Verdrinkingsaak: Dagmoeder skuldig
Vier jaar nadat 'n baba in die swembad by 'n dagmoeder se huis verdrink het, is die vrou aan strafbare manslag skuldig bevind.
Jacqueline Louw - 'n Vrou in wie se sorg 'n 11 maande oue baba vier jaar gelede in Pionierspark verdrink het, is gister in die Windhoek-landdroshof aan strafbare manslag skuldig bevind.
Me. Catherina Agnes van den Bergh het meer as vier jaar ná die tragiese voorval waarin Ferreira Scholtz verdrink het, uitspraak gekry in die saak waarin sy beskuldig is van strafbare manslag en die onwettige bedryf van 'n dagsorgsentrum.
Ferreira, wat deur sy ouers, me. Suzette Jansen van Vuuren Weyers en mnr. Jurie Scholtz, in Van den Bergh se sorg toevertrou is, het op 20 November 2012 in die swembad by haar huis verdrink. Hy het klaarblyklik in 'n onbewaakte oomblik, toe al die kinders in haar sorg in 'n geslote kamer gerus het, by die huis uitgeglip en in die swembad geval.
Van den Bergh het gedurende die verhoor getuig die deur van die kamer waar die kinders geslaap het, is moontlik deur 'n baie bedrywige sesjarige in haar sorg opgemaak. Dit het die seuntjie die geleentheid gegee om uit die huis kom en tot die noodlottige gebeure gelei. “Ek wil nie hê dit moet met ander mammas gebeur nie,” het Jansen van Vuuren Weyers buite die hof aan Republikein gesê.
Van den Bergh was besig om middagete vir die kinders voor te berei toe die baba in die swembad ontdek is. 'n Ambulans is onmiddellik ontbied en sy het kunsmatige asemhaling toegepas. Die paramedici het probeer om die baba te red, maar daar was geen teken van 'n hartklop of asemhaling toe hulle op die toneel opgedaag het nie.
Klein Ferreira is 19 minute ná sy aankoms by die Katolieke hospitaal in Windhoek dood verklaar. Die nadoodse ondersoek het getoon verdrinking was die oorsaak van sy dood.
Landdros Ingrid Unengu het in haar uitspraak gesê die hoofkwessie in die saak is of die beskuldigde se nalatigheid Ferreira se dood veroorsaak het. In ag geneem die weerloosheid van 'n jong kind, het Unengu gesê daar was 'n regsplig op Van den Bergh om na hom om te sien en sy veiligheid te verseker omdat hy in haar sorg toevertrou was.
Sy het ook genoem dat die oop swembad 'n potensiële gevaar was wat Van den Bergh moes voorsien het. Unengu het bevind Van den Bergh was nalatig en het haar op die klag van strafbare manslag skuldig bevind.
Op die tweede klag, die bedryf van 'n onwettige dagsorgsentrum, is die beskuldigde vrygespreek omdat die staat nie kon bewys dat daar meer as ses kinders in haar sorg was nie.
Regsverteenwoordigers van die staat en die beskuldigde sal op 30 Januarie betoë vir versagtende en verswarende omstandighede lewer vir die doeleindes van vonnisoplegging.
Me. Catherina Agnes van den Bergh het meer as vier jaar ná die tragiese voorval waarin Ferreira Scholtz verdrink het, uitspraak gekry in die saak waarin sy beskuldig is van strafbare manslag en die onwettige bedryf van 'n dagsorgsentrum.
Ferreira, wat deur sy ouers, me. Suzette Jansen van Vuuren Weyers en mnr. Jurie Scholtz, in Van den Bergh se sorg toevertrou is, het op 20 November 2012 in die swembad by haar huis verdrink. Hy het klaarblyklik in 'n onbewaakte oomblik, toe al die kinders in haar sorg in 'n geslote kamer gerus het, by die huis uitgeglip en in die swembad geval.
Van den Bergh het gedurende die verhoor getuig die deur van die kamer waar die kinders geslaap het, is moontlik deur 'n baie bedrywige sesjarige in haar sorg opgemaak. Dit het die seuntjie die geleentheid gegee om uit die huis kom en tot die noodlottige gebeure gelei. “Ek wil nie hê dit moet met ander mammas gebeur nie,” het Jansen van Vuuren Weyers buite die hof aan Republikein gesê.
Van den Bergh was besig om middagete vir die kinders voor te berei toe die baba in die swembad ontdek is. 'n Ambulans is onmiddellik ontbied en sy het kunsmatige asemhaling toegepas. Die paramedici het probeer om die baba te red, maar daar was geen teken van 'n hartklop of asemhaling toe hulle op die toneel opgedaag het nie.
Klein Ferreira is 19 minute ná sy aankoms by die Katolieke hospitaal in Windhoek dood verklaar. Die nadoodse ondersoek het getoon verdrinking was die oorsaak van sy dood.
Landdros Ingrid Unengu het in haar uitspraak gesê die hoofkwessie in die saak is of die beskuldigde se nalatigheid Ferreira se dood veroorsaak het. In ag geneem die weerloosheid van 'n jong kind, het Unengu gesê daar was 'n regsplig op Van den Bergh om na hom om te sien en sy veiligheid te verseker omdat hy in haar sorg toevertrou was.
Sy het ook genoem dat die oop swembad 'n potensiële gevaar was wat Van den Bergh moes voorsien het. Unengu het bevind Van den Bergh was nalatig en het haar op die klag van strafbare manslag skuldig bevind.
Op die tweede klag, die bedryf van 'n onwettige dagsorgsentrum, is die beskuldigde vrygespreek omdat die staat nie kon bewys dat daar meer as ses kinders in haar sorg was nie.
Regsverteenwoordigers van die staat en die beskuldigde sal op 30 Januarie betoë vir versagtende en verswarende omstandighede lewer vir die doeleindes van vonnisoplegging.
Kommentaar
Republikein
Geen kommentaar is op hierdie artikel gelaat nie