Wat ek op 45 weet

Ek is vandag 45. Eintlik nog 'n spring chicken, maar hopelik oud genoeg om al iets in die lewe te geleer het, hoewel dit nie altyd so voel nie.

Miskien voel ek oor vyf jaar anders, maar hier's wat ek nou weet:

– Die lewe skuld my niks. Alles wat ek is en wat ek het, is pure luck. Luck en geluk is nie heeltemal dieselfde ding nie, so ek gaan nie die Afrikaanse woord daarvoor gebruik nie. Ek dink dalk ek het goed bereik omdat ek so wonderlik is of so hard werk, en harde werk ís dalk so 10% daarvan, maar 99% is pure luck. Party mense noem dit genade.

Maar omdat ek niks wat ek het, eintlik verdien nie, hoef ek ook nie verskoning daarvoor te vra nie. Wat ek het, hét ek, ek own dit, maar ek is ook báie dankbaar daarvoor.

– Wat my by die volgende ding bring: Die lewe is nie regverdig nie. Die mense wat die hardste werk, is nie noodwendig die rykste of die gelukkigste nie, die slimstes is nie noodwendig ryk of gelukkig nie, en die mooistes en maerstes word ook verneuk. That's life.

– Mense is lelik met jou, meestal omdat hulle nie van hulself hou nie. Minderwaardigheidskomplekse maak van mense katterige, beledigende, arrogante, vernederende patete.

Loop lig vir mense met swak selfbeelde wat agter snydende aanmerkings wegkruip, want húlle is die planeet se selfsugtigstes ook.

Met die grootste ego's. Moet hulle ook nie jammer kry nie, hulle kiés om hul probleme nie te bowe te kom nie, hulle kies om aan hul ­issues vas te klou.

– Die ander moontlikheid waarom mense dalk met my lelik is, is omdat ek dit dalk verdien. Ja, die moontlikheid bestaan actually dat ek dalk nié so oulik is as wat ek gedink het ek is nie, hoe moeilik dit ook al is om te aanvaar.

– Die mense met die grootste bekke weet gewoonlik die minste.

– Daar's altyd iemand beter as ek. Op alle gebiede. Daar's ook altyd iemand slegter as ek. Op alle gebiede.

– Respek is iets wat verdien moet word. Mense hoef my nie te repekteer omdat ek ouer/ryker/slimmer is as hulle nie. As ek mense sonder respek behandel, sal ek dit ook nie terugkry nie.

– Grootmense moet leer om kinders te respekteer. Ja, jy't reg gelees. Kinders weet nie níks nie. Hulle het ook wysheid.

– Mense gáán jou oordeel, maak nie saak watter godsdiens jy aanhang, hoe jy lyk of hoe nice jy dink jy is nie. Daar sal altyd iemand wees wat nie van jou hou nie. En jy gaan ander mense ook oordeel. Dis mens­lik. Mens kan nie van almal hou nie, en jy hoef nie.

– Sukses is nie om in 'n fancy huis te bly, maar jou dood te skuld nie. Vir party mense is sukses net om soggens op te staan, of om een voet voor die ander te sit. En ja, daar sal altyd mense wees wat jou as 'n mislukking beskou - op een of ander gebied.

So, wat ek eintlik ná 45 jaar in hierdie inkarnasie en op hierdie planeet geleer het - is: Laat dit net gaan.

Enjoy the ride. As jy wil, maar jy hoef nie. Jy hoef niks nie.

Of gooi net jou arms in die lug en gil al die pad ondertoe. Dit maak nie rêrig saak nie. Wees maar net.

Solank jy met jouself kan saamleef.