Wie’s die ingenieurs wat Eskom kom ‘regruk’?

14 February 2019 | Energie
William Horne en Elvira Wood – Pravin Gordhan, minister van openbare ondernemings, het Dinsdag in die parlement aangekondig dat Italië se grootste kragvoorsiener, Enel, genader is om Eskom se beurtkrag-krisis te help regruk.

Gordhan en Jabu Mabuza, voorsitter van Eskom, het Enel gekontak om tegniese hulp te verleen om die probleme by Eskom op te los.

Die minister sê in ’n e-pos dat Enel binnekort ingenieurs na Suid-Afrika sal stuur om die omvang van die

probleem vas te stel deur ’n omvattende bedryfsoudit van alle kragstasies te voltooi. Dit sal volgens Gordhan verseker dat elke moontlike tegniese probleem volledig verstaan word sodat oplossings doeltreffend gevind kan word.

Enel is wel reeds bedrywig in Suid-Afrika as Enel Green Power RSA (Enel GP), met onder meer 520 megawatt (MW) se installasies wat landwyd son- en windkrag opwek. Dié groenkragaanlegte is reeds in bedryf.

Luidens ’n verklaring wat Dinsdag uitgereik is, het Enel GP ook pas met die konstruksie van die nuwe Nxuba 140 MW-windplaas in Amathole in die Oos-Kaap begin.

Die windkragsentrale kos R3,1 miljard om te bou en sal teen September 2020 begin krag opwek as deel van Eskom se toekenning van sy 2015-verkrygingsgprogram van hernieubare energie van onafhanklike kragprodusente (REIPPPP). Die Italiaanse maatskappy het ’n kontrak van 20 jaar met Eskom vir dié aanleg.

Enel is internasionaal in 35 lande bedrywig, en het ’n deurlopende fokus op groenkrag, met 43 gigawatt (GW) se windplase, hidro-elektriese, geotermiese, son- en biomassa-kragsentrales wêreldwyd. Net minder as 50% van die kragreus se totale opwekkingsvermoë van 89 GW kom van hernieubare bronne.

Die Italiaanse nutsmaatskappy is oorspronklik in 1962 as ’n staatsonderneming begin, maar is toe in 1999 geprivatiseer en bestuur nou ’n inkomste van ongeveer R1 100 miljard per jaar.

Die kredietgraderingsagentskap Fitch het pas Enel se langtermynkredietwaardigheid ook opwaarts hersien tot A-. Dit is vier vlakke bo beleggingsgraad by Fitch.

“Die graderingsagentskap het erkenning gegee aan Enel se sterk prestasiegeskiedenis ondanks die groep se uitdagende bedryfs- en finansiële doelwitte in die tydperk tussen 2015 en 2018,” luidens Enel se verklaring.

“Enel se posisie aan die voorpunt van innovasie sowel as volhoubaarheid is merkwaardig.”

Enel is ook by die twee ander groot kredietgradeerders ver bo beleggingsgraad gegradeer. By Moody’s Investors Service staan Enel twee posisies bo rommelstatus, en by Standard & Poor’s Global Ratings (S&P) is hy drie posisies bo rommelstatus.

Eskom, wat tans R420 miljard se skuld het, staan by S&P, Moody’s en Fitch onderskeidelik sewe, vyf en drie posisies onder beleggingsgraad.

Eskom het vandeesweek beurtkrag ingestel om te keer dat die hele netwerk weens onbeplande instandhouding ineenstort.

Eenhede by Arnot, Kriel, Duvha, Matla en Grootvlei was saam met dié by Medupi en Kusile nie Dinsdag in

bedryf nie.

Eskom het net 27 305 MW krag beskikbaar gehad van die 30 033 MW wat hy in piektye nodig het, het

Gordhan Dinsdag gesê.

Woensdag het Eskom weer fase 3-beurtkrag van 08:00 tot 23:00 ingestel.

Wanneer fase 3-beurtkrag ingestel word, beteken dit Eskom moet 3 000 MW se elektrisiteit van die netwerk haal. – Netwerk24

Soortgelyk

 

Ooreenkoms tussen buitelandse mediese studente, mediese raad

2 dae gelede | Gesondheid

NUUSBREKERDie hoërhof het vandag 'n ooreenkoms tussen die Raad vir Gesondheidsberoepe in Namibië (HPCNA) en 'n groep beswaarde mediese en tandheelkundige studente bekragtig wat in...

Polisiebeampte skiet per ongeluk kind

2 dae gelede | Misdaad

‘n Polisiebeampte het Donderdag in die vroeë oggendure per ongeluk ‘n kind naby die landdroshof in Katutura doodgeskiet. Die voorval het omstreeks 03:00 plaasgevind. Volgens...

Vragmotor met reuse daggavonds onderskep

2 dae gelede | Misdaad

Die polisie in die Ohangwena-streek het ‘n swaar vragmotor in die omgewing van Eenhana met 41 sakke dagga onderskep. Volgens die polisie se misdaadkoördineerder en...

Derde wildehond dood

2 dae gelede | Omgewing

Een van die drie wildehonde van N/a'an ku sê wat op die Zannier-reservaat geskiet is, het vanoggend aan sy erge beserings weens skietwonde beswyk. Dit...

Aussenkehr staar ramp in gesig

2 dae gelede |

Ronelle Rademeyer - Die Namibiese regering is versoek om Suid-Afrika te vra om dringend water uit sy opgaardamme vry te laat, aangesien die Oranjerivier by...

Droogtehulp as Valentynsgeskenk

2 dae gelede | In beeld

‘n Konvooi van 10 lorries vol lusern het gister van die Hardapskema af na verskeie bestemmings in die Suide vertrek. Hierdie veevoer vir boere is...

Kalender 15 Februarie

2 dae gelede | Kuns en vermaak

Nou aan die gang » Die Brewer & Butcher by die Strand Hotel op Swakopmund bied môreaand ’n woord-en-wyn-aand aan. Gaan geniet ’n kuier met...

Noorde Sondag sonder krag

2 dae gelede | Energie

Die nasionale elektrisiteitverskaffer NamPower het aangekondig vier noordelike streke sal Sondagoggend sonder krag wees. Dié onderbreking is geskeduleer vir 07:00 tot 13:00 en sal inwoners...

'Belastingbetalersgeld het ons opgelei'

2 dae gelede | Ministeries

Henriette Lamprecht – “Ons wil nie die regering se pogings ondermyn of evaluerings stop nie. Ons wil net ’n regverdige en deursigtige manier hê waarop...