Windhoek se eenheid bedreig

Denver Kisting



Rowers en beeldpoetsers is besig om met die Windhoekse stadsraad se vernaamste bate, eenheid, te dobbel.

Só sê die hoofstad se burgemeester, mnr. Muesee Kazapua, gister in 'n nuusverklaring aan die media.

Volgens hom is dié beweerde eenheid die gevolg daarvan dat raadslede hul uiteenlopende kulturele agtergronde én die verskeidenheid van kiesers wat hulle verteenwoordig en dien, omarm.

'n Mens moenie vergeet hoe ver Windhoek gekom het nie, maan die eerste burger.

“Die stad van Windhoek (CoW) en sy mense dra van daardie letsels. Ons het 'n ver pad gekom en dit is nou die Harambee-era en tyd om eensgesind vorentoe te beweeg,” lui sy bede aan die media.

Hy waarsku teen verdelende politiek, sinisme en dwepery – veral onder die leierskap van die Windhoekse stadsraad. “Ons kan regtig nie bekostig om die vordering teen te werk nie – die prys is net té hoog.”

Dit is nou tyd vir die owerhede om hulle met beter lewensomstandighede vir mense in informele nedersettings te bemoei, sê hy.

Kazapua se relaas volg op mediaberigte gister oor korrespondensie tussen hom en die kantoor van die aanklaer-generaal (AG).

Volgens hom het 'n bejaarde burger hom in Oktober 2013 in trane gekontak.

Dié vrou, me. Frieda Kaahanga, het haar na verneem word vir die bevryding van die land beywer.

Omdat sy in die rooi was by CoW is haar huis geoormerk om deur die stad verkoop te word om die skuld te delg.

“Die raad het die ondenkbare aan haar gedoen.”

Dít sou volgens hom moreel teenstrydig wees met dít wat die raad vir sy bejaarde burgers doen én politieke gevolge hê, sê Kazapua.

Hy het die bestuurder gemoeid met skuldbestuur onmiddellik opdrag gegee “om die situasie reg te stel”, sê hy. Sy optrede is genoodsaak daardeur dat hy dit nie oor sy hart sou kon kry om toe te kyk hoe 'n weerlose bejaarde haar eiendom verloor nie, sê hy.

Tot sy spyt, sê hy voorts, is die aangeleentheid onder die aandag van die Teenkorrupsiekommissie (ACC) gebring waarná die AG beslis het om die bestuurder te vervolg.

Kazapua het toe onder eed 'n verklaring ingedien om by die AG te pleit om haar beslissing te heroorweeg. “Hierdie besluit is in oorleg met die Swapo-streekkantoor in Khomas geneem,” sê hy. Sy besluit om in te gryp, is uit verband geruk en vir goedkoop politieke gewin ingespan, voer Kazapua aan.

“Dié is 'n aangeleentheid wat ons mense op 'n daaglikse grondslag raak en dít is waarom ons as leiers hier is om ons mense te beskerm daarteen dat hulle die drakoniese ervaring onder die fascistiese apartheidsregime herleef.”

Republikein het gister berig 'n oënskynlik stamverwante storm dreig om op 'n hernude krisis by CoW af te stuur. Drie opposisieraadslede waarsku in 'n brief aan dr. Peya Mushelenga, minister van stedelike en landelike ontwikkeling, dat daar van eenheid géén sprake is nie. Kazapua is glo in die kamp wat hom by Kahimise skaar. Swapo-raadslede sou glo gister met me. Sophia Shaningwa, die party se sekretaris-generaal, vergader.

Pogings om haar in die hande te kry, het geen vrugte afgewerp nie.