Waarskuwing ná blaps van multimiljoene
'n Finale skriftelike waarskuwing is verlede week aan die permanente sekretaris van finansies uitgereik.
Hoofredaksie
Die multimiljoen-blaps in die toekenning van die tender vir die bou van die nasionale oliebergingsaanleg by Walvisbaai het die voormalige voorsittter van die tenderraad en permanente sekretaris van finansies, me. Erica Shafudah, 'n finale skiftelike waarskuwing op die hals gehaal.
Dié tender is in 2014 deur die tenderraad aan China Harbour Engineering Company, in vennootskap met Babyface Civils van mnr. Vaino Nghipondoka, vir N$3,7 miljard toegeken.
Die kontrak is in Namibiese dollar aangegaan en teen 2016 het die projekkoste weens wisselkoers-stygings reeds tot N$5,5 miljard geklim – dus N$1,8 miljard méér as die aanvanklike koste.
Die tenderraad is intussen deur die nuwe Wet op Verkryging deur die verkrygingsraad vervang.
Mnr. George Simataa, kabinetsekretaris, het Shafudah op 9 Mei per brief in kennis gestel dat daar ná 'n ondersoek van vermeende wangedrag na die optrede van sekere senior staatsamptenare in die hantering van hierdie projek, besluit is om 'n finale skriftelike waarskuwing aan haar uit te reik.
'n Afskrif van die brief sirkuleer sedertdien wyd op WhatsApp en ander sosiale media platforms.
Simataa sê in die brief hy het in sy ondersoek bevind sy het versuim om vergaderings van die tegniese komitee, waarvan sy “'n integrale deel” was, by te woon. Dit het “nadelige gevolge” vir die regering gehad.
“Hoewel jy altyd die regte standpunt gehuldig het, naamlik dat die tender in Namibiese dollar uitgereik word, inklusief moet wees en nie die risiko van wisselkoersskommelings vir die regering moet inhou nie, het jy nie die tegniese komitee se vergaderings bygewoon nie.
“Dit het by ander die indruk geskep dat die regering aangeneem het die bedrag sal deur die wisselkoers beïnvloed word,” sê hy in sy brief aan haar.
Die dagblad The Namibian het Donderdag berig die permanente sekretaris van die nasionale beplanningskommissie, mnr. Leevi Hungamo, en die hoofregsadviseur in die kantoor van die prokureur-generaal, mnr. Chris Nghaamwa, is die eerste topamptenare wat aangekla is.
Simataa het in antwoord op skriftelike navraag van Republikein oor wat die klagte behels en of nog amptenare aangekla gaan word, gesê dit is “'n interne, administratiewe aangeleentheid” en dat hy nie in hierdie stadium by magte is om dit met die media te bespreek nie.
Die kantoor van die eerste minister het in Maart in 'n verklaring gesê me. Saara Kuugongelwa-Amadhila, wat die minister van finansies was ten tye van die toekenning van die tender, kan nie vir die stygende koste van die projek geblameer word nie.
Volgens die verklaring was sy in haar destydse kapasiteit nie verantwoordelik vir toesighouding oor die projek nie. Dit was die taak van 'n ministeriële komitee, bestaande uit verskillende ministers onder voorsitterskap van die direkteur-generaal van die nasionale beplanningskommissie – destyds mnr. Tom Alweendo.
Dié komitee is deur 'n tegniese komitee, bestaande uit die permanente sekretarisse en senior amptenare van hierdie ministeries en ander regeringsinstellings, met Hungamo as die voorsitter, bygestaan.
“Die tegniese komitee het aan die ministeriële komitee terugvoering gegee en nie aan Kuugongelwa-Amadhila as die destydse minister van finansies nie,” het haar kantoor in die verklaring gesê.
Die multimiljoen-blaps in die toekenning van die tender vir die bou van die nasionale oliebergingsaanleg by Walvisbaai het die voormalige voorsittter van die tenderraad en permanente sekretaris van finansies, me. Erica Shafudah, 'n finale skiftelike waarskuwing op die hals gehaal.
Dié tender is in 2014 deur die tenderraad aan China Harbour Engineering Company, in vennootskap met Babyface Civils van mnr. Vaino Nghipondoka, vir N$3,7 miljard toegeken.
Die kontrak is in Namibiese dollar aangegaan en teen 2016 het die projekkoste weens wisselkoers-stygings reeds tot N$5,5 miljard geklim – dus N$1,8 miljard méér as die aanvanklike koste.
Die tenderraad is intussen deur die nuwe Wet op Verkryging deur die verkrygingsraad vervang.
Mnr. George Simataa, kabinetsekretaris, het Shafudah op 9 Mei per brief in kennis gestel dat daar ná 'n ondersoek van vermeende wangedrag na die optrede van sekere senior staatsamptenare in die hantering van hierdie projek, besluit is om 'n finale skriftelike waarskuwing aan haar uit te reik.
'n Afskrif van die brief sirkuleer sedertdien wyd op WhatsApp en ander sosiale media platforms.
Simataa sê in die brief hy het in sy ondersoek bevind sy het versuim om vergaderings van die tegniese komitee, waarvan sy “'n integrale deel” was, by te woon. Dit het “nadelige gevolge” vir die regering gehad.
“Hoewel jy altyd die regte standpunt gehuldig het, naamlik dat die tender in Namibiese dollar uitgereik word, inklusief moet wees en nie die risiko van wisselkoersskommelings vir die regering moet inhou nie, het jy nie die tegniese komitee se vergaderings bygewoon nie.
“Dit het by ander die indruk geskep dat die regering aangeneem het die bedrag sal deur die wisselkoers beïnvloed word,” sê hy in sy brief aan haar.
Die dagblad The Namibian het Donderdag berig die permanente sekretaris van die nasionale beplanningskommissie, mnr. Leevi Hungamo, en die hoofregsadviseur in die kantoor van die prokureur-generaal, mnr. Chris Nghaamwa, is die eerste topamptenare wat aangekla is.
Simataa het in antwoord op skriftelike navraag van Republikein oor wat die klagte behels en of nog amptenare aangekla gaan word, gesê dit is “'n interne, administratiewe aangeleentheid” en dat hy nie in hierdie stadium by magte is om dit met die media te bespreek nie.
Die kantoor van die eerste minister het in Maart in 'n verklaring gesê me. Saara Kuugongelwa-Amadhila, wat die minister van finansies was ten tye van die toekenning van die tender, kan nie vir die stygende koste van die projek geblameer word nie.
Volgens die verklaring was sy in haar destydse kapasiteit nie verantwoordelik vir toesighouding oor die projek nie. Dit was die taak van 'n ministeriële komitee, bestaande uit verskillende ministers onder voorsitterskap van die direkteur-generaal van die nasionale beplanningskommissie – destyds mnr. Tom Alweendo.
Dié komitee is deur 'n tegniese komitee, bestaande uit die permanente sekretarisse en senior amptenare van hierdie ministeries en ander regeringsinstellings, met Hungamo as die voorsitter, bygestaan.
“Die tegniese komitee het aan die ministeriële komitee terugvoering gegee en nie aan Kuugongelwa-Amadhila as die destydse minister van finansies nie,” het haar kantoor in die verklaring gesê.
Kommentaar
Republikein
Geen kommentaar is op hierdie artikel gelaat nie