Wakker bly vir ’n goeie doel

Nictus het die wenners van hul You Snooze You Lose-kompetisie aangekondig. Die kompetisie is in vyf van hul takke landswyd aangebied. Deelnemers moes op ’n bed in die betrokke winkel sit en wakker bly so lank as wat hulle kon.

Hulle moes ook ’n liefdadigheidsorganisasie van hul keuse op sosiale media bemark en geld daarvoor insamel.

Die wenner by elke tak is met 'n bed en beddegoed beloon.

Ná 70 uur van wakkerbly het die laaste deelnemer nie die paal gehaal nie.

Die meeste geld is deur me. Rosa Smit ingesamel vir die liefdadigheidsorganisasie van haar keuse.

Smit het by Nictus se tak in die Auas Valley-inkopiesentrum deelgeneem.

Sy het N$9 000 in kontant, sowel as kos en klere vir Huis Maerua in Windhoek ingesamel.

Mnr. Kelvin Nolte het N$3 500 in kontant en kos ter waarde van N$3 000 vir die dierebeskermingsvereniging (DBV) in Walvisbaai ingesamel.

Mnr. Matthew Shilamba het gewen by Nictus Giga, me. Anna Ashipala by Nictus in die Auas Valley-inkopiesentrum, me. Louise Burger in Swakopmund, en mnre. Brandon Hamacher in Ongwediva en Quanton Bampton in Walvisbaai. Op die foto is me. Rosa Smit wat die meeste vir haar liefdadigheidsorganisasie ingesamel het. Foto verskaf