Welwitschias slyp teen o.20 WB-spanne
Rugby
'n Namibiese XV-tal kom in April in die Wes-Kaap teen die o.20-rugbyspanne van Suid-Afrika Georgië en Argentinië in 'n internasionale reeks te staan.
Dit is ter voorbereiding vir die wêreldkampioenskap vir o.20's wat in Junie in Argentinië gehou word.
Vir die Namibiese Welwitschias-oefengroep sal dit as opwarming vir sy deelname aan die provinsiale SuperSport-reeks se skildafdeling wees, wat bestem is om op 27 April af te skop.
Die spanne sal mekaar een keer oor drie rondes pak in wedstryde op 9, 13 en 17 April. Dis 'n soortgelyke formaat as die groepfase van die Wêreldkampioenskap, waar hulle wedstryde elke vier dae sal speel.
Argentinië en die Namibiese XV-tal, wat 'n senior span sal wees, sal die reeks begin met wedstryde by Paarl Gimnasium op 9 April, met die Junior Springbokke wat teen Georgië, hul teenstander in die groepfase van die Wêreldkampioenskap, te staan kom.
In die tweede ronde pak die Namibiërs die SA o.20's en Georgië speel teen die Argentyne by die Tygerberg-rugbyklub.
Die laaste ronde word by Paul Roos Gimnasium in Stellenbosch gespeel, waar die Junior Bokke met Argentinië swaarde kruis, terwyl Georgië o.20 met die Namibiese XV-tal kragte meet.
Die Junior Bokke se afrigter, Chean Roux, wat die SA Rugby-akademie sedert Februarie in Stellenbosch onder hande gehad het, sal sy groep aanstaande week aankondig.
Die groep, wat steeds deel sal vorm van die akademie, kom van 31 Maart tot 18 April in Stellenbosch vir 'n oefenkamp byeen.
“Die internasionale reeks sal 'n ongelooflike geleentheid wees vir die spelers om hulself te bewys met die oog op die Wêreldbyeenkoms,” het Roux gesê.
“Ná die werk met 'n groot klomp van die spelers by die akademie, sal die wedstryde die afrigters nog 'n kans gee om te besin oor die finale groep van 28, wat ná afloop van die reeks gekies word.
“Argentinië en Georgië neem vanjaar deel aan die Wêreldkampioenskap en die Argentyne is die gasheerspan; dus is die reeks ewe belangrik vir hul voorbereiding.
“Georgië het verlede jaar teen ons in Suid-Afrika gespeel, so ons sien uit daarna om hulle terug te verwelkom. Ons verwag 'n uitdagende en opwindende reeks.”
Die Junior Springbokke begin hul veldtog in die Wêreldkampioenskap teen Skotland op 4 Junie, voordat hulle op 8 Junie teen Georgië en vier dae later teen Nieu-Seeland in die groepfase te staan kom.
Die halfeindstryde is op 17 Junie en die eindstryd op 22 Junie.
Die internasionale o.20-reeks se bepalings:
9 April (Paarl Gimnasium): Argentinië o.20 tn Namibië XV; Georgië o.20 tn Junior Springbokke.
13 April (Tygerberg-rugbyklub): Georgië o.20 tn Argentinië; Junior Springbokke tn Namibië XV.
17 April (Paul Roos Gimnasium): Georgië o.20 tn Namibië XV; Junior Springbokke tn Argentinië.
– Bygewerk van Netwerk24
Dit is ter voorbereiding vir die wêreldkampioenskap vir o.20's wat in Junie in Argentinië gehou word.
Vir die Namibiese Welwitschias-oefengroep sal dit as opwarming vir sy deelname aan die provinsiale SuperSport-reeks se skildafdeling wees, wat bestem is om op 27 April af te skop.
Die spanne sal mekaar een keer oor drie rondes pak in wedstryde op 9, 13 en 17 April. Dis 'n soortgelyke formaat as die groepfase van die Wêreldkampioenskap, waar hulle wedstryde elke vier dae sal speel.
Argentinië en die Namibiese XV-tal, wat 'n senior span sal wees, sal die reeks begin met wedstryde by Paarl Gimnasium op 9 April, met die Junior Springbokke wat teen Georgië, hul teenstander in die groepfase van die Wêreldkampioenskap, te staan kom.
In die tweede ronde pak die Namibiërs die SA o.20's en Georgië speel teen die Argentyne by die Tygerberg-rugbyklub.
Die laaste ronde word by Paul Roos Gimnasium in Stellenbosch gespeel, waar die Junior Bokke met Argentinië swaarde kruis, terwyl Georgië o.20 met die Namibiese XV-tal kragte meet.
Die Junior Bokke se afrigter, Chean Roux, wat die SA Rugby-akademie sedert Februarie in Stellenbosch onder hande gehad het, sal sy groep aanstaande week aankondig.
Die groep, wat steeds deel sal vorm van die akademie, kom van 31 Maart tot 18 April in Stellenbosch vir 'n oefenkamp byeen.
“Die internasionale reeks sal 'n ongelooflike geleentheid wees vir die spelers om hulself te bewys met die oog op die Wêreldbyeenkoms,” het Roux gesê.
“Ná die werk met 'n groot klomp van die spelers by die akademie, sal die wedstryde die afrigters nog 'n kans gee om te besin oor die finale groep van 28, wat ná afloop van die reeks gekies word.
“Argentinië en Georgië neem vanjaar deel aan die Wêreldkampioenskap en die Argentyne is die gasheerspan; dus is die reeks ewe belangrik vir hul voorbereiding.
“Georgië het verlede jaar teen ons in Suid-Afrika gespeel, so ons sien uit daarna om hulle terug te verwelkom. Ons verwag 'n uitdagende en opwindende reeks.”
Die Junior Springbokke begin hul veldtog in die Wêreldkampioenskap teen Skotland op 4 Junie, voordat hulle op 8 Junie teen Georgië en vier dae later teen Nieu-Seeland in die groepfase te staan kom.
Die halfeindstryde is op 17 Junie en die eindstryd op 22 Junie.
Die internasionale o.20-reeks se bepalings:
9 April (Paarl Gimnasium): Argentinië o.20 tn Namibië XV; Georgië o.20 tn Junior Springbokke.
13 April (Tygerberg-rugbyklub): Georgië o.20 tn Argentinië; Junior Springbokke tn Namibië XV.
17 April (Paul Roos Gimnasium): Georgië o.20 tn Namibië XV; Junior Springbokke tn Argentinië.
– Bygewerk van Netwerk24
Kommentaar
Republikein
Geen kommentaar is op hierdie artikel gelaat nie