Vreugde oor eerste reën

Elvira Hattingh - ’n Weerkenner waarsku nog twee moeilike maande kan vir Namibië voorlê ondanks Sondag se eerste reënbuie.

Terselfdertyd kan geïsoleerde donderbuie vandag in die Noordweste voorkom, terwyl dit gedeeltelik bewolk en baie warm in die Noordooste en ||Kharasstreek sal wees, sê die Namibiese weerkantoor.

Dit sal ook van vandag af winderig wees en die wind sal van Woensdag af sterk oor die binneland waai.

Dié nuus kom nadat reën die naweek ’n bietjie verligting in die noordwestelike en sentrale dele van die land gebring het.

Volgens inskrywings op die Facebook-blad “Reën in Namibia” het Ondangwa tussen 30 mm en 42 mm reën ontvang. Op Ongwediva het dit glo 24 mm gereën en 14 mm so ver as Ruacana.

Op Kamanjab en naby Omaruru het dit tussen 5 mm en 10 mm gereën, terwyl Otjiwarongo se inwoners tussen 4 mm en 6 mm gemeet het.

Outjo het tussen 15 mm en 20 mm reën gehad, terwyl plase tussen Outjo en Otavi 12 mm tot 34 mm reën ontvang het.

In Windhoek is tussen 0 mm en 14 mm aangeteken.

Mnr. Endrie Dunn het laat weet op Doornboom, wes van Rehoboth, het dit 2 mm gereën. Op Witvlei en naby Gobabis het tussen 4 mm en 6 mm reën geval.

BAIE OPVOLGREëN NODIG

Weerkenners is optimisties daaroor dat El Niño klaarblyklik gewyk het en hulle glo die Indiese Oseaan-dipoolindeks (IOD), wat droogtetoestande in Australië veroorsaak, sal teen die einde van die jaar gunstiger wees.

Santam Suid-Afrika se landbouweerkundige, mnr. Johan van den Berg, het gister aan Republikein gesê hy glo steeds die tweede deel van die huidige reënseisoen behoort redelik goed te wees.

Hy sê die feit dat El Niño-toestande voor meer neutrale see-oppervlaktemperature gewyk het, is “gewoonlik positief vir reën later in die seisoen”.

“Tweedens is die Indiese Oseaan-dipoolindeks (IOD) tans in ’n baie sterk positiewe fase, wat nie gunstig vir vroeë reëns is nie. Dit behoort teen Desember weer na neutraal terug te keer, wat ook gunstig is vir reën later in die seisoen.

“Die huidige droogte in Australië is ’n groot bron van kommer vir ons in suidelike Afrika. Daar is groot ooreenkomste tussen ons klimaat en Australië s’n. Ons vestig ons hoop daarop dat toestande gaan verander,” het hy gesê.

Oor langtermynvooruitsigte sê Van den Berg: “In hierdie stadium is daar nog ’n 50/50-kans wat enige kant toe kan draai.

“Die probleem is dat 20 mm of 50 mm nie die droogte gaan breek nie, hoewel dit tydelik kan help. Ons het baie reën én baie opvolgreën nodig – wat tans nog nie in die volgende paar maande se vooruitskouings is nie. Dit kan dalk eers teen Januarie of Februarie of selfs later kom.”

Hy waarsku die “gevaarligte” vir droogte sal vir minstens die volgende twee maande nog flikker.

Volgens ’n uitkykstatus wat op 10 Oktober deur die Amerikaanse Weervoorspellingsentrum en die Internasionale Navorsingsinstituut vir Klimaat en Samelewing uitgereik is, is die kans 85% dat neutrale Enso-toestande in die huidige seisoen sal voortduur.

Daar is ook ‘n 55%- tot 60%-kans dat dít in 2020 se somer voortgesit sal word.

Die weervoorspellers meen die onlangse verhitting van oppervlaktemperature in die Stille Oseaan dui eerder op subseisoenale veranderlikheid as op El Niño wat weer kop uitsteek.

[email protected]