Woonstel brand op Walvisbaai

Jessica Botes - ’n Brand het Donderdagmiddag by die Lagoon Mansion-woonstelblok op Walvisbaai uitgebreek.

Volgens die dorp se brandweerhoof, mnr. Dennis Basson, is niemand in die brand beseer nie en is die oorsaak nog nie bepaal nie.

“’n Vrou was besig om kos te maak toe sy vlamme in die sitkamer sien. Sy en haar twee kinders het uit die woonstel gehardloop en ander inwoners het dadelik ingespring om self die brand te probeer blus,” het Basson gesê.

Volgens hom het die inwoners egter versuim om onmiddellik die brandweer te bel en is hulle dus nie dadelik na die toneel ontbied nie. Die brandweer kon egter daarin slaag om die brand te blus voordat enige van die ander woonstelle beskadig is.