Vrou verlam ná gunstelingperd haar aanval
Henriette Lamprecht – “Ek kan nie vir jou beskryf hoe dit gevoel het om daar te lê nie. Ek skree en skree, maar daar kom nie ’n geluid uit nie. En ek wag en wag en niemand kom nie, dit was verskriklik, dit was vreeslik om daar te lê.”
Groter as dié trauma was die feit dat die een hiervoor verantwoordelik haar gunstelingperd was wat in ’n herhaaldelike aanval die 36-jarige me. Yolandé du Plessis van haar nek af ondertoe verlam gelaat het.
Yolandé het uit haar bed in die intensiewesorgeenheid van die Lady Pohamba-hospitaal in Windhoek vertel van die hegte band wat sy eens met haar hings, FS Tailors Dream, gehad het. Die dag van die aanval was soos enige ander op die plot buite Okahandja waar sy saam met haar man en twee kinders bly.
“Ek en my man en kinders gee self die perde kos en water. Ek het klaar die voer gegee en vir Tailor water ingetap en wou dit in sy stal sit waar hy gestaan het,” het Yolandé vertel.
Sy weet nie hoe dit gebeur het nie, maar die volgende oomblik het Tailor uit sy stal gestorm en Yolandé geskop.
“Ek het probeer praat en ‘help’ skree, maar daar het geen geluid uitgekom nie, ek was onmiddellik verlam.”
Dit was egter nie die einde van die aanval op haar nie, met Tailor wat omgedraai, Yolandé gebyt en rondgesleep het. In dié proses het sy ’n ernstige nekbesering opgedoen, is haar nek raakgetrap en haar boonste nekwerwels verbrokkel. Die boonste deel van haar rugstring is ook erg gekneus en Yolandé is van haar nek ondertoe verlam.
Yolandé se man wat tydens die aanval elders was, het die water uit die stalle sien loop en gaan ondersoek instel. Hy het sy vrou sien lê, Tailor op stal gesit en met Yolandé hospitaal toe gejaag.
Tailor was haar gunstelingperd, vertel sy.
“Dit was erg vir my en geweldig traumaties. Ek het nie gedink hy sal dit aan my doen nie, ek verstaan nie wat het gebeur en hoekom nie.”
Tailor is ná die aanval verkoop en Yolandé wil hom “nooit, nooit weer sien nie”.
“Ek is nou so negatief teenoor hom, maar hy was my alles.”
Sedert die aanval op 31 Oktober vanjaar, word Yolandé in die intensiewesorgeenheid behandel waar sy deur ’n trageostomie aan ’n asemhalingsmasjien gekoppel is omdat haar asemhaling nie diep genoeg is nie. Haar nek is ook met ysterplate in ‘n lang en moeilike nekoperasie gestabiliseer.
Sy sal miskien in Januarie kan huis toe gaan, sê Yolandé, maar dit hang van baie dinge af. Die gesin het nie ’n mediese fonds nie en haar mediese koste hoop daagliks op. Daarmee saam sal Yolandé met haar ontslag uit die hospitaal 24-uur-versorging, ’n spesiale matras om te verhoed dat sy druksere ontwikkel, sowel as ’n asemhalingsmasjien, nodig hê.
Vriende het intussen ingespring en die Yolande Sunshine Fund in die lewe geroep om broodnodige fondse vir onder meer haar mediese versorging in te samel. Skenkings vir die Yolandé Sunshine Fund kan in die volgende rekening betaal word:
Arab Horse Breeders Society of Namibia, Bank Windhoek, Maerua Mall, rekeningnommer 800259 5969, met ’n verwysing Yolande Sunshine. ’n Betalingsbewys kan aan [email protected] gestuur word. Vir meer inligting oor spesiale insamelingsprojekte, besoek die fonds se Facebook-blad, Yolande Sunshine fund/news of stuur ’n e-pos aan [email protected].
Groter as dié trauma was die feit dat die een hiervoor verantwoordelik haar gunstelingperd was wat in ’n herhaaldelike aanval die 36-jarige me. Yolandé du Plessis van haar nek af ondertoe verlam gelaat het.
Yolandé het uit haar bed in die intensiewesorgeenheid van die Lady Pohamba-hospitaal in Windhoek vertel van die hegte band wat sy eens met haar hings, FS Tailors Dream, gehad het. Die dag van die aanval was soos enige ander op die plot buite Okahandja waar sy saam met haar man en twee kinders bly.
“Ek en my man en kinders gee self die perde kos en water. Ek het klaar die voer gegee en vir Tailor water ingetap en wou dit in sy stal sit waar hy gestaan het,” het Yolandé vertel.
Sy weet nie hoe dit gebeur het nie, maar die volgende oomblik het Tailor uit sy stal gestorm en Yolandé geskop.
“Ek het probeer praat en ‘help’ skree, maar daar het geen geluid uitgekom nie, ek was onmiddellik verlam.”
Dit was egter nie die einde van die aanval op haar nie, met Tailor wat omgedraai, Yolandé gebyt en rondgesleep het. In dié proses het sy ’n ernstige nekbesering opgedoen, is haar nek raakgetrap en haar boonste nekwerwels verbrokkel. Die boonste deel van haar rugstring is ook erg gekneus en Yolandé is van haar nek ondertoe verlam.
Yolandé se man wat tydens die aanval elders was, het die water uit die stalle sien loop en gaan ondersoek instel. Hy het sy vrou sien lê, Tailor op stal gesit en met Yolandé hospitaal toe gejaag.
Tailor was haar gunstelingperd, vertel sy.
“Dit was erg vir my en geweldig traumaties. Ek het nie gedink hy sal dit aan my doen nie, ek verstaan nie wat het gebeur en hoekom nie.”
Tailor is ná die aanval verkoop en Yolandé wil hom “nooit, nooit weer sien nie”.
“Ek is nou so negatief teenoor hom, maar hy was my alles.”
Sedert die aanval op 31 Oktober vanjaar, word Yolandé in die intensiewesorgeenheid behandel waar sy deur ’n trageostomie aan ’n asemhalingsmasjien gekoppel is omdat haar asemhaling nie diep genoeg is nie. Haar nek is ook met ysterplate in ‘n lang en moeilike nekoperasie gestabiliseer.
Sy sal miskien in Januarie kan huis toe gaan, sê Yolandé, maar dit hang van baie dinge af. Die gesin het nie ’n mediese fonds nie en haar mediese koste hoop daagliks op. Daarmee saam sal Yolandé met haar ontslag uit die hospitaal 24-uur-versorging, ’n spesiale matras om te verhoed dat sy druksere ontwikkel, sowel as ’n asemhalingsmasjien, nodig hê.
Vriende het intussen ingespring en die Yolande Sunshine Fund in die lewe geroep om broodnodige fondse vir onder meer haar mediese versorging in te samel. Skenkings vir die Yolandé Sunshine Fund kan in die volgende rekening betaal word:
Arab Horse Breeders Society of Namibia, Bank Windhoek, Maerua Mall, rekeningnommer 800259 5969, met ’n verwysing Yolande Sunshine. ’n Betalingsbewys kan aan [email protected] gestuur word. Vir meer inligting oor spesiale insamelingsprojekte, besoek die fonds se Facebook-blad, Yolande Sunshine fund/news of stuur ’n e-pos aan [email protected].
Kommentaar
Republikein
Geen kommentaar is op hierdie artikel gelaat nie