Walvisbaaise sakeman vas oor 'demoon-dwelm'

Leandrea Louw op Walvisbaai - 'n Walvisbaaise sakeman wat Vrydag met 168 sakkies van die sogenaamde demoon-dwelm in sy besit in hegtenis geneem is, is die naweek in 'n hospitaal opgeneem nadat hy in aanhouding siek geraak het.

Mnr. Louis Nasilowski (54) is vasgetrek met 98 sakkies "smoke" en 70 sakkies "wiz" met 'n beraamde waarde van N$18 760 in sy besit. Hy sou gister sy eerste hofverskyning gemaak het, maar die prosedure is in sy afwesigheid uitgevoer aangesien hy 'n private hospitaal in Windhoek is.

Hy staar klagte van dwelmhandel in die gesig en sy saak is tot 'n latere datum uitgestel.

Tydens 'n operasie van die Namibiese polisie is die dwelms gekoop en die inhoud in 'n laboratorium getoets. Toe bevestig is dit bevat wel amfetamien (Tik), het die polisie 'n klopjag op die onderneming uitgevoer.

Die polisie het nog sakkies in die kluis gevind. Na bewering is die sakkies teen N$100 elk oor die toonbank van die DVD-winkel verkoop.

"Wiz", ook bekend as "Speed", is 'n sintetiese dwelm wat gebruikers vir ure wakker hou, asook die hartklop en asemhaling versnel.

Amfetamien is 'n sentrale senustelsel-stimulant wat chemiese toestande en senuwees in die brein affekteer wat tot hiperaktiwiteit en impulskontrole bydra. Dit word gebruik om aandagafleibaarheidsindroom (ADHD), narkolepsie ('n slaaptoestand) en vetsug te behandel. Amfetamien kan allergiese reaksies, hallusinasies, verwarring of abnormale gedrag en hoë bloeddruk veroorsaak. Swaar gebruikers van amfetamien kan geneig wees tot skielike gewelddadige en irrasionele optrede.

Op kort termyn kan die geheue en konsentrasievermoë aangetas word. Verdraagsaamheid vir amfetamien kan vinnig opgebou word, dus word groter dosisse vir dieselfde ervaring vereis.

Langtermynmisbruikers kan verslaaf raak aan die gevoel wat dit hulle gee. Hewige langtermynmisbruik oor langer tydperke kan ook erge druk op die hart plaas en is gekoppel aan geestesiektes soos psigose. Amfetamiengebruikers het al aan 'n oordosis beswyk.

Verskeie video’s is op sosiale media wat wys hoe mense onbeheerbaar rondrol, skree en "waansinnig raak" nadat hulle sintetiese dagga, oftewel "K2" of "Spice", gebruik het. Psigotiese gevolge van K2-gebruik sluit in erge angs, verwarring, paranoia en hallusinasies.

KUSVROU VERTEL VAN 'ZOMBIE'

Nadat Republikein onlangs berig het die Namibiese polisie het bevestig dat geen voorvalle van die "demoon-dwelm" in Namibië voorgekom het nie, het 'n vrou van die kus laat weet so 'n geval is agt maande gelede by die Walvisbaaise polisie aangemeld.

Die vrou het aan Francoise Steynberg gesê die sakkie is by die beskuldigde se DVD-winkel gekoop.

"'n Monster van die dwelm is aan die Walvisbaaise polisie oorhandig wat dit glo na 'n laboratorium vir analise sou stuur," het die vrou gesê. "Die polisie het toe gesê dit sou ses tot tien maande neem voor die uitslae bekend sou wees."

Sy het vertel hoe die gebruiker binne twee weke van 'n normale mens in 'n baie aggressiewe een verander het.

"Hy het van 'n gesonde mens in 'n aggressiewe zombie verander. Hy het dit vir ses weke gebruik."

Sy het gesê hy is nou piekfyn en "dit is 'n wonderwerk dat hy uit die kake van verslawing ontsnap het".