Wêreld vat hande teen dié sindikate
Elise Tempelhoff
Die onwettige handel in wild (diere en plante) is ’n dringende internasionale kwessie. Dit vind deesdae op ’n industriële skaal plaas en hou ’n bedreiging in vir die veiligheid van inwoners van lande en streke waar gesogte fauna en flaura voorkom.
Só het die verteenwoordigers van lande einde verlede week in Londen gesê by die afsluiting van die internasionale beraad oor die onwettige handel in fauna en flora. Hulle het by dieselfde geleentheid die Londen Deklarasie onderteken waarin hulle belowe om “oor grense heen” hande te vat en kollektief aksie te neem om netwerke van sindikate te ontwrig en markte te sluit.
“Ons is vasbeslote om hierdie transnasionale misdade hok te slaan,” lui die deklarasie.
Georganiseerde misdaad en korrupsie wat verband hou met die onwettige handel in wild ontneem regerings van baie belangrike inkomste.
Luidens ’n verklaring wat na afloop van die beraad uitgereik is, sal olifante, renosters, grys papegaaie, ietermagogs en rooshout binnekort van die aardbol verdwyn as “’n wêreldwye, gesamentlike, aggressiewe” aksie nie geneem word teen die sindikate nie.
Buiten stropery is hierdie spesies ook onder druk weens groeiende menslike bevolkings, habitatverlies en besoedeling.
MEESTAL GEORGANISEERD
Die onwettige handel in fauna en flora is meestal baie georganiseerd. “Dit is ’n verfynde kriminele aktiwiteit wat op ’n industriële skaal plaasvind. Die netwerke dring grense binne en is gewoonlik vervleg met geldwassery, die grootskeepse smokkel van dwelms, wapens en mensehandel.
“Die sindikate ondermyn lande se wette en staan in die pad van ekonomiese groei. Die volhoubare bestuur van natuurlike hulpbronne kan bydra tot die bewaring van noodsaaklike habitats en ekostelsels wat op sy beurt geweldig baie geleenthede bied vir werkskepping.
“Georganiseerde misdaad en korrupsie wat verband hou met die onwettige handel in wild ontneem regerings van baie belangrike inkomste.”
Dit gebeur dikwels dat regerings noodsaaklike geld wat gebruik moet word vir teenstropingsoperasies kanaliseer na meer “noodsaaklike” dienste omdat hierdie aktiwiteit die staatskas wegkalwe.
Luidens die verklaring word die onwettige handel in fauna en flora te dikwels beskou as net ’n omgewingskwessie. In werklikheid is dit ’n kwessie van nasionale en internasionale belang en kan dit gemeenskappe ontwrig.
Die Londen deklarasie lui voorts: as een van die eerste stappe om die deklarasie in werking te stel, sal groot bewusmakingsveldtogte in verbruikerslande van stapel laat loop word om die vraag na die produkte te laat afneem. Tot dusver is daar internasionaal heeltemal te min hulpbronne hiervoor beskikbaar gestel.
SWARTMARK
Intussen het die Internasionale Fonds vir Dierewelsyn(IFAW) die naweek in ’n verklaring gesê sakelui, regerings, bewaringsorganisasies en akademici het by die pasafgelope beraad saamgespan om die Global Wildlife Cybercrime Action Plan van stapel te stuur om die smokkel van fauna en flora oor die internet hok te slaan.
IFAW se onlangse navorsing het gewys daar was in net ses weke in vier lande 11 772 advertensies vir bedreigde lewende diere asook van hul liggaamsdele op die internet geadverteer. Die geskatte waarde van dié diere en hul liggaamsdele is sowat R57 miljoen (3 miljoen pond) op die swartmark werd. Hierdie advertensies het olifanttande, stukkies renosterhoring, pels en verskeie velle van groot wilde katte ingesluit. IFAW het ook advertensies opgemerk vir lewende groot katte, krokodille, slange, oerangoetangs, asook gorillas.
Die werk om smokkelnetwerke op die internet te ontwrig, word gedoen deur die Global Coalition to End Wildlife Trafficking Online. Dit is ’n gesamentlike operasie deur IFAW, die organisasie Traffic (the Wildlife Trade Monitoring Network) en die Wêreldnatuurfonds (WWF). Die koalisie is van plan om die smokkel van wild op die internet teen 2020 met tot 80% te laat afneem. – Netwerk24
Die onwettige handel in wild (diere en plante) is ’n dringende internasionale kwessie. Dit vind deesdae op ’n industriële skaal plaas en hou ’n bedreiging in vir die veiligheid van inwoners van lande en streke waar gesogte fauna en flaura voorkom.
Só het die verteenwoordigers van lande einde verlede week in Londen gesê by die afsluiting van die internasionale beraad oor die onwettige handel in fauna en flora. Hulle het by dieselfde geleentheid die Londen Deklarasie onderteken waarin hulle belowe om “oor grense heen” hande te vat en kollektief aksie te neem om netwerke van sindikate te ontwrig en markte te sluit.
“Ons is vasbeslote om hierdie transnasionale misdade hok te slaan,” lui die deklarasie.
Georganiseerde misdaad en korrupsie wat verband hou met die onwettige handel in wild ontneem regerings van baie belangrike inkomste.
Luidens ’n verklaring wat na afloop van die beraad uitgereik is, sal olifante, renosters, grys papegaaie, ietermagogs en rooshout binnekort van die aardbol verdwyn as “’n wêreldwye, gesamentlike, aggressiewe” aksie nie geneem word teen die sindikate nie.
Buiten stropery is hierdie spesies ook onder druk weens groeiende menslike bevolkings, habitatverlies en besoedeling.
MEESTAL GEORGANISEERD
Die onwettige handel in fauna en flora is meestal baie georganiseerd. “Dit is ’n verfynde kriminele aktiwiteit wat op ’n industriële skaal plaasvind. Die netwerke dring grense binne en is gewoonlik vervleg met geldwassery, die grootskeepse smokkel van dwelms, wapens en mensehandel.
“Die sindikate ondermyn lande se wette en staan in die pad van ekonomiese groei. Die volhoubare bestuur van natuurlike hulpbronne kan bydra tot die bewaring van noodsaaklike habitats en ekostelsels wat op sy beurt geweldig baie geleenthede bied vir werkskepping.
“Georganiseerde misdaad en korrupsie wat verband hou met die onwettige handel in wild ontneem regerings van baie belangrike inkomste.”
Dit gebeur dikwels dat regerings noodsaaklike geld wat gebruik moet word vir teenstropingsoperasies kanaliseer na meer “noodsaaklike” dienste omdat hierdie aktiwiteit die staatskas wegkalwe.
Luidens die verklaring word die onwettige handel in fauna en flora te dikwels beskou as net ’n omgewingskwessie. In werklikheid is dit ’n kwessie van nasionale en internasionale belang en kan dit gemeenskappe ontwrig.
Die Londen deklarasie lui voorts: as een van die eerste stappe om die deklarasie in werking te stel, sal groot bewusmakingsveldtogte in verbruikerslande van stapel laat loop word om die vraag na die produkte te laat afneem. Tot dusver is daar internasionaal heeltemal te min hulpbronne hiervoor beskikbaar gestel.
SWARTMARK
Intussen het die Internasionale Fonds vir Dierewelsyn(IFAW) die naweek in ’n verklaring gesê sakelui, regerings, bewaringsorganisasies en akademici het by die pasafgelope beraad saamgespan om die Global Wildlife Cybercrime Action Plan van stapel te stuur om die smokkel van fauna en flora oor die internet hok te slaan.
IFAW se onlangse navorsing het gewys daar was in net ses weke in vier lande 11 772 advertensies vir bedreigde lewende diere asook van hul liggaamsdele op die internet geadverteer. Die geskatte waarde van dié diere en hul liggaamsdele is sowat R57 miljoen (3 miljoen pond) op die swartmark werd. Hierdie advertensies het olifanttande, stukkies renosterhoring, pels en verskeie velle van groot wilde katte ingesluit. IFAW het ook advertensies opgemerk vir lewende groot katte, krokodille, slange, oerangoetangs, asook gorillas.
Die werk om smokkelnetwerke op die internet te ontwrig, word gedoen deur die Global Coalition to End Wildlife Trafficking Online. Dit is ’n gesamentlike operasie deur IFAW, die organisasie Traffic (the Wildlife Trade Monitoring Network) en die Wêreldnatuurfonds (WWF). Die koalisie is van plan om die smokkel van wild op die internet teen 2020 met tot 80% te laat afneem. – Netwerk24
Kommentaar
Republikein
Geen kommentaar is op hierdie artikel gelaat nie