Water: Hou rekord van elke druppel

Waterbestuur tans verpligtend

20 May 2019 | Regering
Elvira Hattingh - Tot 90% van die water in Windhoek wat onnodig weens lekkasies of buitensporige waterverbruik verlore gaan, sou gespaar kon word indien huishoudings rekord van hul meter­lesings gehou het.

Mnr. Dieter Tolke, 'n ingenieur-tegnikus vir water in die munisipaliteit se afdeling vir infrastruktuur, water en tegniese dienste, meen die gebrek aan die bestuur van waterverbruik lei daartoe dat NamWater en ander owerhede tussen 30% en 50% meer water aan verbruikers moet verskaf as wat werklik benodig word.

Dié nuus kom kort nadat die munisipaliteit (CoW) sy waterbestuurplan op 1 Mei amptelik van ­kategorie C (waterskaarste) na kategorie D verander het, wat op 'n ernstige watertekort dui.

Boonop is inwoners verplig om van 1 Julie af minstens 15% water te spaar en huishoudings mag nie meer as 25 m³ per maand gebruik nie, terwyl rekordhouding van water­verbruik ook verpligtend is.

Tolke is van mening voortdurende rekordhouding van huishoudelike watergebruik is die beste manier om vas te stel waar die meeste water in jou huis heen gaan, of daar enige lekkasies is en om waterbesparingsteikens te bereik.

“Dit is die enigste manier om te vermy dat jy 'n verrassing op jou rekening kry. As jy dit nie doen nie, sal jy vroeër of later 'n onaangename verrassing kry,” het hy gesê.

Tolke sê waterbestuur alleen spaar nie water nie en doeltreffende waterverbruik is ook van kardinale belang.

“Waterbestuur is die proses om rekord van water­besparings en -gebruik te hou.

“Dit kan vergelyk word met 'n ouditinstrument om vas te stel hoeveel water jy verbruik en of dit binne aanvaarbare vlakke val.”

ONONTDEKTE ­LEKKASIES GROOTSTE PROBLEEM

“Windhoek se grootste uitdaging is die waterlekkasies waarvan ons nie weet nie.

“Die geld wat gespaar kan word deur die vroegtydige ontdekking van 'n waterlekkasie, is gewoonlik meer as wat dit kos om die lekkasie te herstel,” het hy gesê.

Tolke sê toilette is dikwels die grootste bron van versteekte waterverliese omdat dit soms skielik sal vassteek en nie mooi toemaak nie.

“Dit gebeur gereeld en binne vier tot vyf ure kan tot 10 m³ water so wegloop.

“Jy wil nie in 'n situasie beland waar jy vir afslag moet vra oor 'n waterlekkasie nie. Boonop kry jy net afslag op die boete, terwyl jy steeds vir die water moet betaal. Tans, tydens die droogtesitua­sie, word geen afslag gegee nie.”

Tolke sê die munisipaliteit neem waterlesings slegs vir rekeningdoeleindes en dit kan nie vir water­bestuur gebruik word nie.

“Waterbestuur is die verbruiker se verantwoordelikheid.

“Jou watermeter is jou grootste vriend.

“Niemand wat in sentrale Namibië woon, kan bekostig om net op munisipale rekeninge vir rekordhouding staat te maak nie. Die tyd wat water volop en goedkoop was, is verby.”



ANALISEER VERBRUIK

Tolke beveel aan dat mense eenmaal per jaar 'n week neem waartydens hul waterverbruik twee tot vier keer per dag gemeet word. Al die aktiwiteite waarby water betrokke is, moet ook neergeskryf word.

“Dit gee vir jou 'n ­evaluering van jou watergebruik in fyn besonderhede. Hiersonder weet jy nie waarheen water in jou huis gaan nie,” sê Tolke.

“Ek kry dikwels dat mense vir my sê hulle spaar water deur byvoorbeeld stort- of badwater in die toiletbakke of tuin hergebruik, maar dat hul waterverbruik buitensporig hoog is.

“Indien ons dan só 'n evaluasie doen, ontdek 'n mens dikwels ­byvoorbeeld dat huis­hulpe op wasdae buitensporig baie water gebruik, in sekere gevalle tot soveel as 3 m³.

“Waterkoelers is ook 'n gereelde sondaar en soms gebruik dit tussen 6 en 12 m³ water per maand – soveel as twee mense in 'n huishouding.”

Tolke sê huishoudings in Windhoek word aangeraai om aanvanklik so 'n analise van hul ­watergebruik te doen. Daarná kan meterlesings weekliks gedoen word.

“Die feit is die vraag na water groei voortdurend omdat al meer mense na die sentrale dele van die land verhuis.

“Terselfdertyd groei besighede, maar ons bronne bly dieselfde. Dus sal ons watertekort al groter raak.”

Soortgelyk

 

Kawana gee besonderhede oor viskwotas

8 ure gelede | Visserye

Nuwe aansoekers sal 56,2% van viskwotas ontvang en bestaande regtehouers die balans van 43,8%.Dr. Albert Kawana, wat as nuwe minister van visserye en mariene hulpbronne...

Namibië het nou 23 bevestigde Covid-19-gevalle

20 ure gelede | Gesondheid

Namibië se jongste bevestigde geval van Covid-19 (nr. 23) is 'n 38-jarige Namibiese vrou wat op 23 Mei vanaf Dar es Salaam, Tanzanië na Namibië...

The cream of the crop

20 ure gelede | Mense

Ester KamatiMonica Gwala (Niilenge), the owner of Mo-nize Farmstead Fresh Produce, is the only entrepreneur amongst six siblings, specifically in the field of agriculture –...

Namibië oper, Walvis toe

20 ure gelede | Regering

Denver Kisting – Die staatshoof, pres. Hage Geingob, sê fase 3 wat Dinsdag in werking tree, gaan van Namibiërs vereis om groter verantwoordelikheid vir hul...

Baie meer as miljard vir Air Nam nodig

20 ure gelede | Regering

Ronelle Rademeyer – Die N$984,6 miljoen wat in die nuwe boekjaar uit die belastingbetaler se sak na die nasionale redery gaan vloei, sal net “die...

Weer vir 29 Mei 2020

20 ure gelede | Weer

BINNELAND: Koud in die oggend, andersins sonnig en matig tot warm, maar warm tot baie warm in die Noorde.KUS: Sonnig en matig tot warm. GETYE...

Ouwêreldse vermaak by 'nuwe' inryteater

20 ure gelede | Kuns en vermaak

Yandi du PlessisDalk is jy al keelvol vir Netflix of ShowMax, of bloot net uitgekuier om by die huis te sit. Dalk verlang jy na...

Vier 'renosterstropers' verskyn in camera

20 ure gelede | Misdaad

Francoise Steynberg – Vier van die agt verdagtes wat vandeesweek in verband met renosterstropery en -horingsmokkelary vasgetrek is, het gister in camera in die streekshof...

San gebruik spaargeld vir wateraanleg

20 ure gelede | Omgewing

Die San-gemeenskap in die N‡a Jaqna-bewaringsgebied se water­infrastruktuur is al vir jare 'n uitdaging. Water is 'n skaarste in Namibië en inwoners van dié bewarings­gebied...