Werk op lughawepad opgeskort

Meer as N$20 miljoen uitstaande

14 November 2016 | Infrastruktuur
Catherine Sasman - Konstruksie van die eerste fase van die pad van Windhoek na die Internasionale Lughawe Hosea Kutako is Vrydag oor laatbetalings aan die kant van die Paaieowerheid (RA) opgeskort.

Die hoof uitvoerende beampte van die RA, mnr. Conrad Lutombi, het bevestig die instelling het ‘n kennisgewing vir die werksoponthoud van die gesamentlike onderneming tussen China Railway Seventh Group en Onamagongwa ontvang.

Lutombi het gesê die gesamentlike onderneming het ingevolge die kontrak die reg om as gevolg van uitstaande betalings werk op te skort.

Volgens hom sal die RA en die kontrakteurs vandeesweek ‘n vergadering belê.

“Ons sal in staat wees om die kwessie op te los.”

Volgens ‘n betalingskedule het die RA reeds meer as N$106 miljoen aan die kontrakteurs oorbetaal. ’n Bedrag van bykans N$20 miljoen is uitstaande.

China Railway en sy Namibiese vennoot, Onamagongwa, het 21 dae kennis gegee van hul voorneme om werk op die pad projek te staak in ‘n brief wat die projekbestuurder van China Railway, mnr. Xianjin Wang, geskryf het oor ‘n “moontlike vertraging”.

Wang het gesê betalings is nie op 21 September en weer nie op 16 Oktober gedoen nie en dit kortwiek die produksie.

“Die handhawing van ‘n positiewe kontantvloei is noodsaaklik sodat die kontrakteure die beplande vlak van produksie en aankoop van hulpbronne vir die suksesvolle uitvoering van die projek kan handhaaf,” het Wang geskryf.

Hy het voorts gesê die vertraging in produksie is as gevolg van die laat aflewerings van materiaal wat veroorsaak word deur nie-betalings aan verskaffers, sowel as ‘n verlies aan vertroue van verskaffers as gevolg van skikkingsooreenkomste wat nie nagekom word nie.

Volgens Wang se skrywe is beslag gelê op ingevoerde toerusting deur die doeane op Walvisbaai oor onbetaalde invoerbelasting wat die kontrakteurs weens die "morbiede kontantvloei" nie kon betaal nie.

‘n Lid van die bestuur van Onamagongwa Trading Enterprises, mnr. Martyn Ipinge, het op 8 November ‘n verskaffer oor die dreigende staking ingelig en aangedui dat die RA nie sy maandelikse, kontraktuele verpligtinge nagekom het nie.

Volgens Ipinge se skrywe is die duur van die staking onbekend. Hy het bygevoeg dat werk geheel en al gestop mag word of dat kleiner werke sal voortgaan. Hy het gesê die kwessie sal binne die volgende paar dae uitsorteer word.

Ipinge wou egter geen kommentaar hierop lewer nie.

Lutombi het ook nie uitgebrei oor redes waarom die RA nie sy kontraktuele verpligtinge nagekom het nie.

China Railway Seventh Group, wat 80% van die aandele in die gesamentlike onderneming besit en wat sy visie stel as die “verbetering van die lewensgehalte van al ons mense”, het onlangs in ‘n advertensie aangedui dit sou met konstruksie van ‘n brug oor Frankie Frederickstraat in Prosperita begin. Dit het aangedui dié gedeelte van die projek sou op 21 September begin en tot 30 Februarie duur.

Die RA het in Desember verlede jaar die opgradering van die lughawepad aangekondig. Dit sluit in die opgradering tot snelwegstandaard oor die stedelike gedeelte tussen Mandume Ndemufayo-rylaan en die uitbreiding van Sam Nujoma-rylaan aan die suidooste van Windhoek.

Die eerste fase behels die konstruksie van ‘n 8,4 kilometer-dubbelpad en die bou van 10 nuwe brûe en drie wisselkruisings. Daarbenewens sluit dit twee bestaande brûe oor die spoorlyn en die verbreding en rehabilitasie van die Arebbusch-rivier in.

Soortgelyk

 

Theo Mujoro is nuwe hoof van verkiesings

14 ure gelede | Politiek

Mnr. Theophilus (Theo) Mujoro is vanaf 1 September vanjaar vir ‘n tydperk van vyf jaar aangestel as die nuwe hoof verkiesingsbeampte van die Verkiesingskommissie van...

Nuwe spoedkameras getoets

15 ure gelede | Infrastruktuur

Die Namibiese polisie se verkeersbeamptes toets van gister af die werking van nuwe spoedkameras op Namibië se hoofpaaie. Veral in die Erongo- en Otjozondjupastreek word...

Onderwys: ‘Gebruik wat julle het om fondse in te...

16 ure gelede | Onderwys

Die minister van onderwys, kuns en kultuur, me. Katrina Hanse-Himarwa het ’n beroep op skole gedoen om beskikbare middele te gebruik om fondse vir hul...

Otjomuru-kliniek aan regering oorhandig

16 ure gelede | Gesondheid

Die Otjomuru-kliniek naby die Otjomuru-nedersetting sowat 27 km oos van Okangwati in die Kunenestreek, is aan die regering oorhandig. Die konstruksie van die kliniek was...

Nuwe visekanselier vir Unam

17 ure gelede | Onderwys

Die Universiteit van Namibië (Unam) sal voorleggings deur die vier kandidate vir die universiteit se visekanselierspos regstreeks op YouTube, Twitter, Facebook en hul webwerf uitsaai.Die...

Windhoek se krane dalk oor twee seisoene leeg ...

1 dag gelede | Omgewing

Elvira Hattingh - Windhoek het genoeg water om twee reënseisoene te dek, indien dit bykomende waterbronne in die Noorde, asook die Windhoek-akwifer onvolhoubaar gebruik én...

Wag die Skedelkus op Harry en sy bruid?

1 dag gelede | Toerisme

Des Erasmus - Prins Harry-koors teister die gebied tussen Hentiesbaai en die monding van die Kunenerivier op die noordgrens en die ooreenstemmende leeu- en renosterwêreld...

Weer vir 22 Junie 2018

1 dag gelede | Weer

BINNELAND: Koud aanvanklik in die binneland. Dit sal gedeeltelik bewolk en warm tot baie warm oor die verre Noordooste en die Khomasstreek wees. Elders sal...

Fosfaat-debat begin oor

1 dag gelede | Omgewing

Augetto Graig - Die ontginning van fosfaat op Namibiese seebodem is vir eers van die baan af. Die minister van die omgewing en toerisme,...