Wêreldtitel nie vir Tyson beskore

Otis Finck op Walvisbaai - Polisielede moes tussenbeide tree om boksbeamptes na veiligheid te vergesel en teen ontevrede toeskouers te beskerm na afloop van die Harambee bokstoernooi wat in die vroeë oggendure van gister in Walvisbaai se binnenshuise sportsentrum ten einde geloop het.’n Paar omgekrapte ondersteuners van die Namibiese weltergewig Bethuel (Tyson) Ushona het die tellinghouers van voortrekkery en partydigheid beskuldig nadat hul held nie geslaag het in sy poging om die vakante wêreldtitel van die Wêreldboksfederasie (WBF) te wen nie.Die Duitse bokser Deniz Ilbay, met die vegnaam El Pistolero, is ná 12 rondes as die nuwe wêreldtitelhouer aangewys – hoewel daar ’n beduidende verskil in die drie tellinghouers se opsommings was.Ricky Tshabalala van Namibië was die enigste wat die geveg aan Ushona toegeken het – met ’n wye punteverskil van 118-110.Aubrey Erasmus van Suid-Afrika en Marcel Nartz van Duitsland het beide die besoeker laat wen – onderskeidelik met 117-111 en 115-113.Ilbay se vasberade en meer aggressiewe styl het vir hom die knoop deurgehaak op pad na sy 16de oorwinning in die beroepskryt. Die 21-jarige Duitser se verowering van die WBF-kroon vergoed ook vir sy enigste nederlaag, toe hy in April in Las Vegas met punte teen die onoorwonne Egidijus Kavaliauskas verloor het.Vir Ushona (35 oorwinnings en een gelykopuitslag) was dié nederlaag die vyfde van sy loopbaan en sy tweede op ’n streep. Die Namibiër het sy vorige geveg teen Sacky Shikukutu op ewe omstrede wyse met punte verloor toe hy vir die eerste keer sy IBO Afrika-titel op die spel geplaas het.Vroeg in die geveg het Ushona twee keer gegly en op die krytvloer beland. Hy het hom ook gereeld teen die toue bevind met die Duitser wat hom met verwoede sarsies gepeper het. Afgesien van ’n kragtige opstopper in die vierde ronde wat Ilbay teen die kakebeen getref het, kon Ushona se houekombinasies egter nie genoeg gesag afdwing nie.Die Duitser se hoër werktempo om op die voorvoet die pas aan te gee, is beloon toe die kampioengordel om sy middellyf vasgegespe is.VOORGEVEGTEDie boksbonanza aangebied deur die Salute Boksakademie het ’n goeie skare op Walvisbaai gelok – hoewel die Namibiese boksers se uitslae soms teleurstellend was.Oscar Chauke van Suid-Afrika is in sy WBF junior liggewiggeveg teen die plaaslike man Abraham Ndaendapo as die wenner met punte aangewys. Ook hier was daar uiteenlopende sienswyses tussen die beoordelaars Nartz (114-113 vir Chauke), Timo Haikonda van Namibië (115-112 vir Chauke) en Aubrey Erasmus (117-112 vir Ndaendapo).• Die Swakopmundse veergewig Gotlieb Ndokosho se loppbaan het ook ’n terugslag gekry toe hy deur Rofhiwe Maemu van Suid-Afrika uitgeslaan is. Die einde het in die derde ronde van die nie-titelgeveg gekom. Ndokosho se rekord staan na dese op 17 gewen en vyf verloor.• Die veergewig Nathanael Kakololo het sy landgenoot Johannes Niinkoti oor tien rondes met ’n eenparige puntebeslissing verslaan.• Nog ’n Namibiese veergewig, David Shinuna, is aan die einde van ses rondes teen Kagiso Tebogo van Botswana as die wenner op al drie tellinghouers se kaarte aangewys.• Nathaniel Sebastian was die wenner met ’n tegniese uitklophou teen sy mede-Namibiër Joseph Joseph in die derde ronde van hul junior liggewiggeveg.• Immanuel Joseph het Sakaria Shipanga in die eerste ronde uitgeslaan toe die twee vlieggewigte se paaie gekruis het.

Wêreldtitel nie vir Tyson beskore

Kommentaar

Republikein 2025-05-14

Meld asseblief aan om kommentaar te lewer

Wêreldtitel nie vir Tyson beskore

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie