Weegbrûe beskerm ons paaie

Oorlading van April af vervolgbaar

12 March 2019 | Vervoer
Augetto Graig - Regstappe teen en die vervolging van voertuigeienaars wat hul voertuie oorlaai, sal na verwagting van 1 April af inwerking gestel word.

Dít volgens mnr. Vincent Sasele, afdelingsbestuurder van padvervoer en die Paaieowerheid (RA) se vervoerinspektoraat.

Sasele sê die RA het ’n hoërhofbeslissing gewen, wat die weg baan vir die toepassing hiervan om die land se paaie te beskerm.

Toe mnr. John Mutorwa, die minister van werke en vervoer, verlede week die weegbrug by Brakwater besoek het, het Sasele die hoë koste en ander uitdagings verbonde aan sulke regstappe uitgewys.

Tans word oortreders van die pad getrek en gedwing om swaar vrag te skuif, of om nog voertuie te ontbied om van die vrag oor te neem.

“Wanneer ons mense begin vervolg, sal ’n boete bykomend by die aanpassing van die vrag gehef word, ’n saak sal geopen word en ’n lasbrief uitgereik word. Daar is reeds ’n aantal onopgeloste lasbriewe,” sê hy.

Hy sê ’n beter oplossing is die dekriminalisering van oorlading, wat die lae boetes wat tans van toepassing is, onmiddellik sal verhoog.

“Ons sou drywers kon dwing om boetes te laat betaal volgens die hoeveelheid skade aangerig,” sê hy. “Dekriminalisering sou onmiddellike betaling moontlik maak,” sê hy.

Sasele sê ’n komitee het in 2014 reeds die eerste wetsontwerp vir dekriminalisering voltooi en dit is ook na die kabinet verwys, waar dit deur die betrokke staande komitee onder oë geneem is.

Mutorwa het verantwoordelikheid vir die bevordering van dié wetsontwerp geneem.

Die nasionale strategie op oorlading word toegepas, en 10 uit die 12 weegbrûe wat beoog word, is reeds gebou en in werking.

Volgens Sasele word nog twee weegbrûe op Otjiwarongo en Keetmanshoop beplan.

“Van die weegbrûe is 24 uur ’n dag, sewe dae ’n week oop – veral dié op die noordelike, suidelike, oostelike en westelike roetes,” sê hy.

Een probleem is ’n tekort aan beamptes om weegbrûe te beman.

Wanneer ’n weegskaaloperateur met siekverlof is, moet ’n verkeersbeampte instaan, en sy eie punt tydelik verlaat, het Sasele gesê.

Weegbrûe is noodsaaklik vir die instandhouding van nasionale paaie, sê hy.

“As paaie nie beskerm word nie, verkort dit hul lewensduur drasties – kyk net die pad tussen Kongola en Katima Mulilo. In vergelyking met die res van die pad deur Zambië is ons pad in ’n goeie toestand weens die doeltreffende beheer van oorlading, en padonderhoud,” sê hy.

Sasele sê die RA is bewus van drywers wat weegbrûe soms vermy.

“Dit is die werklikheid. Ons weet ook van ontsnappingsroetes en oop afstande wat gebruik word. Dit is hoekom ons ’n weegbrug op Otjiwarongo moet bou. Ons benodig ook nog 'n weegbrug op Rundu, maar daai projek moet nog goedgekeur word. Ons het reeds ’n stuk grond op Rundu, en hoewel dit nie geskik is nie, kan ons dit maklik vir ’n beter een verruil. Onthou, hierdie is multimiljoendollar-projekte,” sê hy.

Mnr. Conrad Lutombi, die RA se uitvoerende hoof, het die beplande weegbrug op Rundu bevestig.

“Dit is kritiek, veral noudat die vervoer van hout algemeen op die pad tussen Rundu en Divundu is.

“As mense in ag neem hoeveel dit kos om paaie te vervang, sowat N$140 miljard, is weegbrûe baie belangrik,” sê hy.

Sasele bevestig die toename in die vervoer van hout wek ernstige kommer by die RA – veral wanneer maatskappye bestaande weegbrûe vermy.

Hy sê die gebruik van tydelike weegbrûe word ook oorweeg om die skade van oorlading te verminder.

Dít is beperk totdat permanente weegbrûe aangebring kan word, en aksie teen oortreders geneem kan word.

Soortgelyk

 

Soldate se vee moet ook skoert

6 ure gelede | Ministeries

Ronelle Rademeyer - Dit is nie net boere wat uit desperaatheid hul vee op weermagplase laat wei nie. Lede van die weermag (NDF) is net...

Vereniging lê aan op wapenwet

6 ure gelede | Regering

Elvira Hattingh - Namibiese vuurwapeneienaars het ‘n vereniging gestig en gaan “formeel in gesprek tree” oor voorgestelde wysigings aan die Namibiese wapenwet.Die pasgestigte Vuurwapeneienaarsvereniging van...

Building mental strength

6 ure gelede | Skole

Elizabeth Joseph Ronan Wantenaar is an 11-time gold, five-time silver and seven-time bronze medallist. He obtained these laurels on African soil in continental competitions...

Drie ontsnaptes steeds voortvlugtig

6 ure gelede | Misdaad

Tanja Bause - Die drie vermeende misdadigers wat die naweek aan die kus ontsnap het, is teen gister nog nie aangekeer nie. Volgens die polisie...

Weer vir 23 Julie 2019

6 ure gelede | Weer

BINNELAND: Gedeeltelik bewolk en matig tot warm in die verre Suide, maar sonnig en warm tot baie warm in die Noorde.KUS: Gedeeltelik bewolk en...

Debaters going places

6 ure gelede | Gemeenskap

Elizabeth JosephThe Namibia high school debating team was sponsored by Kalahari Holdings to attend the inaugural Pan-African Schools' Debating Championships 2019 in Johannesburg, South Africa....

Equipping learners with cultural knowledge

6 ure gelede | Onderwys

Ombu is situated about 40 kilometres south of Otjiwarongo, and hosts the history, heritage and culture of the Ovaherero people in the form of a...

Sexual health in the spotlight

6 ure gelede | Onderwys

Ester Kamati The Windhoek Vocational Training Centre (WVTC) and the Society for Family Health (SFH) signed a memorandum of understanding (MoU) on Friday, 19 July...

Nicole terug op eie bodem

6 ure gelede | In beeld

Mej. Tiener Namibië 2018, Nicole Landsberg, 'n leerling aan Windhoek Hoërskool, is onlangs in Amerika as Miss Teen Contintents vir 2019 gekroon. Landsberg het Saterdag...