrikaanse Ontwikkelingsgemeenskap (SADC) om die land weer op die...

Operasie Hornkranz: Meer misdaad aangemeld

2 ure gelede | Misdaad

Augetto Graig Die Namibiese polisie het Woensdag by die Israel Patrick Iyambo-polisiekollege in Olympia terugvoering gegee aan die visepresident, mnr. Nangolo Mbumba, en die...

Weer vir 18 Januarie

2 ure gelede | Weer

BINNELAND: Sonnig en warm tot baie warm in die //Kharasstreek, andersins gedeeltelik bewolk en baie tot bloedig warm met 'n paar tot geïsoleerde donderbuie in...

'Die beste tyd van my lewe'

2 ure gelede | Kuns en vermaak

Lloyd ZandbergDie 22-jarige gebore Namibiër Kyle Farrer verwys na homself as koel en kalm. Jy kan dit aan sy voorkoms sien. Eenvoudig, maar deurdink, ‘n...

Besige jaar vir Windhoek se DBV

2 ure gelede | Omgewing

Mariselle Stofberg- Die Dierebeskermingsvereniging (DBV) in Windhoek het 3 695 diere gedurende 2018 ingeneem. Altesaam 2 207 honde, 1 434 katte en 54 ander diere...

Vreemde voetspore is dit toe nie

2 ure gelede | Plaaslik

Francoise Steynberg - Groot was die opgewondenheid van die boer mnr. Frederick de Koker toe hy in November verlede jaar vreemde "voetspore" in rotsformasies naby...