Windhoek+30 brei vorige deklarasie uit

05 May 2021 | Internasionaal
Hoofredaksie – Dertig jaar nadat die geskiedkundige Windhoek-deklarasie in die Namibiese hoofstad die weg gebaan het vir ’n vry, onafhanklike en pluralistiese pers, het sy opvolger – Windhoek+30 – drie ambisieuse nuwe doelwitte bygevoeg.

Dit is naamlik media- en joernalistieke lewenskragtigheid, deursigtige digitale platforms en ’n media- en inligtingsgeletterde burgery.

Dié nuwe, uitgebreide deklarasie is Maandag tydens Wêreldpersvryheidsdag en met die afsluiting van die vier dag lange konferensie ter viering van 30 jaar van die Windhoek-deklarasie, deur die deelnemers aanvaar.

“Die wêreld word vandag deur kritieke nuwe, maar ook geskiedkundige uitdagings ten opsigte van vryheid van spraak in die gesig gestaar en dit vereis daar moet internasionaal daadwerklike stappe deur alle belanghebbendes gedoen word.

“Die 1991 Windhoek-deklarasie was ’n grootse en vooruitskouende dokument wat die afgelope 30 jaar gehelp het om die wêreld beter te maak. Dit is nou tyd vir die generasie van 2021 om hulle bydrae te lewer,” lui die dokument.

“Persvryheid, onafhanklikheid en pluralisme bly belangrike doelwitte om seker te maak almal het toegang tot inligting as hulpbron vir die ganse mensdom. By hierdie doelwitte wil ons nou dié van media- en joernalistieke lewenskragtigheid, deursigtigheid van digitale platforms en die bemagtiging van die burgery om media- en inligtingsgeletterd te wees, voeg.

“Die Windhoek+30-deklarasie bring hulde aan diegene wat vir ons die weg gebaan het. Laat iedereen van ons nou óns deel doen om die veiligheid van inligting as ’n openbare goedere te verseker – as ’n dringendheid vandag, en as nalatenskap vir hulle wat ná ons kom,” sê die deelnemers in die dokument.

Hulle wys daarop dat inligting die burgery bemagtig om hul fundamentele regte uit te oefen, dit ondersteun geslagsgelykheid en stel mense in staat om deel te neem aan demokratiese bestuur en volhoubare ontwikkeling. Dit sien toe dat niemand agterwee gelaat word nie en dat mense doeltreffende stappe kan doen om in te gryp in wêreldkrisisse soos die klimaat en Covid-19 wat mense se gesondheid en voortbestaan bedreig.

In die verklaring spreek die deelnemers ook hul kommer uit oor die veiligheid van joernaliste, moorde op joernaliste, die teistering van vroue in media, aanlyn aanvalle asook die intimidering van joernaliste.

Hulle is ook diep bekommerd oor die toename in internetonderbrekings en -afskakelings, veral tydens verkiesings of protesaksies.

Verder is hulle ook uiters bekommerd oor die ernstige ekonomiese krisis en hoe dit die voortbestaan van onafhanklike nuusmedia wêreldwyd bedreig.

In die Windhoek+30-deklarasie word die dringendheid verwoord om mense oraloor die wêreld, insluitend die jeug en gemarginaliseerde groepe, in te lig oor die belangrikheid van die media en goeie joernalistiek en hulle die vaardighede te leer om dit in die groeiende landskap van inligtingsbronne van waninligting te onderskei.

Namibië se minister van inligting en kommunikasietegnologie, dr. Peya Mushelenga, het Maandag tydens die afsluiting van die konferensie gesê die feit dat hierdie internasionale gebeurtenis in Windhoek gevier is, lewer bewys van die land se verbintenis tot ’n vry, onafhanklike en pluralistiese pers.

Mushelenga het die media, die Verenigde Nasies se Organisasie vir Onderwys, Wetenskap en Kultuur (Unesco), die Europese Unie, organisasies van die burgerlike samelewing en academici bedank dat hulle onverpoos daaraan gewerk het om te verseker Namibië is opnuut die setel van die Windhoek-deklarasie.
[email protected]


FOTO
Lede van die Vereniging vir Joernaliste in Tunisië betoog Maandag op Wêreldpersvryheidsdag ter ondersteuning van die Marokkaanse ondersoekende joernalis en redakteur, Omar Radi en Soulaiman Raissouni, wat reeds langer as ’n jaar in aanhouding is vir kritiek teen regeringskorrupsie. Foto Nampa/AFP

Soortgelyk

 

Skoolhoof van Swakop sterf aan Covid-19

9 ure gelede | Mense

Ronelle Rademeyer – Huldeblyke het gister uit onderwys- en ander kringe ingestroom nadat die skoolhoof van Pro-Ed Akademie se hoër­skool op Swakopmund, mnr. Henry McCarthy,...

ReconAfrica voor hof gedaag

9 ure gelede | Howe

Ronelle Rademeyer – Reconnaissance Energy Africa (ReconAfrica) het sonder konsultasie of vooraf kennisgewing die natuurlike woud en landerye wat wettiglik deur 'n familie by Mbambi...

Weer vir 10 Mei 2021

9 ure gelede | Weer

BINNELAND: Sonnig en warm tot baie warm in die Suide. Elders sal dit gedeeltelik bewolk en warm tot baie warm wees.KUS: Gedeeltelik bewolk en warm...

Nog NBC-werkers keer terug

9 ure gelede | Arbeid

Hoewel die NBC-staking landswyd voortduur, het 74 werknemers intussen teruggekeer werk toe en is die Engelse radiodiens, National FM, weer terug op die lug. Die...

Noodkreet teen misdaadvlaag

9 ure gelede | Misdaad

Tunohole Mungoba op Oshakati – Die Oshakati-stadsraad het Donderdag 'n openbare vergade­ring in Okandjengeni-Suid op dié dorp gehou waar verskeie veiligheidskwessies geopper en klagtes teen...

Dwelms van amper N$2 miljoen gekonfiskeer

9 ure gelede | Misdaad

Volgens die Namibiese polisie is in April meer mense in besit van dwelms in hegtenis geneem as gedurende Maart. In Maart is 106 mense in...

Nuwe lewe in onooglike kraghuis geblaas

9 ure gelede | Kuns en vermaak

Claudia Reiter – Die kunstenaars Kat en Lens het die mure van 'n transformator-substasie in Conrad Ruststraat in Klein Windhoek geverf en verfraai. “Ons ry...

Geen partytjie vir Nujoma

9 ure gelede | Gemeenskap

Die kantoor van die stigterspresident Sam Nujoma het aangekondig hy gaan nie op 12 Mei sy 92ste verjaardag met 'n openbare byeenkoms vier nie. Dié...

Betaaldag hier vir Air Namibia se personeel

9 ure gelede | Vervoer

Ogone Tlhage – Die minister van openbare ondernemings (SOE's), mnr. Leon Jooste, het bevestig die regering het 'n gedeelte betaal van die N$278 miljoen wat...