Welwitschias-trein rol oor Old Boys

Klubkrieket

11 November 2019 | Sport
Andrew Poolman - Die gekombineerde kusspan MR24/7 Welwitschias rol voort as die voorloper, met drie oorwinnings ná naweek nommer drie in Krieket Namibië se premierliga vir eendagkrieket (50 boulbeurte).

As die besoekers aan Windhoek Hoërskool se veld het hulle Saterdag die onervare spannetjie wat WHS Old Boys in die veld gestoot het, se keel toegedruk en die tuisspan vir net 102 lopies uitgeboul.

Die doodsteek is toegedien deur Matthew de Gouveia, wie se regterarm draaiballe hom die lieflike boulsyfers van ses paaltjies vir nege lopies van 4.3 boulbeurte besorg het.

Een van sy ses slagoffers was Christiaan Schumacher, wat met 40 lopies van 64 balle (2x4 1x6) as kolwer nommer drie die sterkste weerstand gebied het, totdat De Gouveia hom been-voor-paaltjie betrap het.

Net twee ander WHS-kolwers kon dubbelsyfers behaal, naamlik Gareth Cloete (13 van 32 balle, 3x4) en Herman Steytler (18 van 31 balle, 1x4). Steytler se vertrek was die begin van 'n vernietigende ineenstorting vanaf 90/2 tot 102 almal uit.

De Gouveia se verwoestingswerk is deur nog 'n draaibouler, Shalako Groenewald (2/2 in vier boulbeurte, twee leës) ondersteun.

WHS was ooglopend met die rug teen die muur en het op hul beurt ook die boulwerk met twee draaiers geopen. Daar was aanvanklike sukses toe Llewellyn Louw (2/27 in 8 bb) en Vernon Cloete (2/30 in 7) elkeen twee keer toegeslaan het.

Old Boys se hoop het dus opgevlam met die telling op 57/4 en die kusspan se kaptein Lauritz Haccou (9), Steve Winborn (4), Nian Grobler (12) en Matthew de Gouveia (5) almal goedkoop terug in die pawiljoen.

Shalako Groenewald het op 87/5 teruggestap toe hy vir 14 van 12 balle (1x4 1x6) uitgevang is, maar uiteindelik was daar nie genoeg lopies om Sean Silver (25 nie uit nie van 33 balle, 1x4 1x6) en Enrico van der Westhuizen (12 nie uit nie van 18 balle) te keer nie.

Die Welwitschias (103/5) wen dus ná 21.1 boulbeurte met vyf paaltjies.



CCD KLOP UNITED

Die CCD Tigers, wat hul enigste vorige wedstryd teen die kusspan verloor het, het op koers gekom deur hul wegwedstryd teen Trustco United met 29 lopies te wen.

United het die loot gewen en die Tigers ingestuur om eerste te kolf. Die besluit is aanvank­lik geregverdig met die vroeë deurbrake om van Wayne Raw (7) en Rene Were (8) ontslae te raak.

Dit het egter die veelsydige Nicol Loftie-Eaton voor die penne gebring, wat tans gewis een van die mees invloedryke spelers in die liga is. Net 28 balle later het hy sy kolf omhoog gelig om die applous vir sy vyftigtal te erken.

Loftie-Eaton is uiteindelik vir 70 lopies (63 balle) uitgevang, nadat hy drie sesse en agt viere geslaan het.

CCD Tigers se totaal het op 181 almal uit in 43.4 boulbeurte geëindig, danksy verdere kleiner bydraes deur CCD se kaptein Joshuan Julius (20), Ricardo Strauss (20) en Mika Mutumbe (22 van 28 balle, 1x6).

United se stadiger boulers was meer suksesvol, by name die kaptein Danie van Schoor (3/43 in 10) en Lo-han Louwrens (3/28 in 6), terwyl Dewald Nell (2/21 in 5.4) en Darren van Dyk (1/27 in 10) ook heel tevrede kon voel.

United se topkolwers is egter tot op 'n rampspoedige 9/4 uitgewis deur die openingsboulskof van Mika Mutumbe, wat op 'n streep vir Dewald Nell (3), Hendrik van der Walt (1) en Eben van Wyk (0) laat uitvang het.

Mutumbe, 'n regterarm mediumsnelbouler wat van 2016 tot einde 2018 ook die nasionale Eagles verteenwoordig het, het later ook teruggekeer om met 4/21 in 9.4 boulbeurte vir oulaas die hardnekkige Nyashadzaishe Nyasha (27 van 49 balle) se weerstand te beëindig.

'n Vyftigtal van net 42 balle deur Darren van Dyk (67 van 62 balle) was sentraal in die periode waarin United gedreig het om dalk te wen. Van Dyk het met sewe sesse en drie viere ook sy slaankrag gewys.

Die gebrek aan steun vir Van Dyk benewens Danie van Schoor (19), Nyasha (27) en Henry Olivier (15) het egter die Filistyne gesink, met 29 lopies die verskil tussen die spanne.

Mutumbe se vuurwerke het ewe puik boulwerk deur sy maats Nicol Loftie-Eaton (3/26 in 7) en Elton Ambambi (3/30 in 10) oorskadu.

• Komende Saterdag se wedstrydbepalings (vanaf 09:30): Welwitschias teen United by Sparta op Walvisbaai; Samsung FNB Wanderers teen CCD Tigers by Wanderers.

Na verneem word sal die klubs vanaf komende naweek weer hul nasionale spelers beskikbaar hê.

Soortgelyk

 

AgriBusDev-baas geskors

1st of June 18:23 | Regering

Mnr. Petrus Uugwanga, die landbousake-ontwikkelingsagentskap (AgriBusDev) se besturende direkteur, is met onmiddelike effek geskors. Die voorsitter van die AgriBusDev-raad, me. Sophia Kasheeta, het pas ‘n...

Twee 'renosterstropers' verskyn in Gobabis-hof

1 uur gelede | Howe

Twee vermeende renosterstropers het vandag in die landdroshof op Gobabis verskyn.Mnre. Alberto Mbwale en Joseph Matheus het op klagte van die onwettige jag van spesiaal...

Pastoor Babi steeds agter tralies

5 ure gelede | Howe

Pastoor Jackson Babi (30) van die House of Joy Ministries en sy medebeskuldigde, mnr. Friza Dumeni (25), bly steeds agter tralies.Landdros Linus Samunzela het vanoggend...

25ste Covid-19-geval bevestig

7 ure gelede | Gesondheid

'n Vroulike gesondheidswerker (32) is Namibië se jongste Covid-19-geval. Dit bring die aantal bevestigde Covid-19-gevalle in Namibië op 25 te staan. Volgens die minister van...

Hof hoor president is 'mislei' oor arbeidsregulasies

17 ure gelede | Howe

Ronelle Rademeyer - Pres. Hage Geingob is “verkeerd geadviseer” met die opstel van die gewraakte arbeidsregulasies waarvan die grondwetlikheid Vrydag in die hoërhof deur Namibiese...

Namibiërs in haglike omstandighede onder SA-kwarantyn

17 ure gelede | Gesondheid

Twee vroue van Windhoek en die een se 16-jarige dogter meen die vervalle staatshospitaal by Nababeep naby Springbok in die Noord-Kaap waar hulle in kwarantyn...

'Profeet' Babi se borgaansoek vandag

17 ure gelede | Misdaad

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni,...

Twee bemanningslede positief vir Covid-19

17 ure gelede | Gesondheid

Henriette Lamprecht & Leandrea Louw – Walvisbaai huisves tans drie aktiewe gevalle van Covid-19 ná ‘n 51-jarige man Saterdag positief vir die virussiekte getoets het....

Fishrot-manne skarrel vir borgtog

17 ure gelede | Misdaad

Augetto Graig – Die Windhoek-landdroshof het Vrydag met verskeie Fishrot-sake gewemel, met borgtogaansoeke wat met aansoeke vir die verlenging van tyd vir verdere ondersoek, meegeding...