Venaani: 'Land word aan hoogste bieërs verkoop'

Ronelle Rademeyer - “Namibië bevind hom in ’n waterskeidingstydperk van regeringsbestuur waarin hulle (die regering) nie die breër belange dien nie, maar vasbeslote is om die land aan die hoogste bieërs te verkoop.”
Dít was die openingsalvo gister by ’n nuuskonferensie waarin die opposisieleier en president van die Popular Democratic Movement (PDM) , mnr. McHenry Venaani, die vloer met die regering gevee het vir wat hy as die “de facto hervestiging” van die Russiese miljardêr, mnr. Rashid Sardarov, op staatsgrond beskryf het.
Kort daarna het die Regstellende Herposisioneringsbeweging (AR) van mnr. Job Amupanda die regering met byna dieselfde woorde gekritiseer en van verskeie leuens oor die “aaklige transkasie” beskuldig.
Die PDM sowel as die AR sê dit is om presies hierdie rede dat hulle die tweede nasionale grondkonferensie, wat plaasgevind het twee weke nadat die transaksie beklink is, geboikot het.
Republikein het Woensdag onthul die regering het vier plase “vir die volle rekening” van Sardarov gekoop en verhuur dit vir ’n tydperk van 99 jaar vir ’n nominale bedrag aan hom terug.
“Skaam jou, Hage Geingob! Skaam jou en jou regering! Julle tooi die transaksie op en sê eendag sal die eiendom wat hy gaan oprig aan die regering behoort. Wie bluf julle? Niemand van ons gaan oor 99 jaar meer leef nie,” het ’n ontstoke Venaani gesê.
Hy het ook bekend gemaak dat die PMD ’n bankrekening geopen het om deur middel van skarebefondsing ’n dringende hofaansoek by die hoërhof in te dien om die tranksaksies wat aangegaan is, nietig te laat verklaar.
“Die regering het ’n presedent van onaanvaarbare proporsies geskep. Hulle vat ons vir ’n ‘ride’ en is besig om hierdie land leeg te tap.
“Dit sal my nie verbaas as mense in die ministerie (van grondhervorming) geld ontvang het om hierdie transaksie te laat deurgaan nie,” het Venaani gesê.
Catherine Sasman berig Amupanda het aan joernaliste gesê inligting oor hierdie transaksie dui daarop die regering het as “middelman” opgetree en is ’n “waterdraer” vir buitelanders.
Hy sê die AR dring op ’n volledige ondersoek deur die Teenkorrupsie-kommissie (ACC) en die kantoor van die ombudsman. Voorts beskuldig hy mnr. Utoni Nujoma, minister van grondhervorming en sy ministerie van “onderduimse optrede”.
Die AR beskuldig die regering dat hy deur Nujoma die plase vir N$43 miljoen gekoop het en “nou agteroor buig om die Russiese miljardêr te seën vir slegs N$160 000” se huurgeld jaarliks.
Amupanda dring daarop aan dat die regering sê war hy die N$43 miljoen vandaan gekry het, of daarvoor begroot was en of die kabinet dit goedgekeur het.
Republikein het na aanleiding van die huureenkoms berig dat hoewel die regering die plase gekoop het, Sardarov deur sy maatskappy Comsar SA sowat N$43,5 miljoen namens die regering aan die eienaars oorbetaal het. Daarbenewens het hy ook ’n onbekende bedrag “vir die verlies aan besigheid” aan Rhino Farming van mnr. Claus Düvel en sy seun, Kurt, betaal.
Wat wel groot agterdog wek en wat die AR sê hom ook kwel, is dat die dokumentasie wat by die aktekantoor geliasseer is, onvolledig is. Bladsy 7 van die notariële huureenkoms ontbreek, asook die bladsye wat op bl. 8 volg.
Oor die beplande hofaansoek het mnr. Sisa Namandje, Sardarov se regsverteenwoordiger, by navraag gesê hy “weet nie op watter gronde die PMD die aansoek gaan bring nie”.
“Die indruk is verkeerdelik geskep dat die Wet op Kommersiële Landbougrond gewysig is, wat nie so is nie.
“Die transaksie is gedoen; dit is reeds geregistreer. Daar is mense aangestel wat begin werk het.
“As hulle stukke op my kliënt wil beteken, moet hulle dit doen. Ek sal my kliënt verdedig,” het Namandje gesê.
Later gister het ’n storm ook in die Nasionale Vergadering (NV) losgebars oor die verhuring van “voorvaderlike grond aan ’n buitelander”.
Denver Kisting berig die adjunkspeaker, me. Loide Kasingo, kon nie die gemoedere in opposisiegeledere tot bedaring bring nie.
Die minister van grondhervorming, mnr. Utoni Nujoma, het sy stilte oor die transaksie verbreek, maar niks meer gesê as wat in die onvolledige notariële huurooreenkoms staan en waaroor reeds berig is nie.
Die Swanu-leier, mnr. Usutuaije Maamberua, het die regerende party daarvan beskuldig dat hulle “opmors”.
“Hoe kan ’n mens ons voorwaardelike grond aan buitelanders verhuur?” wou hy weet.