Wildstropery in 2020 grootliks vasgevat

Twee lewens verloor in konflik met diere

11 February 2021 | Omgewing
Francoise Steynberg

Wildstropery het in 2020 ’n afname getoon, met altesaam 31 renosters en elf olifante wat gestroop is en 654 vermeende wildstropers wat vasgetrek is.

Die 654 verdagtes bestaan uit 597 Namibiërs, 26 Zambiërs, 22 Angolese, een elk uit Botswana en Zimbabwe asook sewe ander burgers wat betrokke is by 308 wildmisdaadsake wat in 2020 aanhangig gemaak is.

Die minister van die omgewing, bosbou en toerisme, mnr. Pohamba Shifeta, het verlede week die hersiene nasionale strategie vir wildbeskerming en wetstoepassing van stapel gestuur wat vir die volgende vyf jaar geld.

Volgens die statistiek oor wildmisdaad wat hy bekend gemaak het, is 31 renosters in 2020 gestroop, teenoor die 52 in 2019, 81 in 2018, 55 in 2017, 66 in 2016 en 97 in 2015 toe die wildstropery opgevlam het.

Verlede jaar is elf olifante gestroop teen 2019 se 13, 27 in 2018, 50 in 2017, 101 in 2016 en 49 in 2015.

Wat ietermagôs betref, is agt lewende diere in 2020 gekonfiskeer, asook vyf karkasse, 59 velle, vyf stukke vel en 924 skubbe.

Uit die 308 wildmisdaadsake wat in 2020 geregistreer is, is 111 verwant aan hoëwaardespesies: “Uit die 654 verdagtes word 113 verdagtes verbind aan renosterstropery of -horingsmokkelary, 100 aan ietermagôstropery en -smokkelary en 64 aan olifantstropery en -ivoorsmokkelary.

“Die meeste wildmisdaadsake is in die Khomasstreek (52) aanhangig gemaak, gevolg deur Zambezi (43) en Kunene (37),” het Shifeta gesê.

Hy sê 36 verdagtes is ook in 2020 in ou sake in hegtenis geneem en 104 wildmisdaadsake is in howe gefinaliseer.

“Altesaam 162 wildmisdadigers is skuldig bevind en 16 is vrygespreek. Altesaam 1 595 wildmisdaadverhore het plaasgevind,” het Shifeta gesê.

“Dis duidelik uit die statistiek dat ons saam met verskeie rolspelers hard aan die werk is om wildmisdaad in die land uit te roei en dat betekenisvolle sukses behaal is.”

Die minister sê wat renosterstropery en horingsmokkelary betref, is nie net stropers in hegtenis geneem nie, maar ook verskeie meesterbreine, middelmanne, helpers en handlangers.

Hy bedank al die personeel van die Namibiese weermag (NDF) en polisie (Nampol), die Nasionale Sentrale Intelligensiediens (NCIS), aanklaers en die gekombineerde span van intelligensiedienste van die Blue Rhino-taakspan en teenstropingseenheid, asook die honde-eenheid, wat saamgewerk het om wildstropery vas te vat.

MENS-DIER-KONFLIK

Wat mens-dier-konflik betref, sê Shifeta twee mense is deur krokodille doodgemaak en altesaam 813 vee se lewens deur wilde diere in 2020 geëis. Dit sluit in 413 beeste, 12 donkies, 234 bokke en 154 skape.

“Altesaam 3 450 hektaar gewasse is beskadig, waarvan 3 346 hektaar deur olifante, 55 hektaar deur buffels en 49 hektaar deur seekoeie,” het hy gesê.

“Ses persone is deur buffels beseer, drie deur luiperds, twee deur leeus en een elk is deur ’n olifant, seekoei en bobbejaan beseer.”

Hy sê meer as N$5 miljoen is uit die Wildproduktetrustfonds aan individue, boere en bewaringsgebiede vir veeverliese, skade aan gewasse, beserings aan mense en lewensverliese uitbetaal.

[email protected]

Soortgelyk

 

Okavango-alliansie vra vir moratorium op oliesoektog

1 uur gelede | Omgewing

'n Alliansie van plaaslike en internasionale burgerlike organisasies en aktiviste, Save Okavango's Unique Life (Soul), wil hê 'n moratorium moet geplaas word op ReconAfrica se...

Namibië se Ontplooiings- en Immuniseringsplan "onder die beste...

3 ure gelede | Gesondheid

Namibië se Ontplooiings- en Immuniseringsplan teen Covid-19 is deur die Wêreldgesondheidsorganisasie (WHO) as "een van die beste in die wêreld" beskryf. Volgens die minister van...

N$583 miljoen vir Namibië se Covid-19 Ontplooiings- en Immuniseringsplan...

4 ure gelede | Gesondheid

Die totale voorgestelde begroting vir Namibië se Ontplooiings- en Immuniseringsplan vir Covid-19-entstowwe is N$583 miljoen waarvan N$484,8 miljoen vir die aankoop van die entstowwe is....

Covid-19-regulasies geld tot 31 Maart

4 ure gelede | Gesondheid

Pres. Hage Geingob het pas by Staatshuis aangekondig die huidige Covid-19-maatreëls geld vir die volgende 36 dae vanaf middernag tot 31 Maart (Onafhanklikheidsdag op 21...

Metro spoils its customers

6 ure gelede | Plaaslik

Metro Namibia celebrated its birthday in style once again by spoiling five lucky customers each to a trailer of their own, stocked with N$5,000-00 worth...

Knopvelsiekte breek in Omaheke uit

15 ure gelede | Landbou

Knopvelsiekte het by Eiseb in die Omahekestreek uitgebreek en die beweging van beeste in dié gebied is tot verdere kennisgewing opgeskort.Dr. Albertina Shilongo, hoof-veeartsenybeampte in...

Vrou woon in haar motor by hospitaal

15 ure gelede | Mense

Henriette Lamprecht – 'n Bejaarde vrou van die kus woon die afgelope week in haar motor in die parkeerterrein van 'n staatshospitaal in Windhoek om...

Toekoms van 77 Air Nam-vlieëniers onseker

15 ure gelede | Vervoer

Francoise Steynberg – Altesaam 77 vlieëniers van Air Namibia se toekoms is onseker. Boonop het bykans 75% van die redery se vlieëniers se lisensies verval...

Ses damme voller as 100%

15 ure gelede | Weer

Elvira Hattingh – Terwyl altesaam sowat ses Namibiese damme tans 100% of meer water bevat, oorstroom die Zambezirivier sy walle, met water wat in die...